ലേലത്തിലൂടെ ലോകേഷ്​ രാഹുൽ സമാഹരിച്ച എട്ടുലക്ഷം രൂപ പാവപ്പെട്ട കുട്ടികൾക്ക്​

ബംഗളൂരു: 2019 ഏകദിന ലോകകപ്പിൽ ഉപയോഗിച്ച ബാറ്റടക്കം തൻെറ കിറ്റിലെ വസ്​തുക്കൾ ലേലത്തിൽ വെച്ച്​ സമാഹരിച്ച എട്ടു ലക്ഷം രൂപ പാവപ്പെട്ട കുട്ടികളുടെ ഉന്നമനത്തിനായി സംഭാവന ചെയ്യുകയാണ്​ ഇന്ത്യൻ ക്രിക്കറ്റ്​ താരം ലേകേഷ്​ രാഹുൽ. കോവിഡ്​ കാരണം ബുദ്ധിമുട്ടിലായ പാവപ്പെട്ട കുട്ടികളെ ‘അവേർ’ ഫൗണ്ടേഷനിലൂടെ സഹായിക്കാനാണ്​ താരം പദ്ധതിയിടുന്നത്​. 2,64,228 രൂപക്കാണ്​ രാഹുലിൻെറ ബാറ്റ്​ ലേലത്തിൽ പോയത്​.

താരത്തിൻെറ ഹെൽമെറ്റ്​ 1,22,677 രൂപക്കും പാഡ്​ 33,028 രൂപക്കും ഏകദിന ജഴ്​സി 1,13,240 രൂപക്കും ട്വൻറി20 ജഴ്​സി 1,04,824 രൂപക്കും ടെസ്​റ്റ്​ ജഴ്​സി 1,32,774 രൂപക്കും ഗ്ലൗസ്​ 28,782 രൂപക്കുമാണ്​ ലേലത്തിൽ പോയത്​. ഇന്ത്യൻ ക്രിക്കറ്റ്​ ടീമിൻെറ ആരാധക കുട്ടായ്​മയായ ഭാരത്​ ആർമിയുമായി സഹകരിച്ചാണ്​ ലേലം സംഘടിപ്പിച്ചത്​. ഈ വർഷം ഐ.പി.എല്ലിൽ കിങ്​സ്​ ഇലവൻ പഞ്ചാബിൻെറ നായകനായിരുന്നു രാഹുൽ. കുടുംബസമേതം ബംഗളൂരുവിലാണ്​ രാഹുലിപ്പോൾ.