ദേഹി ‘നന്ദിനി’ നന്ദിനീ

വിരുത്തം:

പാട്ട്, പട്ട്ചുറ്റും പട്ടത്തി

പകിട്ട്, സുബ്ബലക്ഷ്മീ മുക്കുത്തി

മഹാരാജാസ്സഭയിലായ്

മനോധർമജ മാർകഴി

അവളിൽ പാട്ടുപാലാഴി

അവഗാഹനുണക്കുഴി

സരസ്വതീയാമപദ്‌മത്തിൽ

സാമഗാനവിനോദിനി

ചമ്രംപടിഞ്ഞിരിപ്പായി

ചാരുകേശിനി രാഗിണി

നാഗനന്ദിനീജന്യത്തി-

ലേകതാളത്തിത്സർവതും

മതിമറന്നിന്നാധാര

ശ്രുതിചേർന്നിതത്യത്ഭുതം

പെണ്ണാളിൽ വെച്ചൂർപൈതൃകം3

പൊന്നമ്മാളമ്മസാധകം4

കുയിലിൻ കുരൽവാണിശ്രീലകം

ഗായികാഗുരു‘ദീപകം’5

മൊഴിയിൽ, സപ്തകങ്ങളിൽ

മഴവില്ലിന്റെ ഞാണൊലി

സഭയിൽ, മണ്ഡപങ്ങളിൽ

സദിർ നീ സർഗനന്ദിനി.

==================

സൂചിക

1. നന്ദിനി -ജന്യരാഗം

2. ഡോ. എൻ.ജെ. നന്ദിനി -വിഖ്യാത സംഗീതജ്ഞ

3. വെച്ചൂർ ഹരിഹരസുബ്രഹ്മണ്യയ്യർ

4. പാറശ്ശാല പൊന്നമ്മാൾ

5. ഗായികയുടെയും ഗുരുവിന്റെയും ധർമങ്ങൾ ദീപകത്തിലെന്നപോലെ സമന്വയിച്ചിരിക്കുന്നു.