സൈന്യം സജ്ജം; ഇറാനെ ആക്രമിക്കാൻ ട്രംപ് മൂളിയാൽ മതിയെന്ന് റിപ്പോർട്ട്

തെഹ്റാൻ: ഇറാനെ ഈ ആഴ്ച്ച തന്നെ ആക്രമിക്കാൻ യു.എസ് സൈന്യം സജ്ജമാണെന്ന് വാർത്താമാധ്യമങ്ങളായ സി.എൻ.എൻ, സി.ബി.എസ് എന്നിവയുടെ റിപ്പോർട്ടുകൾ. എന്നാൽ വിഷയത്തിൽ യു.എസ് പ്രസിഡന്റ് ഡോണൾഡ് ട്രംപ് ഇതുവരെ അന്തിമ തീരുമാനം എടുത്തിട്ടില്ല. ഇതിനോടകം യു.എസിന്‍റെ യുദ്ധക്കപ്പലുകൾ, യുദ്ധവിമാനങ്ങൾ, ഇന്ധനം നിറക്കുന്ന വിമാനങ്ങൾ എന്നിവയുൾപ്പെടെ പശ്ചിമേഷ്യയിൽ വൻതോതിൽ സൈനിക വിന്യാസം നടത്തിയതിന് പിന്നാലെയാണ് റിപ്പോർട്ടുകൾ പുറത്തുവന്നത്.

സി.എൻ.എൻ റിപ്പോർട്ട് പ്രകാരം ഈ വാരാന്ത്യത്തോടെ സൈന്യം ആക്രമണത്തിന് തയ്യാറാണെന്ന് വൈറ്റ് ഹൗസിനെ അറിയിച്ചിട്ടുണ്ടെങ്കിലും ട്രംപ് ഇതുവരെ സമ്മതം മൂളിയിട്ടില്ലെന്ന് പറയുന്നു. അമേരിക്കൻ കമാൻഡർ ഇൻ ചീഫ് സൈനിക നടപടിയെ അനുകൂലിച്ചും പ്രതികൂലിച്ചും സംസാരിച്ചതായും തീരുമാനമെടുക്കുന്നതിനായി ഉപദേശകരോടും സഖ്യകക്ഷികളോടും അഭിപ്രായ വോട്ടെടുപ്പ് നടത്തിയതായും റിപ്പോർട്ടിൽ പറയുന്നു.

ഇക്കാര്യത്തിൽ വാരാന്ത്യത്തോടെ ട്രംപ് തീരുമാനമെടുക്കുമോ എന്ന് വ്യക്തമല്ല. അദ്ദേഹം ഇതിനെക്കുറിച്ച് ചിന്തിക്കാൻ ധാരാളം സമയം ചെലവഴിക്കുകയാണെന്നാണ് പ്രാഥമിക വിവരം.