തദ്ദേശ തെരഞ്ഞെടുപ്പ് ഒന്നാംഘട്ടം; പോളിങ് ശതമാനം 72ന് മുകളിൽ
text_fields
തിരുവനന്തപുരം: തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് ഒന്നാംഘട്ടം അവസാനിച്ചു. സംസ്ഥാനത്തെ അഞ്ച് ജില്ലകളിലാണ് ഇന്ന് വോട്ടെടുപ്പ് നടന്നത്. 72ന് മുകളിലാണ് പോളിങ് ശതമാനം. വൈകീട്ട് ആറ് വരെയാണ് വോട്ടെടുപ്പ് സമയമെങ്കിലും പലയിടത്തും അവസാന സമയം ധാരാളം പേർ എത്തിയത് വോട്ടെടുപ്പ് നീളാൻ ഇടയാക്കി.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, ഇടുക്കി ജില്ലകളിലാണ് ആദ്യഘട്ട തെരഞ്ഞെടുപ്പ്. 395 തദ്ദേശ സ്ഥാപനങ്ങളിലായി 6910 വാര്‍ഡുകളിലേക്കാണ് ഒന്നാം ഘട്ടത്തില്‍ തെരഞ്ഞെടുപ്പ്. 88,26,620 വോട്ടര്‍മാരാണ് വിധിയെഴുതേണ്ടത്. ആദ്യ മണിക്കൂറുകളിൽ തന്നെ മികച്ച പോളിങ്ങ് രേഖപ്പെടുത്തിയിരുന്നു.
അതേസമയം, ചിലയിടങ്ങളിൽ യന്ത്രങ്ങൾ പണിമുടക്കിയതോടെ വോട്ടെടുപ്പ് വൈകിയാണ് ആരംഭിച്ചത്. കോവിഡ് പശ്ചാത്തലത്തിൽ സാമൂഹിക അകലം പാലിച്ചാണ് വോട്ടെടുപ്പ് പ്രക്രിയ.
വ്യാഴാഴ്ച രണ്ടാംഘട്ട വോട്ടിങ് നടക്കേണ്ട അഞ്ച് ജില്ലകളിൽ ഇന്ന് കലാശക്കൊട്ടായിരുന്നു. കോട്ടയം, എറണാകുളം, തൃശൂർ, പാലക്കാട്, വയനാട് എന്നീ ജില്ലകളാണ് രണ്ടാംഘട്ടത്തിൽ. കോവിഡ് പശ്ചാത്തലത്തിൽ നിയന്ത്രണങ്ങളോടെയാണ് പ്രചാരണ സമാപനം.
മൂന്നാം ഘട്ട വോട്ടെടുപ്പ് ഡിസംബർ 14ന് തിങ്കളാഴ്ച നടക്കും. മലപ്പുറം, കോഴിക്കോട്, കണ്ണൂർ, വയനാട് ജില്ലകളിലാണ് അന്ന് പോളിങ്ങ്. ഡിസംബർ 16നാണ് വോട്ടെണ്ണൽ.
വോട്ടിങ് ശതമാനം
| ജില്ല | വോട്ടിങ് നില |
| തിരുവനന്തപുരം | 69.07 % |
| കൊല്ലം | 72.79 % |
| പത്തനംതിട്ട | 69.33 % |
| ആലപ്പുഴ | 76.42 % |
| ഇടുക്കി | 73.99 % |
| തിരുവനന്തപുരം കോർപറേഷൻ | 59.02 % |
| കൊല്ലം കോർപറേഷൻ | 65.11 % |
| ആകെ | 72.03 % |
Live Updates
- 8 Dec 2020 4:46 AM GMT
പത്തനംതിട്ടയിൽ യന്ത്രത്തകരാർ കാരണം രണ്ട് ബൂത്തുകളിൽ വേട്ടെടുപ്പ് ഇതുവരെ ആരംഭിച്ചില്ല. കോട്ടാങ്ങൽ പഞ്ചായത്തിലെ 10, 6 വാർഡുകളിലെ ചുങ്കപ്പാറ സെൻറ് ഹൈസ്കൂൾ, സി.എം.എസ്.എൽ.പി സ്കൂൾ എന്നിവിടങ്ങളിലാണ് വോട്ടിങ് മുടങ്ങിയിരിക്കുന്നത്.
- 8 Dec 2020 4:44 AM GMT
എൽ.ഡി.എഫ് മികച്ച വിജയം നേടും - മന്ത്രി ജെ. മേഴ്സിക്കുട്ടിയമ്മ
തെരഞ്ഞെടുപ്പിൽ എൽ.ഡി.എഫ് മികച്ച വിജയം നേടുമെന്ന് മന്ത്രി ജെ. മേഴ്സിക്കുട്ടിയമ്മ. ബി.ജെ.പിയും യു.ഡി.എഫും നുണപ്രചാരണങ്ങളുമായാണ് തെരഞ്ഞെടുപ്പിനെ നേരിടുന്നത്. അതിനുള്ള തക്കതായ മറുപടി ജനം നൽകുമെന്നും വോട്ട് രേഖപ്പെടുത്തിയ ശേഷം മന്ത്രി പറഞ്ഞു.
8 Dec 2020 4:21 AM GMTഹരിപ്പാട് മഹാദേവികാട് എസ്.എൻ.ഡി.പി ഹയർ സെക്കൻഡറി സ്കൂളിൽ വോട്ട് ചെയ്യാനെത്തിയ കളത്തിപ്പറമ്പിൽ ബാലൻ (62) കുഴഞ്ഞുവീണ് മരിച്ചു. ബൂത്തിലേക്ക് പ്രവേശിക്കുന്നതിന് മുമ്പാണ് സംഭവം.
- 8 Dec 2020 4:17 AM GMT
ചെങ്ങന്നൂരിൽ പുലിയൂർ ഗവ. എച്ച്.എസ്.എസിലെ ബൂത്തിൽ യന്ത്രം തകരാറിലായതോടെ വോട്ടിങ് തുടങ്ങാനായില്ല.
- 8 Dec 2020 4:00 AM GMT
തിരുവനന്തപുരം കല്ലറ പഞ്ചായത്തിൽ മിതൃമ്മല വാർഡിൽ യു.ഡി.എഫ് സ്ഥാനാർഥിയുടെ ബൂത്ത് ഓഫിസ് പൊലീസെത്തി ഒഴിപ്പിച്ചു. പോളിങ് സ്റ്റേഷന് അടുത്തായതിനാലാണ് ഓഫിസ് ഒഴിപ്പിച്ചത്.
- 8 Dec 2020 3:57 AM GMT
തിരുവനന്തപുരം മോഡൽ സ്കൂളിലെ ബൂത്ത് നമ്പർ ആറിലെ വോട്ടുയന്ത്രം കേടായതിനെ തുടർന്ന് വോട്ട് ചെയ്യാൻ കാത്തു നിൽക്കുന്നവർ
- 8 Dec 2020 3:53 AM GMT
ചിഹ്നം പതിച്ച മാസ്ക്കുമായി പ്രിസൈഡിംഗ് ഓഫിസർ
അരിവാൾ ചുറ്റിക നക്ഷത്രം പതിച്ച മാസ്ക്കുമായി പ്രിസൈഡിംഗ് ഓഫിസർ ജോലിക്കെത്തിയെന്ന് യു.ഡി.എഫ് പ്രവർത്തകരുടെ പരാതി. കൊല്ലം കൊറ്റങ്കരയിലാണ് സംഭവം. ഇവർക്കെതിരെ തെരഞ്ഞെടുപ്പ് കമീഷന് പരാതി നൽകിയതായി ഡി.സി.സി പ്രസിഡൻറ് ബിന്ദു കൃഷ്ണ അറിയിച്ചു. തുടർന്ന് ഇവരുടെ മാസ്ക് മാറ്റിച്ചു.
- 8 Dec 2020 3:36 AM GMT
ചീഫ് ഏജൻറിനെ പുറത്താക്കി
ആലപ്പുഴ നഗരസഭ പാലസ് വാർഡിലെ സി.എം.എസ്.എൽ.പി സ്കൂളിലെ ബൂത്തിൽ ചീഫ് ഏജൻറിനെ പുറത്താക്കി. സ്വതന്ത്ര സ്ഥാനാർത്ഥിയുടെ ചീഫ് ഏജൻറിനെയാണ് പുറത്താക്കിയത്. ബൂത്തിൽ വോട്ട് ക്യാൻവാസിന് ശ്രമിച്ചു എന്ന മറ്റ് രാഷ്ട്രീയ പാർട്ടി പ്രതിനിധികളുടെ പരാതിയെത്തുടർന്ന് പൊലീസ് ഇടപെട്ടാണ് ഇയാളെ പുറത്താക്കിയത്.
- 8 Dec 2020 3:34 AM GMT
മണ്ണഞ്ചേരി 19ാം വാർഡ് ഒന്നാം നമ്പർ ബൂത്ത് കമ്മ്യൂണിറ്റി ഹാളിൽ യന്ത്രത്തകരാർ കാരണം ഇതുവരെ വോട്ടിംഗ് തുടങ്ങാൻ കഴിഞ്ഞിട്ടില്ല.
- 8 Dec 2020 3:33 AM GMT
മന്ത്രിയുടെ ബൂത്തിൽ വോട്ടിങ് വൈകി
മന്ത്രി പി. തിലോത്തമൻ വോട്ടു ചെയ്യുന്ന ചേർത്തല സൗത്ത് പഞ്ചായത്തിലെ വി.വി ഗ്രാമം ഒന്നാം നമ്പർ ബൂത്തിൽ യന്ത്രത്തകരാർ കാരണം വോട്ടിങ് താമസിച്ചാണ് ആരംഭിച്ചത്.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.
