രാത്രിക്കരയിൽ

1

രാത്രിനിലാക്കടലരുകിൽ

പലവുരി പുരികക്കപ്പൽ താളമിടുന്നു

ചാരേ നെറുകിൽ വട്ടപൊട്ടിൻ ചന്ദ്രനുദിച്ചു

പൗർണമി തോണ്ടി വിളിച്ച രസങ്ങൾ

കണ്ണിൽ തിരയായാടി മയങ്ങി.

2

വിസ്മയമെന്ന് വിളിക്കുന്നവരിൽ

വിളക്കുകൾ കെട്ടു പലകുറിയവിടെ

ഇതിലെന്തിത്രയിരിക്കുന്നാശയമെന്ന്

ചിരിക്കും ചിലരിൽ വിളക്കും മിന്നി

രാത്രിയിതൾക്കരയങ്ങനെയാണ്

പിടികൂടില്ലിവരാരും തന്നെ.

3

ചെടികളിൽ കാറ്റ് തളർന്ന് കിടക്കേ

ഇലകളിലാകെ വഴിയും രാഗം

കാറ്റ് തുടങ്ങും നേരമതൊഴിയും

രാത്രി വിഭാവരി തനിയെ പാടും.

4

ഒരിടത്തൊരിടത്തൊഴിഞ്ഞ പറമ്പിൽ

ജീവനഴിച്ചൊരു ദേഹംപോലെ

വിയർപ്പു പതിഞ്ഞൊരു കട്ടിൽ ചാഞ്ഞു

രാത്രിമഴക്കരയൊന്നത് ചെയ്തു

ഉള്ളിലെ വെട്ടം താഴ്ത്തി താഴ്ത്തി

ഇരുളിൻ വിരലാൽ

കട്ടിൽക്കാൽ വരെ

ഓർമയുഴിഞ്ഞു.

5

കാറ്റിൽ പഞ്ഞികളൊഴുകും പോലെ

ശലഭക്കൂട്ടം പാറി പാറി

രാത്രിവഴിക്കരയാകെ നിറഞ്ഞു

അവിടന്നാണവരോരോ വഴിയായ്

ഓരോ വീടിൻ മുറികളിലിതളായ്

ചില നേരങ്ങൾ ചില കാലങ്ങളിൽ

രാത്രിക്കരയൊന്നാകെ മെലിഞ്ഞു.