‘65 ദിവസം കഴിച്ചത് തേനും പച്ചവെള്ളവും മാത്രം. കൂട്ടിന് വ്യായാമവും’- ഇത് പത്രോസച്ചന്‍റെ ജീവിതം

ഒരൊറ്റ വെടികൊണ്ട്​ മാങ്ങയും ചക്കയുമൊക്കെ ത​ാഴെയിടുന്ന വൈദികൻ. തെറ്റാലികൊണ്ടും അമ്പും വില്ലും കൊണ്ടും തീർക്കുന്നത്​ മായാജാലം. ഇരുകൈയിലും നീണ്ട വടികൾ അതിവേഗം കറക്കി കണ്ണഞ്ചിപ്പിക്കും വിരുതുകളിലൂടെ സമൂഹമാധ്യമങ്ങളിൽ താരമായ പത്രോസച്ചൻ.

മലങ്കര ഓർത്തഡോക്സ്​ സുറിയാനി സഭ ബദനി ആശ്രമത്തിലെ അംഗവും തൃശൂർ കുന്നംകുളം ബഥനി സ്കൂൾ പ്രിൻസിപ്പലുമായ ഫാ. പത്രോസ്​ ഒ.ഐ.സിക്ക്​ ഫിറ്റ്​നസ്​ എന്നത്​ ജീവിതംതന്നെ. യോഗയിലും കരാട്ടേയിലും കാലിസ്തനിക്സിലും അഗ്രഗണ്യൻ. കാമറയും തൂക്കി കാടകങ്ങൾ നിരന്തരം തേടുന്ന പരിസ്ഥിതിസ്​നേഹി. എൻഫീൽഡ്​ ബൈക്കിൽ ലോകം ചുറ്റുന്ന സഞ്ചാരി...വിശേഷങ്ങൾ അങ്ങനെ നീളും.

കാടും കുന്നും കടന്ന്​ സ്​കൂളിലേക്ക്​

ഇടുക്കി നെടുങ്കണ്ടത്ത്​ മാവടി എന്ന മലയോര ഗ്രാമത്തിൽ കളമ്പാലയിൽ ജോയി -അച്ചാമ്മ ദമ്പതികളുടെ മകനായിരുന്നു സുനീഷ്​ എന്ന ഇന്നത്തെ പത്രോസച്ചൻ. 12 കിലോ മീറ്റർ അകലെയുള്ള നെടുങ്കണ്ടം ഹൈസ്കൂളിലേക്ക്​ കൂട്ടുകാരുമൊത്ത്​ ഏലത്തോട്ടവും മലയും ഡാമും പിന്നിട്ട്​ നടന്ന നാളുകൾ.

മരത്തിൽ കയറുക, പാറകൾ ചാടിക്കടക്കുക, കബഡി, വടംവലി തുടങ്ങി കളികളിൽ കേമൻ. പഠനത്തിൽ അത്ര മിടുക്കനായിരുന്നില്ല. മൂന്നാംതവണ പരീക്ഷിച്ചാണ്​ പത്താംതരം കടന്നുകൂടിയത്​. 12ാം വയസ്സിൽ കളപ്പുര ​സിബിച്ചൻ സെബാസ്റ്റ്യന്‍റെ കീഴിൽ കരാട്ടേ പഠിച്ചു. ഷിട്ടോറിയോ, ജെ.കെ.ഡി ശൈലികളും കുങ്ഫുവും. പത്താംക്ലാസിനുശേഷം കൃഷി, പശുവളർത്തൽ, എസ്​റ്റേറ്റ്​ പണിയുമായൊക്കെ നാട്ടിൽ ഒതുങ്ങിക്കൂടി.

വീണ്ടും പഠനകാലം

‘ചിട്ടയായ ക്രമപ്പെട്ടുള്ള ജീവിതം’ -അതായിരുന്നു അദ്ദേഹത്തെ ആശ്രമ ജീവിതത്തിലേക്ക്​ ആകർഷിച്ചത്​. ഒപ്പം വളരെ വിശാലമായ പുതുലോകവ​ും തുറന്നു. പ്ലസ്​ വൺ പഠിക്കാൻ പോയത് 21ാം വയസ്സിൽ​​ റാന്നി പെരുനാട്​ ബദനി ആശ്രമത്തിൽ ചേർന്ന ശേഷമാണ്​. സെനിത്ത്​ ഓപൺ സ്കൂളിലായിരുന്നു പ്ലസ്​ വൺ പഠനം. ഹ്യുമാനിറ്റീസിൽ ഫസ്റ്റ്​ക്ലാസോടെ പാസായി.

ഇക്കണോമിക്സ്​ കിട്ടാത്തതിനാൽ ബി.എ മലയാളമെടുത്തു. ആദ്യവർഷം കൂടുതൽ മാർക്ക്​ നേടിയതിന്​ ബെസ്റ്റ്​ സ്റ്റുഡന്‍റ്​ അവാർഡ്​. രണ്ടാവർഷവും മൂന്നാംവർഷവും കോളജിലെ മികച്ച വിദ്യാർഥി. ഡിസ്കസ്​ ത്രോ, ഷോട്ട്​ പുട്ട്​ മത്സരങ്ങളിലും വിജയി. കതോലിക്കേറ്റ്​ കോളജ്​ മാഗസിൻ സ്റ്റുഡന്‍റ്​ എഡിറ്ററായി തെരഞ്ഞെടുക്കപ്പെട്ടു. 2011ലാണ്​ കുന്നംകുളത്തേക്ക്​ സ്കൂൾ ചുമതലയിൽ ആദ്യ പോസ്റ്റിങ്​ എത്തുന്നത്​. അക്കിക്കാവ്​ വിവേകാനന്ദ കോളജിൽ ബി.എഡും പൂർത്തിയാക്കി.

ആശ്രമ ജീവിതത്തിലെ ആരോഗ്യ സംരക്ഷണം

രാവിലെ നാലരക്ക്​ എഴുന്നേറ്റ്​ നാലേമുക്കാലോടെ പള്ളിയിൽ​ പോകുന്നതോടെ തുടങ്ങും പത്രോസച്ചന്‍റെ ദിനങ്ങൾ. അഞ്ചേമുക്കാലോടെ നടത്തം, ലഘു ഓട്ടം. പിന്നീട്​ കുറച്ച്​ ബാസ്കറ്റ്​ബാൾ. അങ്ങ​നെ ‘വാം അപ്’ ആകും.

ആശ്രമത്തിൽ ജിം സെറ്റപ്പ്​ ചെയ്തിട്ടുണ്ട്​. ആറരക്ക്​ ജിമ്മിലേക്ക്​ കടക്കും. ശാരീരിക ക്ഷമത കൂട്ടാനുള്ള വ്യായാമങ്ങൾ ഒന്നര മണിക്കൂർ ചെയ്യും. എട്ടുമണിക്ക്​ ബ്രേക്ക്​ ഫാസ്റ്റ്​. അരഗ്ലാസ്​ പാൽകാപ്പി കൂടെ ഓംലെറ്റ്. പതിയെ നട്ടുപിടിപ്പിച്ച ഫലവൃക്ഷങ്ങളെ പരിപാലിച്ച്​ നടത്തം.

മൾബറി, നാരകം, സപ്പോട്ട... വല്ലതും പാകമായിട്ടുണ്ടെങ്കിൽ അവ പറിച്ചുതിന്നും. അൽപം യോഗ, കരാട്ടേ, കാലിസ്തനിക്​സ്​. പ്രിൻസിപ്പലായതിനാൽ എട്ടരക്ക്​ സ്കൂളിൽ പോകും. ഉച്ചക്ക്​ ഭക്ഷണം നിർബന്ധമില്ല. കഴിച്ചാൽ നാല്​ സ്പൂൺ ചോറും കറിയും. നാല്​ മണിക്ക്​ ചായ.

വൈകീട്ട്​ വ്യായാമം വീണ്ടും തുടങ്ങും. വടികറക്കൽ, പുള്ളപ്പ്​, സൈക്ലിങ്​ എന്നിവ അതിന്‍റെ ഭാഗമാകും. ചിലപ്പോൾ ജിമ്മിലും കയറും. ഇതിനിടെ റോളർ സ്​കേറ്റിങ്​​, എയർഗൺ ഷൂട്ടിങ്​, തെറ്റാലി പോലെയുള്ള സ്ലിങ്​ ഷോട്ട്​, അമ്പെയ്ത്ത്​ എന്നിവയും അച്ചന്‍റെ ശീലങ്ങളാണ്​. ക്രിക്കറ്റ്​, ഷട്ടിൽ എന്നിവ ചില ദിവസങ്ങളിൽ.

11 കി​ലോ വരുന്ന കാമറയും ലെൻസും എടുത്ത്​ പക്ഷികളെ നോക്കാനും പോകും. ആറിന്​ തിരികെ പള്ളിയിൽ എത്തും. ആറരക്ക്​ ഇറങ്ങി വീണ്ടും വ്യായാമം. രാത്രി ഭക്ഷണം രണ്ട്​ ചപ്പാത്തി, മീനുണ്ടെങ്കിൽ ചിലപ്പോൾ ഒരു കഷണം​. രാത്രി ഫ്രൂട്ട്​സ്​ ഉണ്ടെങ്കിൽ കൂടുതൽ സന്തോഷം.

രാത്രി ചെസ്​, കാരംസ്​ കളികൾ. പുസ്തകവായനയും കാര്യമായി നടക്കുക അപ്പോഴാണ്​. രാത്രി​ കിടക്കുന്ന സമയത്ത്​ നെഗറ്റിവ്​ അപ്രോച്ച്​ ഇല്ലാതെ ഉറക്കം. തലയണ വെക്കാറില്ല. രാത്രി എഴുന്നേറ്റാൽ വ്യായാമം​ ചെയ്യും. വീണ്ടും കിടക്കും. കുറഞ്ഞത്​ ആറ്​ മണിക്കൂർ ഉറക്കം. വെറും ജീവിതമല്ല, ആവേശകരമായ നാളുകളാണ് ഈ ദിനചര്യ നൽകുന്നത്​.

പ്രകൃതിയോട്​ ഇണങ്ങി ഭക്ഷണം

ഡി​േപ്ലാമ ഇൻ നാച്വറോപ്പതി ആൻഡ് യോഗി സയൻസ്​ (ഡി.എൻ.വൈ.എസ്) പഠിച്ചതിലൂടെ തുറന്നത്​​ പ്രകൃതി ജീവനത്തിലേക്കുള്ള വഴിയാണ്​. ചില സമയത്ത്​ ഉപവാസം ശരീരത്തിന്​ ആവശ്യമാണെന്ന്​ ഇതിലൂടെ മനസ്സിലാക്കി. കഴിക്കുന്ന ഭക്ഷണത്തിൽ കൊഴുപ്പ്​, അമ്ലത (അസിഡിറ്റി) എന്നിവ കൂടുതലുള്ളവ ഒഴിവാക്കുകയാണ്​ വേണ്ടതെന്ന്​ അച്ചൻ പറഞ്ഞുതരും.

ഫലങ്ങൾ കഴിക്കുന്ന സമയത്ത്​ മറ്റ്​ ആഹാരങ്ങളും ധാന്യങ്ങളും ഒഴി​വാക്കും​. ധാന്യങ്ങൾ എണ്ണയില്ലാതെ പുഴുങ്ങിക്കഴിക്കാൻ ശ്രദ്ധിക്കണം. പച്ചക്ക്​ കഴിക്കാൻ പറ്റുന്നത്​ പരമാവധി അങ്ങനെത്തന്നെ.

അമ്ലത ഉൽപാദിപ്പിക്കുന്ന അച്ചാറുകൾ പോലുള്ളവ ഭക്ഷണ വിഭവങ്ങളിൽ നിന്ന്​ അകറ്റണം. ഉണ്ണിപ്പിണ്ടി ശരീരത്തിലെ അമ്ലത കുറക്കുന്ന ഒന്നാണ്. തേൻ കഴിക്കുന്നത്​ ശരീരത്തിന്​ നല്ലതാണ്​.

തേൻ കഴിച്ചും കഴിഞ്ഞുകൂടാം

65 ദിവസം തേൻ മാത്രം കഴിച്ച്​ ജീവിച്ച കഥ പറയും പത്രോസച്ചൻ. രാവിലെയും വൈകീട്ടും രണ്ടര മണിക്കൂർ നന്നായി വ്യായാമം ചെയ്ത്​ തന്നെയാണ്​ അക്കാലം പിന്നിട്ടത്​. 40 മില്ലി തേൻ മതി. ഒപ്പം നന്നായി പച്ചവെള്ളവും കുടിക്കും. ക്ഷീണം ഉണ്ടായി​ട്ടേ ഇല്ല. ഒരു കിലോ ഭാരം പോലും കുറഞ്ഞിട്ടില്ല. അതായത്​, നാം സാധാരണ ഭക്ഷണം കഴിക്കുന്നത്​ വളരെ കൂടുതലാണെന്ന്​ ചുരുക്കം.

വിഷമടിക്കാത്ത ഫലങ്ങൾ ആരോഗ്യ സംരക്ഷണത്തിന്​ അത്യാവശ്യമാണ്​. കിടപ്പ്​ തലയണയില്ലാതെ നിവർന്നായാൽ നല്ലത്​. മായന്നൂരിലെ നിള സെന്‍ററിലെ നാരായണൻ മാഷ്​ പകർന്നുതന്ന യോഗ ക്ലാസുകളും ആരോഗ്യ ജീവിതത്തിലേക്കുള്ള വഴികാട്ടിയായി.

ഒരു കാമറയും ബൈക്കും

കാമറയും വലിയ ലെൻസുമായി വെട്ടിക്കടവ്​ കോൾപാടത്തും നൂറണിത്തോടിന്‍റെ പരിസരങ്ങളിലും അച്ചനെ ദിവസവും കാണാം. ഓരോ പക്ഷിയും ഹൃദിസ്ഥം. പത്രോസച്ചന്‍റെ സഞ്ചാര ലിസ്റ്റിൽ അങ്ങ്​ കെനിയയിലെ മസായ്​മാര വരെയുണ്ട്​. ഇന്ത്യൻ പര്യടനം ഏറക്കുറെ പൂർത്തിയാക്കി. യാത്രകളിൽ തന്‍റെ ഹിമാലയൻ എൻഫീൽഡാണ്​ പ്രിയം. ഓരോ യാത്രയും സ്വയമെടുത്ത്​ ‘വിങ്​സ്’ എന്ന ട്രാവലോഗ്​ യൂട്യൂബ്​ ചാനലിൽ അപ്​ലോഡ്​ ചെയ്യുന്നു.

പ​േ​ത്രാസച്ചൻ പോസിറ്റിവാണ്​

എപ്പോഴും പോസിറ്റിവായിരിക്കാൻ ശാരീരിക ക്ഷമത അത്യാവശ്യമാണെന്ന്​ അച്ചൻ വിവരിക്കും​. ഒാരോ വ്യായാമവും ഓരോ ​പ്രവൃത്തിയും ആഘോഷിച്ചാണ്​ ചെയ്യുക​. ഫിസിക്കലി സ്​ട്രോങ്ങായി നിൽക്കുക ആവശ്യമാണ്​. ‘സന്തോഷിച്ച്​ ജീവിപ്പിൻ’ എന്നാണ്​ ബൈബിൾ വചനം. അങ്ങനെ ആഘോഷിച്ച്​ ജീവിക്കു​ന്നുവെന്ന്​ പൗലോസച്ചൻ തെളിയിക്കുന്നു.

●