നേരും നുണയുമല്ലാത്ത 14 സുവിശേഷങ്ങൾ
1. അവനവനിൽത്തന്നെ വിശ്വസിക്കേണ്ടിയിരിക്കുന്നുഅവനവനെത്തന്നെ അതിജീവിക്കുവാൻ. കൂടുതൽ ദൈവമാകാനുള്ള ഒരവസരം ആരാണ് വേണ്ടെന്ന് വെക്കുക! ** 2. മുറിഞ്ഞും തൂർന്നും ഒരാൾ മരണങ്ങളെ വകഞ്ഞു നീന്തുമ്പോൾ ജീവിതമേ ജീവിതമേ എന്ന മീനുകളാണ് അവനൊപ്പം അനുതാപപൂർവം സഞ്ചരിക്കുന്നത്. ** 3. കണ്ട ആഴങ്ങളെക്കാൾ കാണാത്ത ആഴങ്ങളാണ് നമ്മെ ഭയപ്പെടുത്തിക്കൊണ്ടിരിക്കുന്നത്, ഇഴയുന്ന ആമകൾക്കെല്ലാം നന്മ നന്മ എന്ന് ഒരാൾ പേരിട്ടു മറിഞ്ഞ് മലരുമ്പോൾ അവക്കെല്ലാം അവിശുദ്ധമായ എന്തോ രഹസ്യങ്ങളുണ്ടെന്ന് എനിക്കറിയാമായിരുന്നു. ** 4. നിശ്ശബ്ദതകളെല്ലാം നിഷ്കളങ്കമല്ലെന്ന് നിങ്ങൾക്കുള്ളിലെ വളർത്തുമൃഗത്തിന്നറിയാം...
Your Subscription Supports Independent Journalism
View Plans1. അവനവനിൽത്തന്നെ വിശ്വസിക്കേണ്ടിയിരിക്കുന്നു
അവനവനെത്തന്നെ അതിജീവിക്കുവാൻ.
കൂടുതൽ ദൈവമാകാനുള്ള ഒരവസരം
ആരാണ് വേണ്ടെന്ന് വെക്കുക!
**
2. മുറിഞ്ഞും തൂർന്നും ഒരാൾ
മരണങ്ങളെ വകഞ്ഞു നീന്തുമ്പോൾ
ജീവിതമേ ജീവിതമേ എന്ന മീനുകളാണ്
അവനൊപ്പം അനുതാപപൂർവം സഞ്ചരിക്കുന്നത്.
**
3. കണ്ട ആഴങ്ങളെക്കാൾ
കാണാത്ത ആഴങ്ങളാണ് നമ്മെ
ഭയപ്പെടുത്തിക്കൊണ്ടിരിക്കുന്നത്,
ഇഴയുന്ന ആമകൾക്കെല്ലാം
നന്മ നന്മ എന്ന് ഒരാൾ പേരിട്ടു
മറിഞ്ഞ് മലരുമ്പോൾ അവക്കെല്ലാം
അവിശുദ്ധമായ എന്തോ രഹസ്യങ്ങളുണ്ടെന്ന് എനിക്കറിയാമായിരുന്നു.
**
4. നിശ്ശബ്ദതകളെല്ലാം നിഷ്കളങ്കമല്ലെന്ന്
നിങ്ങൾക്കുള്ളിലെ വളർത്തുമൃഗത്തിന്നറിയാം
നിറഞ്ഞിരിക്കുന്നതിൽ എല്ലാം
തികഞ്ഞിരിക്കുന്നുമില്ലെന്ന്
നിഴലുകൾ നീങ്ങുന്ന
നേരങ്ങൾ സാക്ഷി.
**
5. വിശ്വാസം മാത്രമല്ല വിവേകംകൂടി വേണം
വിശ്വവിഖ്യാതമായ ഈ ജീവിതത്തെ നേരിടുമ്പോൾ,
വിലയേറിയതെല്ലാം കാഴ്ചവസ്തുക്കളാകുന്ന
ഒരു നൃത്തക്കാരനാണ്
സമയം!
**
6. അതിജീവിച്ച ഒന്ന്
നമ്മെ കൂടുതൽ ശക്തമാക്കുന്നുവെന്ന് പറയുന്നു
എങ്കിലും കശക്കിയെറിയപ്പെട്ട ഉരഗത്തെപ്പോലെ അത്
അവനെ ബാക്കിയാക്കുകകൂടി
ചെയ്യുന്നുണ്ടല്ലോ!
**
7. നാം ആഗ്രഹിക്കുന്ന കാര്യവും
നാം നേടുന്ന കാര്യവും രണ്ടാണ്
നമുക്കുള്ളിലോ പുറത്തോ അതിന്റെ പൂർണത
നഷ്ടമാകുന്നു,
തലക്കുമുകളിലന്നേരം
നിലാവോ വെയിലോ എന്നൊരു രൂപകമാടുന്നു.
**
8. സ്വർഗത്തിലേക്ക് മാത്രം കണ്ണുംനട്ടിരിക്കുമ്പോൾ
സ്വതന്ത്രമായവയെല്ലാം ഒരുവനെ അസ്വസ്ഥനാക്കുന്നു.
അവനവനിൽ നിന്നഴിഞ്ഞുപോകാനാകാതെ
കെട്ടിയ കുറ്റിയിൽക്കറങ്ങുന്നു
അരുമയായ അവന്റെ സ്വാർഥത.
**
9. സത്യത്തിന് പൂമണമില്ല
മിസ്രഗന്ധമുള്ള സർപ്പത്തിന്റെ ഒരുടലാണ്
അത് ചുമന്നു നടക്കുന്നത്.
സദാചാരജീവിതത്തിൽ
ഭയത്തിന്റെയും വിശപ്പുകളുടെയും
തൊട്ടാപ്പൊട്ടലുകൾകൊണ്ട്
മനുഷ്യനെയത് മേയ്ച്ചുനടക്കുന്നു.
**
10. അവനവനെ
എത്ര പുതുക്കിയാലും
പഴയൊരു നമ്മൾ
ഉള്ളിന്റെയുള്ളിൽ
ഒളിച്ചു പാർക്കുകതന്നെ ചെയ്യും.
**
11. നിന്നെ പുകഴ്ത്തിക്കൊണ്ടിരിക്കുന്നവൻ
നിന്നെ ദുർബലനാക്കുകകൂടിയാണ് ചെയ്യുന്നത്.
അതിന്റെ കടിഞ്ഞാണിൽ പായുന്ന
കണ്ണുകെട്ടിയ കുതിരയാവാതിരിക്കുക എന്നതാണ്
നമുക്ക് നമ്മോടു ചെയ്യാവുന്ന ഒരു നീതി.
**
12. നമ്മെ നയിക്കുന്നത് ഏറെയും അശാന്തികളാണ്
താളംതെറ്റിയ കാറ്റ്പോലെ
അത് ഒരുവന്റെ പകലുകളേയും രാത്രികളെയും
തലകീഴായവ മറിച്ച് കളയുന്നു.
**
13. നമ്മുടെയുള്ളിൽപ്പെട്ടുപോയ ഏകാന്തതയോടും
നിശ്ശബ്ദതയോടും മത്സരിക്കരുത്
മരിച്ചവരായിരിക്കുക എന്നത് ജീവിച്ചിരിക്കുന്നതിനെക്കാൾ എളുപ്പമാണെന്ന പ്രലോഭനത്തെ
അതിജീവിക്കുകതന്നെ വേണം.
**
14. ഏറെ ഒന്നുമിെല്ലന്ന,
ജീവിതത്തെ ജയിക്കുവാൻ അതിനോടുതന്നെ യുദ്ധംചെയ്യേണ്ടിയിരിക്കുന്നു.
കൂടുതൽ ദൈവമാകാനുള്ള ഒരവസരം
ആരാണ് വേണ്ടെന്ന് വെക്കുക!
