കൊടും ചൂടുള്ള ദിവസങ്ങ​ളുടെ എണ്ണം കൂടുന്നു; ആരോഗ്യത്തിന്​ ഭീഷണി, ഞെട്ടിക്കുന്ന കണ്ടെത്തൽ പുറത്ത്​

വാഷിങ്​ടൺ: ലോകത്ത്​ കൊടും ചൂടുള്ള ദിവസങ്ങളുടെ എണ്ണം കൂടുന്നുവെന്ന്​ കണ്ടെത്തൽ. ഇത്​ മനുഷ്യരുടെ ആരോഗ്യത്തിന്​ കടുത്ത ഭീഷണിയുയർത്തുമെന്നാണ്​ ശാസ്​ത്രജ്ഞർ നൽകുന്ന മുന്നറിയിപ്പ്​. 1980 മുതൽ 2009 വരെയുള്ള കാലയളവിൽ 50 ഡിഗ്രിക്ക്​ മേൽ താപനില രേഖപ്പെടുത്തിയ ദിനങ്ങളുടെ എണ്ണം 14 ആയിരുന്നു. 2010 മുതൽ 2019 വരെയുള്ള കാലയളവിൽ ഇത്​ 26 ദിവസമായി വർധിച്ചു.

ഫോസിൽ ഇന്ധനങ്ങളുടെ അമിതോപയോഗം മൂലം കടുത്ത ചൂട്​ അനുഭവപ്പെടുന്ന ദിവസങ്ങളുടെ എണ്ണം ഇരട്ടിയായി വർധിച്ചുവെന്ന്​ ഓക്​സ്​ഫെഡ്​ യൂനിവേഴ്​സിറ്റിയിലെ പാരിസ്ഥിതിക വ്യതിയാന സ്ഥാപന മേധാവി ഫെഡ്രിക്​ ഒ​ട്ടോ പറഞ്ഞു. ഉയർന്ന താപനില മനുഷ്യർക്കും പ്രകൃതിക്കും കെട്ടിടങ്ങൾക്കും റോഡുകൾക്കും ഭീഷണിയാണ്​. മിഡിൽ ഇൗസ്റ്റ്​, ഗൾഫ്​ രാജ്യങ്ങളിലെ താപനിലയാണ്​ പലപ്പോഴും 50 ഡിഗ്രി കടക്കുന്നുണ്ട്​.

ഇറ്റലിയിൽ 48.8 ഡിഗ്രിയും കാനഡയിൽ 49.6 ഡിഗ്രിയും താപനില രേഖപ്പെടുത്തിയിരുന്നു. ഇത്​ വൈകാത 50 ഡിഗ്രി കടക്കുമെന്നും ശാസ്​ത്രജ്ഞർ വ്യക്​തമാക്കുന്നു. ഫോസിൽ ഇന്ധനങ്ങളുടെ ഉപയോഗം കുറച്ചില്ലെങ്കിൽ പല സ്ഥലങ്ങളിലും താപനില 50 ഡിഗ്രി കടക്കുമെന്നാണ്​ ശാസ്​ത്രജ്ഞരുടെ മുന്നറിയിപ്പ്​. ഇക്കാര്യത്തിൽ ഉടൻ നടപടിയുണ്ടാകണം. മലിനീകരണം കുറക്കുകയാണ്​ പ്രതിസന്ധി മറികടക്കാനുള്ള ഏക പോംവഴിയെന്ന്​ ഓക്​സ്​ഫെഡ്​ യൂനിവേഴ്​സിറ്റി ഗവേഷകൻ ഡോ.സിഹാൻ ലി പറഞ്ഞു.

കഴിഞ്ഞ പതിറ്റാണ്ടിനിടെ ഉയർന്ന താപനിലയിൽ അര ഡിഗ്രിയുടെ വർധനയുണ്ടായിട്ടുണ്ട്​. എന്നാൽ ലോകത്തിലെ എല്ലാ സ്ഥലത്തും ഈ രീതിയിലല്ല വർധന. ആഫ്രിക്കയിലും ബ്രസീലിലും പരമാവധി താപനിലയിൽ ഒരു ഡിഗ്രിയുടെ വർധനയുണ്ടായി. ആർട്ടിക്കിലും മിഡിൽ ഈസ്റ്റിലും വർധന രണ്ട്​ ഡിഗ്രിയാണ്​.