മുൻ ഇന്ത്യൻ താരം വിനയ്​ കുമാർ ക്രിക്കറ്റിൽനിന്ന്​ പടിയിറങ്ങി

ബംഗളൂരു: മുൻ ഇന്ത്യൻ പേസ്​ ബൗളർ വിനയ്​ കുമാർ സജീവക്രിക്കറ്റിൽനിന്ന്​ വിരമിച്ചു. രാജ്യാന്തര മത്സരങ്ങൾ ഉൾപ്പെടെ ക്രിക്കറ്റിന്‍റെ മുഴുവൻ ഫോർമാറ്റിൽനിന്നും പടിയിറങ്ങുന്നതായി 37കാരനായ വിനയ്​ ട്വിറ്ററിലാണ്​ അറിയിച്ചത്​.

'അനിൽ കും​​െബ്ല, രാഹുൽ ദ്രാവിഡ്​, എം.എസ്​. ധോണി, വീരേന്ദർ സെവാഗ്​, ഗൗതം ഗംഭീർ, വിരാട്​ കോഹ്​ലി, സുരേഷ്​ റെയ്​ന, രോഹിത്​ ശർമ തുടങ്ങിവർക്കൊപ്പം കളിക്കാൻ കഴിഞ്ഞ കരിയറിലെ അനുഭവങ്ങൾ വിലപ്പെട്ടതാണ്​. മുംബൈ ഇന്ത്യൻസിൽ സചിൻ ടെണ്ടുൽകറുടെ അനുഗ്രഹാശിസ്സുകൾക്ക്​ കീഴിലും കളിക്കാൻ കഴിഞ്ഞു. കഴിഞ്ഞ 25 വർഷമായി ക്രിക്കറ്റ്​ ജീവിതത്തിലെ നിരവധി സ്​റ്റേഷനുകളിലൂടെ ഓടിക്കൊണ്ടിരുന്ന 'ദാവൺഗരെ എക്​സ്​പ്രസ്​' ഇന്ന്​ 'റിട്ടയർമെന്‍റ്' എന്ന സ്​റ്റേഷനിൽ ​ എത്തിനിൽക്കുകയാണ്​. സമ്മിശ്രമായ വികാരങ്ങളോടെ ആർ. വിനയ്​ കുമാർ എന്ന ഞാൻ രാജ്യാന്തര മത്സരങ്ങളിൽനിന്നും ഫസ്റ്റ്​ക്ലാസ്​ ക്രിക്കറ്റിൽനിന്നും പടിയിറങ്ങിയതായി അറിയിക്കുന്നു. എടുക്കാൻ എളുപ്പമായിരുന്നില്ല ഈ തീരുമാനമെങ്കിലും എല്ലാ കായികതാരങ്ങളുടെയും ജീവിതത്തിൽ ഇതുപോലെ വിരാമം കുറിക്കേണ്ട ഒരു സന്ദർഭമുണ്ടാകും'- വിരമിക്കൽ പ്രഖ്യാപിച്ച്​ ട്വിറ്ററിൽ പോസ്റ്റ്​ ചെയ്​ത കുറിപ്പിൽ വിനയ്​ വ്യക്​തമാക്കി.

കർണാടക ദാവൺഗരെ സ്വദേശിയായ വിനയ്​ ഒരു ടെസ്റ്റിലും 31 ഏകദിനങ്ങളിലും ഇന്ത്യക്കുവേണ്ടി പന്തെറിഞ്ഞിട്ടുണ്ട്​. 99 ഫസ്റ്റ്​ക്ലാസ്​ മത്സരങ്ങളും 114 ലിസ്റ്റ്​ എ മത്സരങ്ങളും കളിച്ചു. ഐ.പി.എല്ലിൽ റോയൽ ചാലഞ്ചേഴ്​സ്​ ബംഗളൂരു, കൊച്ചി ടസ്​കേഴ്​സ്​, കൊൽക്കത്ത നൈറ്റ്​റൈഡേഴ്​സ്​, മുംബൈ ഇന്ത്യൻസ്​ ടീമുകൾക്ക്​ വേണ്ടി പന്തെറിഞ്ഞു. 2004 മുതൽ 2019 വരെ ആഭ്യന്തര ക്രിക്കറ്റിൽ കർണാടകയുടെ മുന്നണിപ്പോരാളിയായിരുന്ന വിനയ്​, കഴിഞ്ഞ രണ്ടു വർഷമായി പോണ്ടിച്ചേരിക്കു വേണ്ടിയാണ്​ കളത്തിലിറങ്ങിയിരുന്നത്​.