കറുത്ത വേഷത്തിൽ

കണ്ണിൽ ഇരുണ്ട താഴ് വാരം

കാത്തു കൊണ്ടവൾ

അമാവാസി രാത്രിയിൽ

ചാരിനിന്നു കൊതിപ്പിച്ചവൾ

വെളിച്ചം വിടപറയുന്ന

പനമരങ്ങൾക്കിടയിലൂടെതിരേ

പതുക്കെ നടന്നുവന്നവൾ

കുന്നിക്കുരുച്ചോപ്പിലെ

കറുപ്പിനെ മൺകുപ്പിയിൽ കരുതി വച്ച

ഞങ്ങളുടെ ഔവയാർ

കറുത്ത മഷിയാൽ ചിത്രങ്ങൾ

വരച്ച

ഞങ്ങളുടെ പദ്മിനി

കൊയ്ത്തുപാടത്തിന്റെ

കരയിലെ കൊച്ചു വീട്ടിൽ

പാതിരാദുഃഖം പാടിയ

ഞങ്ങളുടെ കിഷോരി അമോങ്കാർ

കറുത്ത ഉടുപ്പിട്ട് നടക്കുന്നു

ഞാനുമിക്കാലം

കറുത്ത മഷിയാൽ എഴുതുന്നു

അവസാന കാല കവിതകൾ