‘തണുപ്പ് കാലത്ത് മുത്തശ്ശനും മുത്തശ്ശിക്കും കൂടുതൽ ശ്രദ്ധ നൽകാറുണ്ടോ?’ -മഴക്കാലത്ത് കിടപ്പുരോഗീ പരിചരണത്തിൽ ശ്രദ്ധിക്കേണ്ട കാര്യങ്ങളിതാ

അന്തരീക്ഷത്തിൽ ഈർപ്പത്തിന്‍റെ സാന്നിധ്യം വർധിക്കുന്നതും താരതമ്യേന കുറഞ്ഞ താപനിലയും കാരണം പൊതുവെ മഴക്കാലത്ത്​ അണുബാധക്കുള്ള സാധ്യത കൂടുതലാണ്​.

അലർജി രോഗങ്ങളും കൂടുതലായി കണ്ടുവരാറുണ്ട്​. തണുപ്പുള്ള അന്തരീക്ഷത്തിൽ ശരീരത്തിലെ വേദനകൾ വർധിക്കാനും സാധ്യതയേറെയാണ്​​. ഇവയെല്ലാം കിടപ്പിലായ രോഗികൾക്ക് വെല്ലുവിളികൾ സൃഷ്ടിക്കുന്ന ഘടകങ്ങളാണ്​.

അതുകൊണ്ടുതന്നെ കിടപ്പിലായവരും പ്രായമേറിയവരുമായ രോഗികളെ പരിചരിക്കുന്നവർ മറ്റു സമയങ്ങളെ അപേക്ഷിച്ച്​ കൂടുതൽ ശ്രദ്ധ പുലർത്തേണ്ടതുണ്ട്​. അക്കാര്യങ്ങളറിയാം...

● രോഗി കിടക്കുന്ന മുറിയുടെ അകവും ചുറ്റുപാടുകളും ഈർപ്പരഹിതവും വൃത്തിയുള്ളതുമായി നിലനിർത്തണം. വായുവിലെ അധിക ഈർപ്പം പൂപ്പൽ വളർച്ചക്കും ബാക്ടീരിയ അണുബാധക്കും കാരണമാകും. മുറിയിൽ നന്നായി വായുസഞ്ചാരം ഉറപ്പാക്കുകയും വേണം. മഴക്കാലത്ത്​ ഇടക്കിടെ കിടക്ക വിരികളും ടവലുകളും മാറ്റുകയും വേണം.

● അണുബാധയെ പ്രതിരോധിക്കുന്നതിൽ പ്രത്യേക ശ്രദ്ധവേണം. മഴക്കാലത്ത്​ പലപ്പോഴും ശ്വാസകോശ-ജലജന്യ രോഗങ്ങൾക്കുള്ള സാധ്യത കൂടുതലാണ്. തണുത്തതും ഈർപ്പമുള്ളതുമായ അന്തരീക്ഷവായുവിൽ ബാക്ടീരിയ, വൈറസ്​ തുടങ്ങിയ അണുക്കൾ വർധിക്കുന്നതിനാൽ ജലദോഷത്തിനും ന്യുമോണിയക്കും സാധ്യതയേറും. അതിനാൽ, രോഗിയെ പുതപ്പിച്ചും മറ്റും ശരീരത്തിലെ ചൂട്​ നിലനിർത്തണം. ചുമയുടെയോ പനിയുടെയോ ലക്ഷണങ്ങൾ ശ്രദ്ധയിൽപെട്ടാൽ ഉടൻ വൈദ്യസഹായം തേടണം.

● രോഗിക്ക്​ കുടിക്കാൻ നൽകുന്ന വെള്ളവും ഭക്ഷണവും അണുമുക്തമാണെന്ന്​ ഉറപ്പുവരുത്തണം. ഇതിനായി ഫിൽട്ടർ ചെയ്തതോ തിളപ്പിച്ചാറിയതോ ആയ വെള്ളം ഉപയോഗിക്കണം. ഭക്ഷണം എപ്പോഴും ചൂടോടെ നൽകണം. കത്തീറ്ററുകൾ, ബെഡ്പാനുകൾ എന്നിവ കൈകാര്യം ചെയ്യുമ്പോൾ ശുചിത്വം പാലിക്കണം.

● വീടിന്‍റെ പരിസരങ്ങളിൽ കെട്ടിക്കിടക്കുന്ന മഴവെള്ളം കൊതുകുകൾ പെരുകാൻ കാരണമാവും. ഇത് ഡെങ്കിപ്പനി, മലേറിയ പോലുള്ള രോഗങ്ങളുടെ സാധ്യത വർധിപ്പിക്കും. അതുകൊണ്ടുതന്നെ വീടിന്​ സമീപം വെള്ളം കെട്ടിക്കിടക്കാതെ നോക്കണം. കൂടാതെ മുറിക്കുള്ളിൽ കൊതുകുവലകൾ, കൊതുകിനെ നിയന്ത്രിക്കുന്ന മറ്റ്​ ഉപാധികൾ എന്നിവ ഒരുക്കണം.

● സാംക്രമിക രോഗങ്ങളുടെ ഭീഷണി കണക്കിലെടുത്ത്​ ജലദോഷം, ചുമ, പനി തുടങ്ങിയ രോഗലക്ഷണങ്ങളുള്ളവരെ രോഗിയെ സന്ദർശിക്കാൻ അനുവദിക്കരുത്. സന്ദർശകർ മാസ്ക്​ ധരിക്കാൻ ശ്രദ്ധിക്കണം.

● മഴയുള്ള കാലാവസ്ഥ രോഗികളുടെ മാനസികാവസ്ഥയെ പ്രതികൂലമായി ബാധിക്കുന്ന ഘടകമാണ്​. രോഗി കിടക്കുന്ന മുറിയിൽ ആവശ്യത്തിന്​ വെളിച്ചവും വായുസഞ്ചാരവും ഉറപ്പാക്കണം. രോഗി ഉണർന്നിരിക്കുമ്പോൾ അവർക്കിഷ്ടമുള്ള വിഷയങ്ങളിൽ സംസാരിക്കുകയും മനസ്സിന്​ സന്തോഷം നൽകുന്ന സംഗീതം, സിനിമ എന്നിവ ആസ്വദിക്കാനുള്ള സൗകര്യങ്ങൾ ഒരുക്കുകയും വേണം.

● കൃത്യമായ ഇടവേളകളിൽ രോഗിയെ കുളിപ്പിക്കുകയോ ശരീരം വൃത്തിയാക്കാൻ മറ്റു മാർഗങ്ങൾ സ്വീകരിക്കുകയോ വേണം. കുളിപ്പിച്ച ശേഷം ശരീരം നന്നായി തുടച്ച്​ ഈർപ്പരഹിതമാക്കുകയും കിടക്കയുമായി സമ്പർക്കമുള്ള ഭാഗങ്ങളിൽ പൗഡറുകൾ/ക്രീമുകൾ എന്നിവ ഉപയോഗിക്കുകയും വേണം.

ശയ്യാ വ്രണങ്ങൾ വരാതെ സൂക്ഷിക്കണം

തണുത്ത കാലാവസ്ഥ ചർമം വരണ്ടതാവാനും ചർമത്തിന്‍റെ ആരോഗ്യത്തെ ബാധിക്കുകവഴി അവിടെ വ്രണങ്ങൾ രൂപപ്പെടാനും കാരണമാകും. അതിനുള്ള സാധ്യത ഇല്ലാതാക്കാൻ തൊലിപ്പുറത്ത്​ അനുയോജ്യമായ ​ക്രീമുകൾ (Moisturizer Cream) ഉപയോഗിക്കണം.

ശരീരഭാരം കിടക്കയിലോ മറ്റു പ്രതലങ്ങളിലോ സ്ഥിരമായി അമർന്നിരിക്കുന്ന ഭാഗങ്ങളിൽ കാലക്രമേണ തൊലിയിൽ പൊട്ടലും മുറിവുകളും ഉണ്ടാവാൻ സാധ്യതയുണ്ട്. ഇത്തരത്തിലുള്ള വ്രണങ്ങൾ ഉണ്ടായിക്കഴിഞ്ഞാൽ അവ മാറ്റിയെടുക്കാൻ താരതമ്യേന പ്രയാസമാണ്​. അതിനാൽ, വ്രണങ്ങ​ൾ ഉണ്ടാവാതിരിക്കാനാണ്​ ശ്രദ്ധിക്കേണ്ടത്​. ഇതിനായി രോഗിയെ പതിവായി സ്ഥാനം മാറ്റുക, ദിവസവും ചർമം പരിശോധിക്കുക, രോഗിയെ കിടത്താൻ ഈർപ്പം ആഗിരണം ചെയ്യുന്ന ഷീറ്റുകളും വായുനിറച്ചതോ വെള്ളം നിറച്ചതോ ആയ മെത്തകളും ഉപയോഗിക്കുക.

ഈ ശരീരഭാഗങ്ങളിൽ ശ്രദ്ധയേറെ വേണം

● പുറം ഭാഗം: നട്ടെല്ലിന് താഴത്തെ പുറംഭാഗത്താണ്​ കിടപ്പുരോഗികളിൽ കൂടുതൽ മർദം ഉണ്ടാക​ുന്നത്​. അതിനാൽ, ഏറ്റവും കൂടുതൽ വ്രണങ്ങൾ ഉണ്ടാവാനുള്ള സാധ്യത ഇവിടെയാണ്​.

● തലയുടെ പിൻഭാഗം: മലർന്നോ വശത്തോ കിടക്കുന്ന രോഗികളുടെ തലയോട്ടിയുടെ പിൻഭാഗത്തും വ്രണങ്ങൾ ഉണ്ടാകാൻ സാധ്യതയേറെയാണ്.

● തോളെല്ലുകളുടെ താഴെയും നട്ടെല്ലിന്‍റെ ഇരുവശത്തുമായ ഭാഗവും വ്രണങ്ങൾക്ക്​ സാധ്യതയുള്ള ഇടങ്ങളാണ്​.

● വ്രണങ്ങൾക്ക്​ സാധ്യതയുള്ള മറ്റൊരു ഭാഗമാണ്​ കൈമുട്ടുകൾ. രോഗി വശത്തേക്ക് ചരിഞ്ഞ് കിടക്കുമ്പോൾ സ്ഥിരമായി മർദം അനുഭവപ്പെടുന്ന സ്ഥലമായതിനാലാണ്​ ഇവിടെയുള്ള തൊലിയിൽ മുറിവുകൾ ഉണ്ടാവുന്നത്​.

● ഭാരം കൂടിയ ശരീരമുള്ള രോഗികളിൽ കണങ്കാലുകളിലും വ്രണങ്ങൾ രൂപപ്പെടാറുണ്ട്​.

● അരക്കെട്ടിലും നിതംബങ്ങളിലും ശ്രദ്ധവേണം. കിടപ്പുരോഗികളിൽ സാധാരണ വ്രണങ്ങൾ ഉണ്ടാവുന്ന സ്ഥലമാണിത്.

● സ്ഥിരമായി ഒരു വശത്തേക്ക്​ ചരിഞ്ഞു കിടക്കുന്ന രോഗികളുടെ ചെവികൾക്ക് സമീപം മർദം ഉണ്ടാകുകയും അവിടെ വ്രണങ്ങൾക്കുള്ള സാധ്യത കൂടുകയും ചെയ്യും.