നാലാണുങ്ങൾ

1

അവ​ന്റെ കൈകളിൽ

മുറിവുകളുണങ്ങിയ പാടുകളുണ്ടായിരുന്നു

അവയിലൊക്കെയും പാമ്പ് കണക്കെ

ഞരമ്പുകൾ പിണഞ്ഞു കിടന്നിരുന്നെങ്കിലെന്ന്

എനിക്കപ്പോൾ തോന്നി.

അല്ലെങ്കിൽ അങ്ങനെ മോഹിച്ചു.

2

പഴയ കാമുക​ന്റെ മണവും പേറി

ഒരുത്തൻ ഗോവണി കയറി വന്നു

ഞാനിരിക്കേണ്ടുന്ന ഇരിപ്പിടത്തിൽ

അമർന്നു.

മുറിമുഴുക്കെ പഴയ കാമുകൻ പടർന്നു.

3

സ്നേഹം കിട്ടാതെ വളർന്ന

വലിയ കുപ്പായമിട്ട ആൺകുട്ടി

നിസ്സഹായതയുടെ കൈപിടിച്ച്

വീട്ടുപടിക്കൽ നിൽക്കുന്നു.

അവനിരിക്കാനോ നിൽക്കാനോ

ആ പുര തികയുമായിരുന്നില്ല.

4

മഞ്ഞ എന്നെഴുതി

മരിപ്പ് എന്നെഴുതാനാവാതെ

അവൻ മേശത്തുമ്പിൽ നെറ്റി മുട്ടിക്കുന്നു.

പിൻതലയിൽ അമ്പിളി വട്ടം

അതിലൊരു മുയൽ.

5

വാതിലു ചാരി വിളക്കണച്ച്

കിടക്കാനൊരുങ്ങുന്ന അവളുടെ മുറിയിൽ

മൂന്നാണുങ്ങൾ.

മൂന്നും മൂന്നുപോലെ

മുറിയാകെ നിലാവ് പരക്കുന്നു

അരക്ഷിതാവസ്ഥ വിരിപ്പ് കുടയുന്നു

പാരിജാതംപോലൊരു മണം

വാതിൽ കൊളുത്തിടുന്നു.

6

കൈ നിറയെ വടുക്കളുള്ളൊരുത്തൻ

വാതിലിൽ മുട്ടുന്നു.

ഞരമ്പുകളാകെ പിണഞ്ഞു കിടക്കുന്ന

കൈകൾ വീണ്ടും വീണ്ടും

വാതിലിൽ മുട്ടുന്നു.