ഇന്ത്യയോ ന്യൂസിലൻഡോ; ലോക ടെസ്​റ്റ്​ ചാമ്പ്യൻഷിപ്പ്​ ഫൈനൽ സമനിലയിലായാൽ വിജയി ആര്​?

സതാംപ്​റ്റൺ: ഇന്ത്യയും ന്യൂസിലൻഡും തമ്മിലുള്ള ലോക ടെസ്​റ്റ്​ ചാമ്പ്യൻഷിപ്പ്​ ഫൈനലി​െൻറ രണ്ട്​ ദിവസങ്ങൾ മഴയിൽ ഒലിച്ചു പോയിരുന്നു. ജൂൺ 23ന്​ റിസർവ്​ ദിനം അനുവദിക്കുകയാണെങ്കിൽ കൂടി മത്സരം സമനിലയിലേക്കാണെന്നാണ്​ സൂചനകൾ.

തിങ്കളാഴ്ച​ നാലാം ദിനം മഴ മൂലം ഒരു പന്തുപോലും എറിയാൻ സാധിച്ചിരുന്നില്ല. കളിയുടെ ആദ്യ ദിവസവും മഴമൂലം ഉപേക്ഷിക്കുകയായിരുന്നു. ഏജീസ്​ ബൗളിൽ ഇതുവരെ 141.1 ഓവർ മാത്രമാണ്​ കളി നടന്നത്​. മൂന്നാം ദിനം ഇന്ത്യയെ 217 റൺസിന്​ പുറത്താക്കിയ ന്യൂസിലൻഡ്​ മറുപടി ബാറ്റിങ്ങിൽ രണ്ടിന്​ 101റൺസുമായി മേൽക്കൈ നേടി നിൽക്കുകയാണ്​.

രണ്ട്​ മത്സരദിനങ്ങൾ നഷ്​ടമായതിനാൽ റിസർവ്​ ദിനം അനുവദിക്കുമെന്നാണ്​ ഐ.സി.സി അറിയിച്ചിരിക്കുന്നത്​. അഞ്ചാം ദിവസത്തി​െൻറ അവസാന മണിക്കൂറിലാകും ഇതു സംബന്ധിച്ച ഔദ്യോഗിക തീരുമാനം മാച്ച്​ റഫറി അറിയിക്കുക. അഞ്ച്​ ദിവസം 30 മണിക്കൂർ കളി നടന്നില്ലെങ്കിൽ റിസർവ്​ ദിനം അനുവദിക്കുമെന്നാണ്​.

എന്നാൽ മത്സരം സമനിലയിലായാൽ ആരാകും വിജയികളാകുകയെന്നതാകും ഏവർക്കും സംശയം. മത്സരം സമനിലയിലായാൽ ഇന്ത്യയും ന്യൂസിലൻഡും സംയുക്ത ജേതാക്കളാകുമെന്ന്​ ഐ.സി.സി സ്​ഥിരീകരിച്ചു. 2019ൽ ആരംഭിച്ച ടൂർണമെൻറി​െൻറ വിജയികൾക്ക്​ 1.6 ദശലക്ഷം ഡോളറും രണ്ടാം സ്​ഥാനക്കാർക്ക്​ 800,000 ഡോളറുമാണ്​ സമ്മാനത്തുക. മത്സരം സമനിലയിലായാൽ സമ്മാനത്തുക ഫൈനലിസ്​റ്റുകൾ പങ്കി​ട്ടെടുക്കും.

ആറ്​ പരമ്പരകളിൽ നിന്നായി 12 മത്സരങ്ങൾ വിജയിച്ചാണ്​ ഇന്ത്യ ടെസ്​റ്റ്​ ചാമ്പ്യൻഷിപ്പി​െൻറ കലാശക്കളിക്ക്​ യോഗ്യത നേടിയത്​. അതേ സമയം അഞ്ച്​ പരമ്പരകളിൽ നിന്ന്​ ഏഴ്​ വിജയങ്ങളുമായിലട്ടാണ്​ കിവീസി​െൻറ വരവ്​.