മഹോദയപുരത്തെ ചേരന്മാരുടെ വംശാവലി: ഒരു പുനരാലോചന
എം.ജി.എസ്. നാരായണൻ ഉൾെപ്പടെയുള്ളവർ രേഖപ്പെടുത്തിയ ചേരന്മാരുടെ വംശാവലി കൃത്യമായിരുന്നോ? കാലഗണനയിൽ പിഴവ് സംഭവിച്ചുവോ? മധ്യകാല കേരളചരിത്രത്തിലെ മഹോദയപുരത്തെ ചേരന്മാരുടെ വംശാവലിയെ സംബന്ധിച്ച് നിലനിൽക്കുന്ന അറിവുകളെ പുനർ നിർവചിക്കുന്ന ചില ലിഖിതങ്ങൾ പഠനത്തിന് വിധേയമാക്കി കൃത്യമായ വംശാവലി അവതരിപ്പിക്കുകയാണ് ഗവേഷകനായ ലേഖകൻ. കേരള ചരിത്രത്തിന് ഒരു തിരുത്തുകൂടിയാണിത്. ചരിത്രത്തിന്റെ സുപ്രധാന ഉപാദാനങ്ങൾ എന്ന...
എം.ജി.എസ്. നാരായണൻ ഉൾെപ്പടെയുള്ളവർ രേഖപ്പെടുത്തിയ ചേരന്മാരുടെ വംശാവലി കൃത്യമായിരുന്നോ? കാലഗണനയിൽ പിഴവ് സംഭവിച്ചുവോ? മധ്യകാല കേരളചരിത്രത്തിലെ മഹോദയപുരത്തെ ചേരന്മാരുടെ വംശാവലിയെ സംബന്ധിച്ച് നിലനിൽക്കുന്ന അറിവുകളെ പുനർ നിർവചിക്കുന്ന ചില ലിഖിതങ്ങൾ പഠനത്തിന് വിധേയമാക്കി കൃത്യമായ വംശാവലി അവതരിപ്പിക്കുകയാണ് ഗവേഷകനായ ലേഖകൻ. കേരള ചരിത്രത്തിന് ഒരു തിരുത്തുകൂടിയാണിത്.
ചരിത്രത്തിന്റെ സുപ്രധാന ഉപാദാനങ്ങൾ എന്ന നിലക്ക് ലിഖിതങ്ങൾക്കും അവയുടെ വ്യാഖ്യാനങ്ങൾക്കും വളരെ പ്രാധാന്യമുണ്ട്. ആരംഭകാലത്തെ ചരിത്രകാരന്മാരൊക്കെ തന്നെ രാജവംശങ്ങളുടെ ലിഖിതങ്ങൾ പഠിക്കുമ്പോൾ രാജാക്കന്മാരുടെ വംശാവലി പുനർസൃഷ്ടിക്കുന്നതിനാണ് ആദ്യ പരിശ്രമം നടത്തിയിരുന്നത്. മഹോദയപുരത്തെ ചേരന്മാരെ സംബന്ധിച്ചും ഇത് അപ്രകാരംതന്നെ ആയിരുന്നു. നാളിതുവരെ നാല് പണ്ഡിതന്മാരെങ്കിലും ലിഖിതങ്ങളെയും സാഹിത്യത്തെയും അടിസ്ഥാനമാക്കി ചേരന്മാരുടെ വംശാവലി ഉണ്ടാക്കിയിട്ടുണ്ട്.
ഇവയിൽ മെച്ചപ്പെട്ടതും യുക്തിഭദ്രവുമായത് രണ്ടെണ്ണമാണ്. ചിലപ്പോഴെങ്കിലും പുതുതായി ലഭിക്കുന്ന ഒരു ലിഖിതമോ, നേരത്തേ അറിവിലുള്ള ലിഖിതങ്ങളുടെ വ്യത്യസ്തമായ വ്യാഖ്യാനമോ നിലവിലുള്ള ധാരണകളെ തിരുത്തുന്നതായി മാറിയിട്ടുണ്ട്. അപ്രകാരം, മധ്യകാല കേരളചരിത്രത്തിലെ മഹോദയപുരത്തെ ചേരന്മാരുടെ വംശാവലിയെ സംബന്ധിച്ച് നിലനിൽക്കുന്ന അറിവുകളെ പുനർനിർവചിക്കുന്ന ചില ലിഖിതങ്ങൾ പഠനത്തിന് വിധേയമാക്കുകയാണ് ഈ ലേഖനത്തിന്റെ ലക്ഷ്യം.
ഇരുപതാം നൂറ്റാണ്ടിന്റെ ആദ്യപാദം വരെ കേരളത്തിന്റെ പൂർവ മധ്യകാല ചരിത്രം (Early Medieval History) കേരളോൽപത്തിയും കേരള മാഹാത്മ്യവും പറഞ്ഞ കെട്ടുകഥളിൽ കുരുങ്ങിക്കിടക്കുകയായിരുന്നു. ഇതിനൊരു മാറ്റമുണ്ടായത് പൂർവ മധ്യകാല ലിഖിതങ്ങളുടെയും സാഹിത്യങ്ങളുടെയും പ്രസിദ്ധീകരണം ഉണ്ടായതോടുകൂടിയാണ്. തിരുവിതാംകൂറിൽനിന്നും പ്രസിദ്ധീകരിക്കപ്പെട്ട ട്രാവൻകൂർ ആർക്കിയളോജിക്കൽ സീരീസ് (TAS, 1908-1941) ആണ് കേരളത്തിലെ പൂർവ മധ്യകാല ചരിത്രത്തിലേക്ക് കൃത്യമായ വെളിച്ചം വീശുന്ന തരത്തിൽ അക്കാലത്തെ ലിഖിതങ്ങൾ പ്രസിദ്ധീകരിക്കുന്നതിൽ മുന്നിൽനിന്നത്.
ഏകദേശം ഇക്കാലത്തുതന്നെ കൊച്ചിയിൽനിന്നും പ്രസിദ്ധീകരിച്ചിരുന്ന രാമവർമ റിസർച് ഇൻസ്റ്റിറ്റ്യൂട്ട് ബുള്ളറ്റിൻ (1930- 1948) കൊച്ചി പ്രദേശത്തുള്ള ചില ലിഖിതങ്ങളും വെളിച്ചത്തു കൊണ്ടുവന്നു. ചേരന്മാരുടെ സമകാലികരായ പല്ലവർ, ചോഴർ എന്നീ വംശങ്ങളുടെ ചെപ്പേടുകൾ കൃത്യമായി അവരുടെ വംശാവലി വിവരിച്ചിരുന്നു. പക്ഷേ, ചേര കാലത്തെ ലിഖിതങ്ങൾ ഭരിക്കുന്ന രാജാവിന്റെ ഭരണവർഷം പറഞ്ഞുകൊണ്ട് നേരിട്ട് ലിഖിതത്തിന്റെ വിവരങ്ങൾ ആരംഭിക്കുകയാണ് ചെയ്തിരുന്നത്. അതിനാൽതന്നെ ചേര രാജാക്കന്മാരുടെ വംശാവലി തയാറാക്കുക എളുപ്പവും അല്ലായിരുന്നു.
പൂർവ മധ്യകാല കേരള ചരിത്രത്തെ ബാധിക്കുന്നത് എന്ന് ഇരുപതാം നൂറ്റാണ്ടിലെ ചരിത്രകാരന്മാർ കരുതിയിരുന്ന തമിഴ് ശൈവ-വൈഷ്ണവ ഭക്തി കവനങ്ങൾ ആയിരുന്ന പന്ത്രണ്ട് തിരുമുറകളും നാലായിരം ദിവ്യ പ്രബന്ധങ്ങളും പത്തൊമ്പതാം നൂറ്റാണ്ടിന്റെ രണ്ടാം പകുതി മുതൽക്ക് അറുമുഖ നാവലരുടെയും (1822-1879) മറ്റും ശ്രമഫലമായി തമിഴ്നാട്ടിലും ശ്രീലങ്കയിലുമായി പ്രസിദ്ധീകരിക്കപ്പെട്ടിരുന്നു. മഹോദയപുര പരമേശ്വരനായ ഒരു കുലശേഖരന്റേതെന്ന് അറിയപ്പെട്ടിരുന്ന ‘സുഭദ്രാധനഞ്ജയം’, ‘തപതീ സംവരണം’ എന്നീ രണ്ടു സംസ്കൃത നാടകങ്ങൾ ഇരുപതാം നൂറ്റാണ്ടിന്റെ ആദ്യത്തിൽ തിരുവനന്തപുരം മാനുസ്ക്രിപ്റ്റ് ലൈബ്രറിയിൽനിന്നും പ്രസിദ്ധീകരിച്ചു.
ലഭ്യമായ തെളിവ് സാമഗ്രികൾ ഉപയോഗിച്ചുകൊണ്ട് മഹോദയപുരത്തെ ചേര രാജാക്കന്മാരുടെ ഒമ്പത് രാജാക്കന്മാർ അടങ്ങുന്ന ഒരു വംശാവലി ആദ്യമായി നിർമിച്ചത് എ.എസ്. രാമനാഥ അയ്യർ ആണ്.1 ആറു പേരുള്ള മറ്റൊരു പട്ടിക രാമവർമ റിസർച് ഇൻസ്റ്റിറ്റ്യൂട്ട് ബുള്ളറ്റിന്റെ ഏഴാം വാല്യത്തിൽ വി.കെ. ആർ. മേനോനും പ്രസിദ്ധീകരിക്കുക ഉണ്ടായി.2 ഈ രണ്ടു പട്ടികകളും അന്നുവരെ ലഭിച്ച ലിഖിതങ്ങളിൽനിന്നും അറിയാമായിരുന്ന രാജശേഖരൻ, സ്ഥാണു രവി, ഇന്ദുകോത, ഭാസ്കര രവി എന്നിവരെയും തമിഴ് ഭക്തി സാഹിത്യത്തിൽ പരാമർശിക്കപ്പെട്ടിരുന്ന കുലശേഖര ആഴ്വാറെയും സംസ്കൃത നാടകങ്ങൾ എഴുതിയ കുലശേഖരനെയും ഉൾപ്പെടുത്തിയിരുന്നു.
കൂടുതൽ മെച്ചപ്പെട്ട ഒരു വംശാവലി പ്രഫ. ഇളംകുളം കുഞ്ഞൻപിള്ള (1904-1973) ആണ് തയാറാക്കിയത്. പരിശീലനം ലഭിച്ച ചരിത്രകാരൻ ആയിരുന്നിെല്ലങ്കിലും മേൽപറഞ്ഞ മുൻഗാമികളെ ആപേക്ഷിച്ച് പലനിലക്കും സമർഥനായിരുന്നു ഇളംകുളം. കേരളത്തിലെ പുരാ ലിപികളിലും സംസ്കൃതം, തമിഴ്, പ്രാചീന മലയാളം എന്നീ ഭാഷകളിലും ജ്യോതിഷത്തിലും പണ്ഡിതനായിരുന്നു അദ്ദേഹം.
ചേരകാലത്തെ ലഭ്യമായ ലിഖിതങ്ങളിൽ മൂന്നെണ്ണം മാത്രമേ അതെഴുതിയ കൊല്ലവർഷം സൂചിപ്പിക്കുന്നുള്ളൂ. അവയിൽ ചിലത് കലിദിനം സൂചിപ്പിക്കുന്നവയും ഉണ്ട്. മിക്കവയും ഭരിക്കുന്ന രാജാവിന്റെ അപ്പോഴത്തെ ഭരണവർഷത്തിലാണ് രേഖപ്പെടുത്തിയിരുന്നത്. രാജാവിന്റെ ഭരണവർഷം സൂചിപ്പിച്ചുകൊണ്ട് എഴുതുന്ന ലിഖിതങ്ങളിൽ അതോടൊപ്പം വ്യാഴ (Jupiter)ത്തിന്റെയും സൂര്യന്റെയും അപ്പോഴത്തെ നിലയും പരാമർശിച്ചിരുന്നു. അതുകൊണ്ടുതന്നെ ചരിത്രകാരന്മാർ മാത്രമല്ല ചരിത്രാന്വേഷികളും ജ്യോതിഷ വിജ്ഞാനത്തിന്റെ അടിസ്ഥാനപരമായ കാര്യങ്ങൾ ഗ്രഹിച്ചിരിക്കേണ്ടത് ലിഖിതങ്ങളെ കുറിച്ചുള്ള ചർച്ചയിൽ അത്യാവശ്യമാണ്.
ഭൂമിയെ കേന്ദ്രമാക്കി മനസ്സിലാക്കിക്കൊണ്ടുള്ള പുരാതന ജ്യോതിശാസ്ത്രം, സൂര്യൻ, ചന്ദ്രൻ, ബുധൻ, ശുക്രൻ, ചൊവ്വ, വ്യാഴം എന്നീ ജ്യോതിർഗോളങ്ങളെ ഗ്രഹങ്ങളായാണ് പരിഗണിച്ചിരുന്നത്. ഈ ഗ്രഹങ്ങൾ ഭൂമിയെ ചുറ്റുന്നത് 360 ഡിഗ്രിയുള്ള വൃത്താകാരമായ ഭ്രമണപഥത്തിലാണെന്നു സങ്കൽപിച്ച്, ഈ ഭ്രമണ പഥത്തെ 30 ഡിഗ്രി വീതമുള്ള 12 രാശികളായി വിഭജിച്ചിരുന്നു. 4333 ദിവസങ്ങൾകൊണ്ട് സ്വന്തം ഭ്രമണപഥത്തിൽ ഒരു പരിക്രമണം പൂർത്തിയാക്കുന്ന വ്യാഴം ഏകദേശം ഒരു വർഷം (4333/12 =361 ദിവസം) ഓരോ രാശിയിലൂടെയും സഞ്ചരിക്കുന്നതായും പുരാതന ജ്യോതിഷം സങ്കൽപിക്കുന്നു. വ്യാഴത്തിന്റെ ചലനത്തിലുള്ള ഈ കൃത്യതയാണ് രാജാക്കന്മാരുടെ ഭരണ വർഷത്തോടൊപ്പം വ്യാഴത്തിന്റെ നിലകൂടി ലിഖിതങ്ങളിൽ രേഖപ്പെടുത്തുന്നതിന് കാരണമായത്.
ജ്യോതിഷത്തിൽ പ്രാവീണ്യമുണ്ടായിരുന്ന ഇളംകുളം, ഭാസ്കര രവി ഒഴികെയുള്ള രാജാക്കന്മാരുടെ ലിഖിതങ്ങളിൽ വ്യാഴത്തിന്റെ ചലനം ഭരണവർഷങ്ങളോട് ഒത്തുപോകുന്നു എന്നുള്ളതും, ഭാസ്കര രവിയുടെ ലിഖിതങ്ങളിൽ വ്യാഴത്തിന്റെ ചലനത്തിലുള്ള ഈ കൃത്യത പാലിക്കപ്പെടുന്നില്ല എന്നുള്ളതും ശ്രദ്ധിച്ചു. ഭാസ്കര രവിയുടെ ലിഖിതങ്ങളിൽ പതിമൂന്നാം ഭരണവർഷം എന്ന് രേഖപ്പെടുത്തിയിട്ടുള്ള മൂന്നു ലിഖിതങ്ങളിൽ വ്യാഴം മൂന്നു വ്യത്യസ്ത രാശികളിൽ നിൽക്കുന്നതായി പരാമർശിച്ചിരുന്നതിനാൽ മൂന്നു ഭാസ്കര രവിമാർ ചേര രാജാക്കന്മാരിൽ ഉണ്ടായിരുന്നിരിക്കണമെന്ന് ഇളംകുളം വാദിച്ചു. ഇവരിൽ ഭാസ്കര രവി ഒന്നാമനും ഭാസ്കര രവി രണ്ടാമനും സമകാലികരായിരുന്നിരിക്കാമെന്നും അദ്ദേഹം അഭ്യൂഹിക്കുന്നു. അതിന്റെ കാരണം പിറകെ ചർച്ചചെയ്യാം.
ഇളംകുളം തയാറാക്കിയ ചേര രാജാക്കന്മാരുടെ വംശാവലി പട്ടിക താഴെ കൊടുക്കുന്നു:3
1 കുലശേഖര വർമ 800-820
2 രാജശേഖരൻ 820-844
3 സ്ഥാണു രവിവർമ 844-885
4 രാമവർമ 885-917
5 കോത രവിവർമ 917-947
6 ഇന്ദു കോത വർമ 944-962
7 ഭാസ്കര രവിവർമ I 962-1019
8 ഭാസ്കര രവിവർമ II 979-1021
9 വീരകേരളൻ 1021-1028
10 രാജസിംഹൻ 1028-1043
11 ഭാസ്കര രവി III 1043-1082
12 രവിരാമ വർമ 1082-1090
13 രാമവർമ
കുലശേഖരൻ 1090-1102
മുകളിൽ കൊടുത്തിട്ടുള്ള പൂർവ മധ്യകാലത്തെ ചേര രാജാക്കന്മാരിൽ, സ്ഥാണു രവിയുടെ കാലം ഇളംകുളം നിർണയിച്ചത് സ്ഥാണു രവിയുടെ സമകാലികനായ ശങ്കരനാരായണൻ എഴുതിയ ലഘുഭാസ്കരീയ വ്യാഖ്യാ എന്ന ജ്യോതിഷ കൃതിയിലെ സൂചനകളെ അടിസ്ഥാനപ്പെടുത്തിയായിരുന്നു. ഇപ്പോഴത്തെ തൃശൂർ ജില്ലയിലെ നെടുംപുറം തളി ക്ഷേത്രത്തിൽ ഉള്ള കോത രവിയുടെ 17ാം ഭരണവർഷത്തിലുള്ള ഒരു ലിഖിതത്തിന്റെ അടിസ്ഥാനത്തിലാണ് ഇളംകുളം കോത രവിയുടെ കാലം നിർണയിച്ചത്.
വ്യാഴം മിഥുനത്തിൽ നിൽക്കുന്നതായി പറയുന്ന ആ ലിഖിതം അവസാനിക്കുന്നത് ‘കലിയുഗം നാലായിരത്തി മുപ്പത’ എന്ന വാചകത്തോടെയായിരുന്നു. കലിവർഷം 4035ൽ മാത്രമേ വ്യാഴം മിഥുനരാശിയിൽ പ്രവേശിക്കുകയുള്ളൂ എന്നുള്ളതിനാൽ ലിഖിതത്തിന്റെ അവസാനത്തെ ചില അക്ഷരങ്ങൾ നഷ്ടപ്പെട്ടിരിക്കാനാണ് സാധ്യതയെന്ന് ഇളംകുളം കണക്കുകൂട്ടി. മറ്റു ലിഖിതങ്ങളിൽനിന്നും കോത രവി മുപ്പതു വർഷം ഭരിച്ചിട്ടുള്ളതായി അറിയാമായിരുന്നതിനാൽ പൊതുവർഷം 917 മുതൽ 947 വരെ കോത രവി ഭരിച്ചിരുന്നിരിക്കാം എന്നും ഇളംകുളം ഊഹിച്ചു.
ഇളംകുളം തയാറാക്കിയ ചേരവംശാവലിയിലെ മറ്റു രാജാക്കന്മാരിൽ ഏകദേശം കൃത്യമായി ഭരണകാലം അറിയാവുന്ന ഒരു രാജാവ് അവസാനത്തെ ചേര രാജാവ് എന്ന് കരുതപ്പെടുന്ന രാമവർമയും മറ്റൊരാൾ ഭാസ്കര രവിയും ആയിരുന്നു. രാമവർമയുടെ പേര് പറയുന്ന കൊല്ലം രാമേശ്വരം ലിഖിതം കൊല്ലവർഷം 278ൽ (C.E. 1103) ആണ് എഴുതിയിരുന്നത്. വേണാട് നാടുവാഴിയായ ശ്രീവല്ലഭൻ കോതയുടെ കൊല്ലവർഷം 149 (C.E. 974)ൽ എഴുതപ്പെട്ട മാമ്പിള്ളി ചെപ്പേട് ആണ് ഭാസ്കര രവിയുടെ കാലം നിർണയിക്കുന്നതിന് ഇളംകുളത്തെ സഹായിച്ചത്. ഭാസ്കര രവിയും ശ്രീവല്ലഭൻ കോതയും സമകാലികരാണെന്നു തൃക്കൊടിത്താനത്തുനിന്നുള്ള ഒരു ലിഖിതത്തിൽനിന്നും അറിയാമായിരുന്നു. ഈയടുത്ത് ഇളംകുന്നപ്പുഴ സുബ്രഹ്മണ്യ സ്വാമി ക്ഷേത്രത്തിൽനിന്നും ഈ ലേഖകൻ കണ്ടെടുത്തു പ്രസിദ്ധീകരിച്ച ലിഖിതവും ഇക്കാര്യം ശരിവെക്കുന്നതാണ്.4 മറ്റുള്ള രാജാക്കന്മാരുടെ എല്ലാം കാലനിർണയം കേവലം അഭ്യൂഹത്തിന്റെ അടിസ്ഥാനത്തിലായിരുന്നു.
മധ്യകാല ചേര വംശാവലിയുമായി ബന്ധപ്പെട്ട അടുത്ത പ്രധാനപ്പെട്ട സംഭാവന ഉണ്ടായത് ഇളംകുളത്തിന്റെ ശിഷ്യനായ എം.ജി.എസ് നാരായണനിൽ (1932-2025) നിന്നുമായിരുന്നു. അദ്ദേഹം തന്റെ തീസീസ് (Kerala University, 1972) പിൽക്കാലത്ത് പുസ്തകരൂപത്തിലാക്കിയപ്പോൾ (Perumals of Kerala, 1996) സമർപ്പിച്ചത് ഇളംകുളത്തിനായിരുന്നു. ഇളംകുളം ഉപയോഗിച്ച ലിഖിതങ്ങൾക്കു പുറമെ മലബാർ പ്രദേശത്തെ ചില ലിഖിതങ്ങൾ കൂടി എം.ജി.എസ് തന്റെ പഠനത്തിൽ ഉൾപ്പെടുത്തി. ഇതിൽ ഭൂരിഭാഗവും അദ്ദേഹം കണ്ടെത്തി വായിച്ചവയായിരുന്നു.
ഈ ലിഖിതങ്ങൾക്ക് ഒപ്പം തമിഴ്നാട്ടിൽ ചോള കാലത്തുണ്ടായ ചില ലിഖിതങ്ങൾകൂടി പരിശോധിച്ചതിൽനിന്നും അതുവരെ അറിയപ്പെടാതിരുന്ന ചില രാജാക്കന്മാരുടെ പേരുകൾകൂടി അദ്ദേഹത്തിന് മനസ്സിലാക്കാൻ കഴിഞ്ഞു. കോത കോത, ആദിത്യൻ കോത, രാജ രാജൻ എന്നീ മൂന്നു രാജാക്കൻമാരെ കണ്ടെത്തി ചേര വംശാവലിയിൽ ചേർത്തത് കൂടാതെ, അവസാനത്തെ ചേര രാജാവ് എന്ന് കരുതപ്പെടുന്ന രാമവർമ കുലശേഖരൻ ഇരുപതു വർഷംകൂടി ഭരണത്തിൽ തുടർന്നിരിക്കാം എന്ന് തമിഴ്നാട്ടിലെ തിരുവാലഞ്ചുഴി ലിഖിതത്തെ അടിസ്ഥാനമാക്കി അദ്ദേഹം വാദിച്ചു.5
ഇളംകുളത്തിന്റെ പല വാദങ്ങളെയും എം.ജി.എസ് തള്ളിക്കളഞ്ഞു. നെടുംപുറം തളിയിലെ കോത രവിയുടെ ലിഖിതത്തിലെ അക്ഷരങ്ങൾ നഷ്ടപ്പെട്ടിട്ടില്ല എന്നും അത് നാലായിരത്തു മുപ്പത് അല്ല നാലായിരത്തുമൊപ്പത് (നാലായിരത്തിനു ഒപ്പം അഥവാ നാലായിരം) ആണെന്നും എം.ജി.എസ്. വ്യാഖ്യാനിച്ചു. അപ്രകാരം കോത രവിയുടെ കാലം C.E. 917-947 എന്ന് ഇളംകുളം കണക്കു കൂട്ടിയതിനേക്കാൾ മൂന്നു വ്യാഴവട്ടങ്ങളോളം പിൻപോട്ട് കോത രവിയുടെ കാലം മാറ്റി C.E. 883-913 എന്ന് എം.ജി.എസ്. നിർണയിച്ചു.
ഭാസ്കര രവി എന്ന പേരിൽ മൂന്നു രാജാക്കന്മാരില്ലെന്നും ഒരാൾ മാത്രമേ ഉള്ളൂ എന്നും ആയിരുന്നു എം.ജി.എസിന്റെ മറ്റൊരു വാദം. ഭരണവർഷം ‘പതിനാറാമാണ്ട’ എന്നതിന് പകരം ‘പതിനോരാമാണ്ട’ എന്ന് തെറ്റായി വായിച്ചതാണ് വ്യാഴത്തിന്റെ നില കണക്കാക്കിയതിൽ പിഴവ് വരാനുള്ള കാരണം എന്നാണ് എം.ജി.എസ് കണ്ടെത്തിയത്. നീണ്ട അമ്പത്തെട്ടു വർഷങ്ങൾ ഭരിച്ച ഭാസ്കര രവി ബാല്യകാലത്ത് രാജാധികാരത്തിൽ എത്തിയിരിക്കും എന്നും ഒരുകൂട്ടം ലിഖിതങ്ങളിലെ വർഷങ്ങൾ അന്ന് മുതൽ ഭരണവർഷം എണ്ണിയവ ആയിരിക്കാം എന്നും പ്രായപൂർത്തിയായ സമയം വീണ്ടും പുതിയതായി ഭരണവർഷം എണ്ണി ഒരു കൂട്ടം ലിഖിതങ്ങൾ എഴുതിയിരിക്കാം എന്നും എം.ജി.എസ് കരുതി. ഫലത്തിൽ എം.ജി.എസിന്റെ വംശാവലി പട്ടികയിൽ ഒരു ഭാസ്കര രവി മാത്രമായി ചുരുങ്ങി.
എം.ജി.എസ് ഉണ്ടാക്കിയ ചേര പെരുമാക്കന്മാരുടെ പട്ടിക താഴെ കൊടുക്കുന്നു.6
1 രാമ രാജശേഖരൻ 800-844
2 സ്ഥാണു രവി
കുലശേഖരൻ 844-883
3 കോത രവി
വിജയരാഗൻ 883-913
4 കോത കോത
കേരള കേസരി 913-943
5 ഇന്ദു കോത 943-962
6 ഭാസ്കര രവി
മനുകു ലാദിത്യൻ 962-1021
7 രവി കോത
രാജസിംഹൻ 1021-1036
8 രാജരാജൻ 1036-….
9 രവിരാമ
രാജാദിത്യൻ …-…
10 ആദിത്യൻ കോത
രണാദിത്യൻ …-1089
11 രാമകുലശേഖരൻ 1089-1122
എം.ജി.എസിന്റെ പഠനങ്ങൾക്കുശേഷവും പ്രധാനപ്പെട്ട പല ലിഖിതങ്ങളും വെളിച്ചം കണ്ടിട്ടുണ്ട്. 2011ൽ മലപ്പുറം ജില്ലയിലെ അരീക്കോട് ഉള്ള കുറുമത്തുർ വിഷ്ണുക്ഷേത്രത്തിൽനിന്നും ക്ഷേത്ര പുനരുദ്ധാരണ സമയത്ത് കണ്ടെടുത്ത ഒരു സംസ്കൃത ലിഖിതം എം.ആർ. രാഘവവാര്യർ പ്രസിദ്ധീകരിക്കുക ഉണ്ടായി. പല്ലവഗ്രന്ഥ ലിപിയിലുള്ള ആ ലിഖിതം ശാർദൂലവിക്രീഡിതം വൃത്തത്തിൽ മൂന്നു ശ്ലോകങ്ങൾ അടങ്ങിയതാണ് (ഒരു വരിയിൽ 19 അക്ഷരം). ആറു വരികളിലായി എഴുതിയിട്ടുള്ള പ്രസ്തുത ലിഖിതം രാമ രാജശേഖരന്റെ പ്രശസ്തിയാണ് രേഖപ്പെടുത്തിയിരിക്കുന്നത്. രാമ രാജശേഖരന്റെ ഭരണകാലത്ത് നടന്ന ക്ഷേത്ര പ്രതിഷ്ഠയെപ്പറ്റി വിവരിക്കുന്ന ആ ലിഖിതം രാമരാജശേഖരനെ നേതാവായി കിട്ടിയ കലിദിനവും ക്ഷേത്ര പ്രതിഷ്ഠ നടത്തിയ കലിദിനവും പറയുന്നുണ്ട്. എം.ആർ. രാഘവ വാരിയർ വായിച്ച ലിഖിതപാഠവും തർജമയും തുടർന്ന് ഈ ലേഖകന്റെ തർജമയും താഴെ കൊടുക്കുന്നു.
1. ശ്രീമാനസ്തി ചതുസ്സമുദ്ര പരിഖാ രേഖാലസന്മേഖലാ
മുർവ്വീ പർവ്വത പീവര സ്തന തടീന്ദോസ്തസ്യ കാമാഹൃതഃ
രാജാ രാമ ഇവാപരോ ജലനിധേ പാരം ഗതസ്തേജസാ
രാജ്യം മൂർദ്ധനി രാജശേഖര ഇതി സ്ഥിത്യാ പ്രസിദ്ധിം ഗതഃ.
2. ധർമോ യന്മനുനാ വ്യധീയത പുരാ നിക്ഷേപവത് രക്ഷിതഃ
ക്ഷോണീ ഭർതൃഭിരസ്യ വംശതിലകൈരിക്ഷ്വാകു രാമാദിഭിഃ
സപ്രത്യേക പദസ്ഥിത സ്തനുതയായുക്ത സ്വകാലെ കലൗ
നേതാരം യമവാപ്യ നിർവൃതിമഗാത്തപ്ത്വേവ ഘോരന്തപ:
3. തസ്മിൻ രാജനി രക്ഷതി ക്ഷിതിമിമാമക്ഷുണ്ണ വർണാശ്രമാം
കാലേ യെ ദിനമണ്ഡലേ സുഭൃദുദ ശൃംഭിഷ്ട സംഖ്യാം ഗതേ
ശ്രീമാനത്ര ചതുർഭുജോ ഭുജഗിരി പ്രക്രാന്ത വക്രസ്ഫുര
ദ്ധാരാ മഗ്ന മഹാസരസ്സുരഗണശ്രേഷ്ഠ പ്രതിഷ്ഠാപിതഃ
എം.ആർ. രാഘവവാര്യർ ഈ ലിഖിതം ഇംഗ്ലീഷിൽ തർജമ ചെയ്തിട്ടുള്ളത് താഴെ ചേർക്കുന്നു.
There hails at the crest of the kingdom his majesty the king who celebrated as Rajasekhara, has acquired fame on account of firm existence, embraces the earth girdled by the moat of the four seas and plump with the firm breasts that are mountains and who like another Rama has crossed the earth.
The dharma enjoined by Manu in the past was protected like a treasure by the auspicious marks on the forehead of his lineage such as Ikshvaku and Rama. He, staying firmly in each step and after acquiring (his) leader attained delight with ease after performing hard penance in the Kali age (This also gives the Kali chronogram 1451260) equal to the 24th May 871 CE).
While this king was protecting the earth with varnasramadharma unswerving, the four sides of the great pond (mahasars) that radiating and immersing in its flow the curved mountain (Bhujagiri sanskritised name of toponym Trikkaippatta) on the Kali day... (this portion of the inscription is slightly worm off). 7
ലിഖിതത്തിൽ ചില അക്ഷരങ്ങൾക്ക് പൊടിവ് ഉണ്ടെന്നു പറയുന്ന എം.ആർ. രാഘവവാര്യർ ലിഖിതത്തിന്റെ ഉദ്ദേശ്യം സമീപത്തുള്ള ഒരു തടാകത്തിന്റെ വശങ്ങൾ പടുത്തു കെട്ടിയ വിവരം രേഖപ്പെടുത്തുകയാണെന്നാണു പറയുന്നത്. എന്നാൽ, അത്തരത്തിൽ അർഥം കൽപിക്കാവുന്ന വരികൾ ലിഖിതത്തിൽ ഉള്ളതായി ഈ ലേഖകന് കാണുവാൻ സാധിച്ചില്ല. തികച്ചും വ്യത്യസ്തമായ അർഥം കാണുന്നുണ്ട് താനും. ശ്ലോകങ്ങൾക്ക് ഈ ലേഖകൻ നൽകുന്ന അർഥം താഴെ കൊടുക്കുന്നു.
നാലു സമുദ്രങ്ങളാകുന്ന കിടങ്ങുകളോട് കൂടിയതും, തടിച്ച സ്തനങ്ങളായ പർവതങ്ങൾ ഉള്ളതും നീണ്ട താഴ്വരയാകുന്ന അരഞ്ഞാണിനാൽ ശോഭിക്കുന്നതുമായ ഭൂമിയെ ഇഷ്ടാനുസരണം കൈവശത്തിലാക്കിയ, ശ്രീമാനായ, പടിഞ്ഞാറൻ കടലിന്നു രാമനായ, അതിനപ്പുറവും അചഞ്ചല തേജസ്സിനാൽ പ്രശസ്തനായ, ഉന്നതിയിൽ രാജ്യം ഭരിക്കുന്ന രാജശേഖരൻ എന്ന രാജാവുണ്ട്.
പണ്ട് മനു നിശ്ചയിച്ച ധർമം ഭൂമിപാലന്മാരായ ഇക്ഷ്വാകു, രാമൻ തുടങ്ങിയ, ഇവന്റെ വംശത്തിന്റെ തൊടുകുറികളായ പൂർവികർ, നിധിപോലെ രക്ഷിച്ചു. ഈ ഭൂമി, വിശേഷമായ പദവി ചേർന്ന ഇവനെ കലിയിൽ നേതാവായി ലഭിച്ചിട്ട് (നേതാരം യമവാപ്യ എന്നത് കലിദിനവുമാണ്) ഘോര തപസ്സിന്റെ ഫലം ലഭിച്ചിട്ടെന്നപോലെ നിർവൃതി പൂണ്ടു.
ഈ രാജാവ് വർണാശ്രമ ധർമങ്ങൾക്കു കോട്ടം തട്ടാതെ ഈ ഭൂമി രക്ഷിച്ചുകൊണ്ടിരിക്കെ സുഭൃദുദ ശൃംഭിഷ്ട എന്ന സംഖ്യയോളം കലിദിനങ്ങൾ ചെന്നപ്പോൾ ഇവിടെ, വളഞ്ഞു തെളിഞ്ഞൊഴുകി മഹാസരസ്സിൽ മൂഴ്കുന്ന അരുവി വലംവരുന്ന ഈ തൃക്കൈപ്പൊറ്റ (ഭുജഗിരി) എന്ന കുന്നിന്മേൽ ചതുർബാഹുവായ ശ്രീമാനെ (വിഷ്ണു) പ്രതിഷ്ഠിച്ചു.
മുകളിലത്തെ വിവരണത്തിൽനിന്നും ലിഖിതം തൃക്കൈപ്പൊറ്റ എന്ന കുന്നിന്മേൽ നടന്ന ചതുർബാഹുവായ വിഷ്ണുവിന്റെ പ്രതിഷ്ഠയാണെന്നു വ്യക്തമാണല്ലോ. ഈ ലിഖിതം ലഭിച്ച സമയത്തുതന്നെ ഇത് വായിച്ച എം.ആർ. രാഘവ വാര്യർ നേതാരം യമവാപ്യ എന്ന കലിദിനം നിർധാരണം ചെയ്തിരുന്നു. ലിഖിതത്തിന്റെ കാലം C.E. 871 മേയ് 24 ആണ് എന്നും, വാഴപ്പിള്ളി ചെപ്പേടിലൂടെ മുമ്പുതന്നെ നമുക്കറിയാമായിരുന്ന രാജശേഖരന്റെ കാലം, ഈ ലിഖിതത്തിലൂടെ സ്ഥാണു രവിക്കുശേഷമാണ് എന്നു തെളിയുന്നതായും എം.ആർ. രാഘവവാര്യർ അഭിപ്രായപ്പെടുകയും ഉണ്ടായി.
എന്നാൽ, ലിഖിതത്തിന്റെ വായന ശരിയാണെന്ന് സമ്മതിച്ച എം.ജി.എസ് ഇത് മറ്റൊരു രാമ രാജശേഖരൻ ആകാനുള്ള സാധ്യതയുമുണ്ട് എന്നാണ് അഭിപ്രായപ്പെട്ടത്. സ്ഥാണു രവിയുടെ 16ാം ഭരണവർഷത്തിന് (C.E. 861) ശേഷമുള്ള ലിഖിതങ്ങൾ ഒന്നും ലഭിച്ചിരുന്നില്ല എങ്കിലും കോത രവിയുടെ ഭരണം ആരംഭിക്കുന്നതായി കരുതിയിരുന്ന C.E. 883 വരെ സ്ഥാണു രവിയുടെ കാലമായാണ് എം.ജി.എസ് കണക്കാക്കിയിരുന്നത്. ഇവർ രണ്ടു പേരും ലിഖിതത്തിന്റെ രചനാകാലമായ രണ്ടാമത്തെ കലിദിനത്തെ സംബന്ധിച്ച് മൗനം പാലിക്കുകയാണ് ചെയ്തിട്ടുള്ളത്.
ഈ ലിഖിതത്തിൽ പറയുന്ന കലിദിനങ്ങൾക്ക് തുല്യമായ കൊല്ലവർഷവും പൊതുവർഷവും ഏതാണ് എന്ന് പരിശോധിക്കാം. കലിദിനത്തിൽനിന്നും കൊല്ലവർഷവും പൊതുവർഷവും കണ്ടു പിടിക്കുന്നതിനു പലരീതികളുണ്ട്. ഈ ലേഖകൻ ഉപയോഗിക്കുന്നത് പരമ്പരാഗതമായി ജ്യോതിഷികൾ പിന്തുടരുന്ന രീതിയാണ്. ഈ സൂത്രവാക്യം ഉപയോഗിച്ച് ഏതെങ്കിലും കൊല്ലവർഷത്തിലെ ഒരു ദിവസത്തെ കലിദിനം ഉണ്ടാക്കുവാനും, ഉണ്ടാക്കിയ കലിദിനത്തെ, സൂത്രവാക്യം വിപരീത ക്രമത്തിൽ ക്രിയചെയ്ത് കൊല്ലവർഷത്തിലെ ആ പ്രത്യേക ദിവസം നിർധാരണം ചെയ്തെടുക്കുവാനും സാധിക്കും എന്നുള്ളതാണ് ഗുണം.
എം.ജി.എസ്. നാരായണൻ
നേതാരം യമവാപ്യ എന്ന കലിദിനത്തിനു പരൽ പേര് /കടപയാദി അനുസരിച്ചു വില നൽകിയാൽ 0- 6 -2- 1- 5- 4- 1 ആകും. ഈ സംഖ്യ വിപരീത ദിശയിൽ എഴുതിയാൽ കലിദിനമായി. ഇതാണ് ക്രിയചെയ്യാൻ ഉപയോഗിക്കുന്നത്.
കലിദിന സംഖ്യയിൽനിന്നും കൊല്ലവർഷം കാണുന്നതിനുള്ള സൂത്രവാക്യം:
കൊല്ലവർഷം =(കലിദിനം-1434005 ) 31/11323
=(1451260-1434005)31/11323 =(17255X 31)/11323 = 534905/11323 = കൊ. വ. 47.2405723
ഈ സൂത്രവാക്യ പ്രകാരം കണക്കു കൂട്ടുമ്പോൾ വിഷുദിനത്തിനു (മേടം 1) പൂർണമായ വർഷങ്ങൾ ആണ് ലഭിക്കുന്നത്. ശിഷ്ടം വന്ന ദിനങ്ങൾ മാസങ്ങളായും ദിവസങ്ങളായും കണക്കു കൂട്ടുന്നു. കൊല്ല വർഷം 47ലെ വിഷുദിനത്തിന് പൂർത്തിയായ കലിദിനം കാണുവാൻ,
വിഷുദിന കലി = (( കൊല്ലവർഷം x 11323 )/31)+1434005
= (( 47X11323)/31)+1434005=
=(( 531182)/31)+1434005 =17167.13+1434005
=1451172.13 ( കൊ. വ. 47 മേടം 1 ലെ കലിദിനം)
കൊ.വ. 47 മേടം ഒന്നാം തീയതിയിലെ കലിദിനവും തന്നിരിക്കുന്ന കലിദിനവും ആയുള്ള വ്യത്യാസം = 1451260 -1451172.13= 87.87(88). മേട മാസത്തിലെ 31 ദിവസവും ഇടവമാസത്തിലെ 31 ദിവസവും മിഥുനത്തിലെ 26 ദിവസവും കൂട്ടിയാൽ 88 ആകും. കൊല്ലവർഷം 47 മിഥുനം 26, എന്നത് C.E. 872 ജൂൺ 17 ആണ് എന്ന് എൽ.ഡി. സ്വാമിക്കണ്ണു പിള്ളയുടെ ഇന്ത്യൻ എഫെമെരിസ് (പഞ്ചാംഗം) പറയുന്നു. 8
‘‘സുഭൃദുദ ശൃംഭിഷ്ട എന്ന കലിദിനത്തിനു കടപയാദി അനുസരിച്ചു വില നൽകിയാൽ 7- 4 – 8 - 8 - 5- 4- 1 എന്ന് ലഭിക്കും അത് തിരിച്ചിട്ടാൽ 1458847. ഈ സംഖ്യകൊണ്ട് ക്രിയചെയ്യുന്നു.
കൊല്ലവർഷം= (കലിദിനം-1434005)31/11323
= (1458847-1434005)31/11323 =(24842X 31)/11323 =770102/11323 = കൊ. വ. 68.012
ഈ ലിഖിതം കൊല്ലവർഷം 68 ലേതാണ് എന്ന് മനസ്സിലായി. അടുത്തതായി കൊല്ലവർഷം 68ലെ വിഷു ദിനത്തിന്റെ അന്നത്തെ കലിദിനം കണ്ടുപിടിക്കാം.
കൊല്ലം 68ലെ വിഷുദിന കലി അഥവാ കൊല്ലം 68 മേടം 1 ലെ കലി =
= (68X11323)/31+1434005=
=(769964)/31)+1434005 =1458843
ലിഖിതത്തിലെ കലിദിനവും കൊല്ലം 68ലെ വിഷുദിന കലിയും തമ്മിലുള്ള വ്യത്യാസം =1458847 -1458843= 4 ദിവസം ആകുന്നു, അഥവാ അന്നത്തെ തീയതി മേടം 5 ആകുന്നു. സ്വാമിക്കണ്ണു പിള്ളയുടെ ഇന്ത്യൻ എഫെമെരിസ് അനുസരിച്ച് കൊ.വ. 68 മേടം 5 തി എന്നത് C.E. 893 മാർച്ച് 26 ആണ്.9
ലിഖിതത്തിന്റെ കാലം സുഭൃദുദ ശൃംഭിഷ്ട എന്ന കലിദിനത്തിനു തുല്യമായ കൊ.വ. 68 (C.E. 893) ആണ് എന്ന് വ്യക്തമാണല്ലോ. അപ്പോൾ നടന്ന വിഷ്ണു പ്രതിഷ്ഠയാണ് പരാമർശം. എന്നാൽ, ലിഖിതം രാമരാജശേഖരൻ രാജാവായ കൊ.വ. 47 (C.E. 872) നെയും സൂചിപ്പിക്കുന്നുണ്ട്. നേരത്തേ അറിയുമായിരുന്ന രാമരാജശേഖരന്റെ പന്ത്രണ്ടാം ഭരണവർഷത്തിലുള്ള വാഴപ്പിള്ളി ചെപ്പേട് C.E. 884ലേതാണ് എന്നും ലിഖിതത്തിൽനിന്നും മനസ്സിലാക്കാം.
ചേരന്മാരുടെ വംശാവലിയിൽ രാമരാജശേഖരന്റെ സ്ഥാനം സ്ഥാണു രവിക്ക് ശേഷം ആണെന്ന് ഈ ലിഖിതം ചൂണ്ടിക്കാണിക്കുന്നു എന്ന് എം.ആർ. രാഘവ വാര്യർ പറഞ്ഞിട്ടുണ്ട് എന്ന് സൂചിപ്പിച്ചല്ലോ. അങ്ങനെവരുമ്പോൾ തരിസാപ്പള്ളി ചെപ്പേടിൽ പറയുന്ന വിജയരാഗദേവർ ആണ് പിന്നീട് കോത രവി ആയി സ്ഥാനം ഏറ്റെടുത്തത് എന്ന എം.ജി.എസിന്റെ അഭ്യൂഹം ശരിയാകാനിടയില്ല എന്ന് കൂടി കാണണം. രാമ രാജശേഖരന്റെ ഭരണം C.E. 893ലേക്ക് കടന്നു എന്ന് വരുമ്പോൾ കലിദിനം നാലായിരത്തുമൊപ്പത എന്ന് എം.ജി.എസ് നെടുംപുറം തളി ലിഖിതത്തെ വ്യാഖ്യാനിച്ചത് ശരിയായിരുന്നില്ല എന്നും ഇളംകുളം കണക്കാക്കിയതുപോലെ അത് നാലായിരത്തിമുപ്പത്തഞ്ച് തന്നെ ആയിരുന്നു എന്നും വന്നു കൂടും.
ഇങ്ങനെ വംശാവലിയിൽ കോത രവിയുടെ കാലം മുന്നോട്ടുപോകുമ്പോൾ കോത രവിക്ക് തൊട്ടുതാഴെ എം.ജി.എസ് ഇടം നൽകിയ കോത കോതക്കും, അതിനുതാഴെ ഉള്ള മറ്റു രാജാക്കന്മാർക്കും വംശാവലിയിൽ സ്ഥാനഭ്രംശം ഉണ്ടാകും. 10ാം നൂറ്റാണ്ടിൽ ഉള്ളത് എന്ന് കൃത്യമായി അറിയാവുന്ന ഭാസ്കര രവി മനുകുലാദിത്യനും 12ാം നൂറ്റാണ്ടിന്റെ ആദ്യപാദത്തിൽ ഭരിച്ചിരുന്ന രാമവർമ കുലശേഖരനും ഒഴികെ ഉള്ള മറ്റെല്ലാവരുടെയും സ്ഥാനങ്ങൾ കീഴ്മേൽ മറിയും. അഥവാ എം.ജി.എസ് നിർമിച്ച വംശാവലി അസ്ഥിരമാകും. ഈ ലിഖിതം വായിച്ച എം.ആർ. രാഘവവാര്യരോ, ഇതിന്റെ വായനയെ അംഗീകരിച്ച എം.ജി.എസ് അടക്കമുള്ള മുതിർന്ന പണ്ഡിതന്മാരോ ഇക്കാര്യം മനസ്സിലാക്കിയിട്ടില്ല എന്ന് ഞാൻ കരുതുന്നില്ല.
ഈ അവസരത്തിൽ ചർച്ചചെയ്യേണ്ട മറ്റൊരു വസ്തുതകൂടിയുണ്ട്. അത് ഇന്ദുകോത, ഭാസ്കര രവി എന്നിവർ ഭരണത്തിൽ തുടർച്ചക്കാരാണ് എന്നുള്ള ആശയമാണ്. തൃക്കാക്കര ക്ഷേത്രത്തിലെ ലിഖിതങ്ങളുമായി ബന്ധപ്പെട്ട് അവ പ്രസിദ്ധീകരിച്ച കാലത്തുതന്നെ ഉരുത്തിരിഞ്ഞ ഒരാശയമായിരുന്നു ഇത്. തൃക്കാക്കര ക്ഷേത്രത്തിൽ ഉള്ള ലിഖിതങ്ങളിൽ ഇന്ദു കോതയുടെ ലിഖിതത്തിൽ കാണുന്ന സാക്ഷിപ്പട്ടികയിലെ ചില വ്യക്തിനാമങ്ങളുമായി സാമ്യമുള്ളവരുടെ പിന്തുടർച്ചക്കാരെന്ന് തോന്നുന്ന വ്യക്തിനാമങ്ങൾ ഭാസ്കര രവിയുടെ ലിഖിതങ്ങളിലും ആവർത്തിച്ചുവരുന്നു എന്നുള്ളതാണ് ഈ വാദത്തിന്റെ കാതൽ. ഇന്ദുകോതയുടെ പിൻഗാമിയാണ് ഭാസ്കര രവി എന്നുള്ള നിഗമനത്തിലേക്ക് ചരിത്രകാരന്മാർ എത്താനുണ്ടായ പ്രധാന കാരണം ഇതായിരുന്നു. സാക്ഷി പട്ടികകളിൽ കാണുന്ന പിൻഗാമികൾ എന്ന് സംശയിക്കേണ്ടുന്ന നാമങ്ങളുടെ സാന്നിധ്യം രണ്ടു ഭാസ്കര രവിമാരുടെയും ലിഖിതങ്ങളിലും ഉണ്ട്. ഭാസ്കര രവിമാർ രണ്ടു പേരും ഒരേ സമയത്തു ഭരിച്ചിരുന്നിരിക്കാം എന്ന് ഇളംകുളം സംശയിക്കാൻ ഒരു കാരണവും ഇതുതന്നെയാണ്.
ഭാസ്കര രവിമാരുടെ കാലം നിർണയിക്കുന്നതിനു ഇളംകുളം ആശ്രയിച്ച രീതികൂടി ശ്രദ്ധിക്കേണ്ടതുണ്ട്. ഭാസ്കര രവിയുടെ ലിഖിതങ്ങളിൽ വ്യാഴത്തിന്റെ നിലയോടൊപ്പം ലിഖിതമെഴുതിയ മാസം, നക്ഷത്രം, തീയതി എന്നിവയുടെ സൂചനകൾകൂടിയുള്ള ലിഖിതങ്ങൾ ജ്യോതിഷരീതിയിൽ പുറകോട്ട് ഗണിച്ചുനോക്കി ലിഖിതങ്ങളുടെ തീയതി നിർദേശിക്കുകയാണ് ഇളംകുളം ചെയ്തത്. പ്രധാനമായ ഒരു സംഗതി ഇവിടെ ഓർക്കേണ്ടതുണ്ട്. പരഹിത സമ്പ്രദായത്തിൽ ഗണിച്ച നക്ഷത്രങ്ങളും തീയതികളുമാണ് ചേരകാലത്തെ ലിഖിതങ്ങളിൽ കാണുന്നത്. പതിനഞ്ചാം നൂറ്റാണ്ടിൽ ജീവിച്ചിരുന്ന വടശ്ശേരി പരമേശ്വരൻ ദൃഗ്ഗണിതം ആവിഷ്കരിക്കുന്നതുവരെ പരഹിത സമ്പ്രദായമാണ് പഞ്ചാംഗ ഗണനത്തിനു കേരളത്തിൽ നിലവിലിരുന്നത്.
പരഹിതത്തിനുള്ള ന്യൂനതകൾ പരിഹരിക്കുകയായിരുന്നു ദൃഗ്ഗണിതരീതിയുടെ ലക്ഷ്യം. ഇതിൽ ഏത് രീതിയിലാണ് ഇളംകുളം ഗണിച്ചത് എന്ന് നമുക്കറിയില്ല. ആയിരത്തിലധികം വർഷങ്ങൾക്ക് മുമ്പ് ഗണിച്ചുണ്ടാക്കിയ ഒരു ഗ്രഹനില പുറകോട്ട് ഗണിച്ച് കണ്ടെത്താൻ ശ്രമിക്കുമ്പോൾ കൃത്യമായ ഫലം ലഭിക്കുന്നില്ല എന്ന പ്രശ്നത്തെ പറ്റി ഇളംകുളം തന്നെയും ബോധവാനാണ് എന്ന് അദ്ദേഹത്തിന്റെ എഴുത്തിൽതന്നെ കാണാവുന്നതുമാണ്. എന്നിരിക്കിലും ഭാസ്കര രവിമാർ രണ്ടു പേരും ഒരേ സമയം ഭരിച്ചിരുന്നിരിക്കണം എന്ന് ഇളംകുളം വിചാരിക്കാൻ കാരണം മുമ്പേ പറഞ്ഞ സാക്ഷി പട്ടികയിലെ സാജാത്യമാണ്. ലിഖിതങ്ങളിൽ കൊടുത്തിട്ടുള്ള ഗ്രഹനിലകൾ ഏത് ദിവസത്തേത് എന്ന് കണ്ടെത്താൻ കമ്പ്യൂട്ടർ ഉപയോഗിച്ചു പുറകോട്ട് ഗണിച്ചാലും കൃത്യമായ ഡിഗ്രികൾ ലഭിക്കുമെങ്കിലും ലഭിക്കുന്ന ഗ്രഹനിലകൾ, കൃത്യതക്കുറവുള്ള പരഹിത-ദൃഗ്ഗണിത രീതികളിൽ ഗണിച്ച് ലിഖിതങ്ങളിൽ അതത് കാലങ്ങളിൽ രേഖപ്പെടുത്തിയിട്ടുള്ള അതേ ഗ്രഹനിലകൾ ആയിരിക്കുകയില്ല.
ഇളംകുളത്തിനു ജ്യോതിഷ ഗണനയിലോ മറ്റോ പിഴവ് പറ്റിയിട്ടുണ്ടോ എന്നൊന്നും എം.ജി.എസ് പരിശോധിക്കുന്നില്ല. മനുകുലാദിത്യൻ എന്ന് ചില ലിഖിതങ്ങളിൽ പരാമർശം ഉണ്ടായിരുന്ന രാജാവ് ധനു വ്യാഴത്തിൽ ഭരണം ആരംഭിച്ച് അമ്പത്തെട്ടു വർഷം ഭരിച്ച ഭാസ്കര രവിയാണെന്ന് പുല്ലൂർ കൊടവലം ലിഖിതത്തിന്റെ വായനയിലൂടെ അദ്ദേഹത്തിന് മനസ്സിലായിരുന്നു. മുമ്പേതന്നെ അറിയാമായിരുന്ന തിരുവല്ല ചെപ്പേടിൽ മനുകുലാദിത്യനെ പറ്റി രണ്ടിടത്തു പരാമർശം ഉണ്ടായിരുന്നു. ഒന്ന് മനുകുലാദിത്യൻ ‘ഇളംകോ’ ആയിരുന്ന കാലത്തു തിരുവല്ലാ ക്ഷേത്രത്തിനു കൊടുത്ത ദാനത്തെ പറ്റിയും മറ്റൊന്ന് ‘കോ’ ആയിരുന്നപ്പോൾ നൽകിയ ദാനത്തെ പറ്റിയും ആയിരുന്നു.
ഇതിനെ ആസ്പദമാക്കി ഭാസ്കര രവി എന്ന മനുകുലാദിത്യൻ പ്രായപൂർത്തി ആകുന്നതിനു മുമ്പേ ഒരു ധനു വ്യാഴത്തിൽ പദവി ഏറ്റു എന്നും അന്ന് മുതൽ ലിഖിതങ്ങളുടെ ഒരു പരമ്പര (ധനു വ്യാഴം Series) ആരംഭിച്ചു എന്നും പ്രായപൂർത്തി ആയപ്പോൾ രണ്ടാമത്തെ (തുലാ വ്യാഴം) സീരീസ് ആരംഭിെച്ചന്നും അദ്ദേഹം വാദിച്ചു. ഈ ഊഹത്തിനു പല പ്രശ്നങ്ങളുമുണ്ട്. ഇളം കോ എന്ന പദവി പ്രായപൂർത്തി ആകാത്ത രാജാവ് എന്നല്ല മറിച്ച് ഇളയ രാജാവ് (crown prince) എന്നാണ് വ്യാഖ്യാനിക്കേണ്ടത്.
ഇളംകുളവും എം.ജി.എസും ഇങ്ങനെയുള്ള സങ്കൽപനങ്ങളിലേക്ക് എത്തുന്നതിനുള്ള കാരണം സാക്ഷികളുടെ പേരുകളെ കുറിച്ചുള്ള മുൻവിധി മൂലമാണ്. സാധാരണയായി മൂന്നു ഭാഗങ്ങളാണ് മധ്യകാല ലിഖിതങ്ങളിലെ ഒരു പേരിൽ കാണുന്നത്. ഇതിൽ ആദ്യത്തേത് വ്യക്തി ഉൾപ്പെടുന്ന kin groupന്റെ (പിൽക്കാലത്തെ തറവാട്ട് പേര്) പേര്, രണ്ടാമത്തേത് അച്ഛന്റെ പേര്, മൂന്നാമത്തേത് സ്വന്തം പേര് എന്നാണ് അനുമാനം. ഉദാ. ഇന്ദു കോതയുടെ ലിഖിതത്തിലുള്ള പന്നിത്തുരുത്തി കണ്ണൻ പോഴൻ. ഇതിലെ പന്നിത്തുരുത്തി kin groupന്റെ പേരും കണ്ണൻ അച്ഛന്റെ പേരും പോഴൻ സ്വന്തം പേരും എന്നാണ് സങ്കൽപം. ഭാസ്കര രവിയുടെ ലിഖിതത്തിൽ സാക്ഷിയായ പന്നിത്തുരുത്തി പോഴൻ കുമരൻ ഇയാളുടെ മകനാകാം എന്നും ഇളംകുളവും എം.ജി.എസും കരുതുന്നു. ഇത്തരത്തിൽ മൂന്നു ജോടി സാക്ഷികൾ തൃക്കാക്കരക്ഷേത്രത്തിലുള്ള ഇന്ദു കോതയുടെയും ഭാസ്കര രവിയുടെയും ലിഖിതങ്ങളിൽ ഉള്ളതും ഇളംകുളവും എം.ജി.എസും ചൂണ്ടിക്കാണിക്കുന്നുണ്ട്.10
എന്നാൽ, പേരിന്റെ മുന്നിൽ ആദ്യം കാണുന്നത് എപ്പോഴും kin groupന്റെ പേര് ആയിക്കൊള്ളണം എന്നില്ല. തൃക്കാക്കരയിലെ ഇന്ദു കോതയുടെ പതിനാറാമാണ്ടിലെ ലിഖിതത്തിൽ കാണുന്ന പല നാമങ്ങളും സാക്ഷികളുടെ ഊരിന്റെ പേരുകളാണ്.11 കുലശേഖര പട്ടിനത്തു മാറൻ കോവിന്ദനും തുടർന്ന് വരുന്ന മൂന്നു സാക്ഷികളും കുലശേഖര പട്ടിനത്തുകാർ ആണ്. ഊരതു (അതേ ഊരിലുള്ള) കുമരൻ ചിരികണ്ടൻ, ഊരതു പോഴ നാരായണൻ എന്നിങ്ങനെ ആണ് അവരുടെ പേരുകൾ വട്ടെഴുത്തു ലിപിയിൽ ഉള്ള ലിഖിതത്തിൽ കൊടുത്തിട്ടുള്ളത്. എന്നാൽ ‘ങ’ ‘തു’ എന്നീ അക്ഷരങ്ങൾക്കുള്ള സാമ്യം ശ്രദ്ധിക്കാതെ ‘ഊരങ്പോഴ നാരായണൻ, ഊരങ്. കുമരൻ ചിരികണ്ടൻ’ എന്നൊക്കെ ആണ് TAS ൽ പ്രസിദ്ധീകരിച്ചിട്ടുള്ളത്. ഇതേ തെറ്റ് പിന്നീടും പലയിടത്തും പലരും ആവർത്തിച്ചുണ്ട്. ഇളംകുളവും എം.ജി.എസും ഈ പിഴവ് ശ്രദ്ധിച്ചിട്ടില്ല എന്നുമാത്രമല്ല ഓരോ വ്യക്തി നാമങ്ങളുടെയും മുന്നിലുള്ള പേര് അച്ഛന്റെ പേരായും (അമ്മാവന്റെ ആകാനും സാധ്യതയുണ്ട്) അതിന്റെ മുന്പത്തെ പേര് kin groupന്റെ (തറവാട്) പേരായും വിചാരിക്കുകയും ചെയ്യുന്നു.
മുകളിൽ ചർച്ച ചെയ്തത് ഇങ്ങനെ സംഗ്രഹിക്കാം. ഭാസ്കര രവിമാർ രണ്ടു പേരും( മനുകുലാദിത്യനായ ഭാസ്കര രവിയും, ഭാസ്കര രവിയും) ഒരേ കാലത്തു ഭരിച്ചു എന്നോ അവർ രണ്ടു പേരോ അവരിൽ ആരെങ്കിലുമോ ഇന്ദു കോതയുടെ തൊട്ടു പിൻഗാമിയായിരുന്നു എന്നോ ഇപ്പോൾ ലഭിച്ചിട്ടുള്ള തെളിവുകൾ ഉപയോഗിച്ച് നിർണയിക്കുന്നതിൽ അപാകതയുണ്ട്, ഭാസ്കര രവി രണ്ടുണ്ടാകാനുള്ള സാധ്യത കാണുന്നുണ്ട് എന്ന് പ്രത്യേകം പറയേണ്ടല്ലോ.
ലിഖിതങ്ങളുടെ വായനയിൽ കടന്നുകൂടിയിട്ടുള്ള ധാരാളം പിഴവുകളിൽ ഒന്ന് മാത്രമാണ് മുകളിൽ പറഞ്ഞത്. എം.ജി.എസിന്റെ ശ്രദ്ധയിൽപെട്ട പലതും അദ്ദേഹത്തിന്റെ പഠനങ്ങളിൽ തിരുത്തിയിട്ടുണ്ട്. കോത രവിയുടെ മുപ്പതാം ഭരണവർഷത്തിലുള്ള തൃപ്പൂണിത്തുറ ലിഖിതം രണ്ടാമത്തെ വരിയിലുള്ള ‘നിലവിച്ചൈ പരടയാർ’ (നിലവിലുള്ള പരടൈ (committee) എന്ന വാക്കുകൾ മുൻകാല പ്രസിദ്ധീകരണങ്ങളിൽ എല്ലാം ‘നിൽ പിച്ചൈ പരടയാർ’ എന്നാണ് വായിച്ചിട്ടുള്ളത്. കല്ല് നേരിട്ട് പരിശോധിച്ചതിൽനിന്നുമാണ് സംഭവിച്ച അബദ്ധം ഈ ലേഖകന് മനസ്സിലാക്കാൻ കഴിഞ്ഞത്. വട്ടെഴുത്തിൽ ‘പ’, ‘വ’ എന്നീ അക്ഷരങ്ങൾക്കുള്ള സാമ്യമാണ് ഇവിടെ വിനയായത്.
ഉപസംഹാരം
രാമ രാജശേഖരന്റെ കുറുമത്തുർ ലിഖിതം വിശകലനം ചെയ്തതിൽനിന്നും C.E. 872-893 കാലയളവിൽ ആ രാജാവാണ് കേരളം വാണിരുന്നതെന്ന് വെളിവാകുന്നുണ്ട്. വംശാവലിയിൽ രാമ രാജശേഖരനു സംഭവിച്ച ഈ മാറ്റം നിലവിൽ അംഗീകരിക്കപ്പെട്ട മൊത്തം വംശാവലിയെതന്നെ അസ്ഥിരപ്പെടുത്തുന്നതാണ്. മുൻകാല ചരിത്ര കാരന്മാർ ഉന്നയിച്ചിട്ടുള്ള, ഇന്ദുകോതയുടെ പിൻഗാമിയാണ് ഭാസ്കര രവി എന്ന വാദവും ഭാസ്കര രവി രണ്ടില്ല ഒന്നേയുള്ളൂ എന്ന എം.ജി.എസിന്റെ വാദവും സംശയാതീതമല്ല.
പൂർവസൂരികൾക്കു ലഭിച്ചിരുന്നതിനേക്കാൾ കൂടുതൽ ലിഖിതങ്ങൾ ഇപ്പോൾ നമുക്ക് ലഭിച്ചിട്ടുണ്ട് എങ്കിലും അത് അവസ്ഥയെ സങ്കീർണമാക്കുകയാണ് ചെയ്തിട്ടുള്ളത്. നാലോ അഞ്ചോ രാജാക്കന്മാരുടെ ഭരണകാലത്തെ സംബന്ധിച്ച് സ്ഥിരീകരണം ലഭിച്ചിട്ടുണ്ട് എങ്കിലും കുറ്റമറ്റ ഒരു വംശാവലി ഉണ്ടാക്കുന്നതിന് ആവശ്യമായ തെളിവുകൾ ഇപ്പോഴും ലഭ്യമായിട്ടില്ല. തെളിവുകൾ ലഭിച്ചാൽതന്നെയും അവയെ ലിപി വിജ്ഞാനീയം, ജ്യോതിഷ സൂചനകൾ എന്നിവ നൽകുന്ന സൂചനകൾ അനുസരിച്ച് കൃത്യമായി അടുക്കിപ്പെറുക്കി െവക്കുക എളുപ്പവുമല്ല.
=============
സൂചിക
1. എ.എസ്. രാമനാഥ അയ്യർ, Ed TAS, Vol. V. p. 114.
2. R. V.R.I.B., Vol. 7. Part 1. p .11.
3. ഇളംകുളം കുഞ്ഞൻ പിള്ള, ചില കേരളചരിത്ര പ്രശ്നങ്ങൾ Part II, 1955, p .57- 59
4. സന്തോഷ് എളേടത്ത്, ഇളംകുന്നപ്പുഴയിലെ ശിലാലിഖിതങ്ങൾ, താപസം -വാല്യം 19, 2023. pp. 71 -81
5. എം.ജി.എസ്. നാരായണൻ, Perumalas of Kerala, p.73.
6. അതേ പുസ്തകം പു. 64 മുതൽ.
7. എം.ആർ. രാഘവ വാരിയർ, Kurumattur Prasasti of Rajasekhara in എസ്. രാജവേലു മുതൽ പേർ ed. അമരാവതി, പുറം. 301.
8. L.D. Swamikkannu Pillai, Indian Ephemris, Vol. 2. p. 146.
9. അതേ പുസ്തകം. പു. 185.
10. Perumals of Kerala, p. 81.
11. TAS, Vol. 3. p.173.
കാലടി ശ്രീ ശങ്കരാചാര്യ സംസ്കൃത സർവകലാശാലയിൽ ചരിത്ര വിഭാഗത്തിൽ ഗവേഷകനാണ് ലേഖകൻ.