ഒന്നേ മുക്കാൽ ദിവസം, 842 പന്തുകൾ മാത്രം; മൊടേരയിലെ പിച്ചിനുനേരെ​ വിമർശനങ്ങളുടെ ബൗൺസറുകൾ

വീമ്പുപറഞ്ഞെത്തിയ ഇംഗ്ലണ്ട്​ നിരയെ വൻതോൽവിയുടെ ആഴക്കയത്തിലേക്ക്​ എടുത്തെറിയാൻ തുണച്ച മൊടേരയിലെ പിച്ചാണിപ്പോൾ ഇന്ത്യൻ ക്രിക്കറ്റിലെ സംസാരവിഷയം. അഞ്ചു ദിവസം കൊണ്ട്​ കളിച്ചുതീർക്കേണ്ട ടെസ്റ്റ്​ മത്സരം വെറും ഒന്നേമുക്കാൽ ദിവസം കൊണ്ട്​ ചുരുട്ടിക്കെട്ടുന്നതിൽ ഈ പിച്ചാണ്​ പ്രധാന 'കളി'കളിച്ചത്​. ഇന്ത്യൻ ടീമിന്‍റെ അത്യുജ്ജ്വല ജയത്തെ ​പ്രകീർത്തിക്കു​േമ്പാൾതന്നെ, നരേന്ദ്ര മോദി സ്​റ്റേഡിയത്തിലെ നടുമുറ്റം അതിനൊരുക്കിയ അനിതരസാധാരണമായ പിന്തുണയും അതേയളവിൽ ചർച്ച ചെയ്യപ്പെടുകയാണ്​​.

സ്​പിന്നിനെ അത്രമേൽ അകമഴിഞ്ഞ്​ തുണച്ച സ്​റ്റേഡിയത്തിൽ, പിച്ചിലെ ചതിക്കുഴികളിൽ വെട്ടിത്തിരിഞ്ഞ്​ ഗതിമാറിയ പന്തുകൾക്ക്​ മുന്നിൽ ജോ റൂട്ടിന്‍റെ പ്രതീക്ഷകൾ വേരറ്റുപോയപ്പോൾ ഇന്ത്യ പത്തുവിക്കറ്റിന്‍റെ മിന്നുംജയം പിടിച്ചെടുക്കുകയായിരുന്നു. 2700 പന്തുകൾ എറിയാവുന്ന ടെസ്റ്റ്​ മത്സരത്തിൽ കൃത്യം 842ാം പന്തിൽ വിജയ റൺ പിറന്നു. അത്രമാത്രമേ അഹ്​മദാബാദിലെ അങ്കം​ നീണ്ടുനിന്നു​ള്ളൂ. ഇതിലും വേഗത്തിൽ 'കഥകഴിഞ്ഞ' ആറു ടെസ്​റ്റുകൾ മാത്രമേ ചരിത്രത്തിൽ ഉണ്ടായിട്ടുള്ളൂ. അവയിൽ ഏറ്റവും അവസാനത്തേത്​ 1935 ജനുവരിയിലായിരുന്നു. ആറിൽ രണ്ടു ടെസ്റ്റുകൾ 1888 ആഷസ്​ പരമ്പരയിലും. ബൗളിങ്ങിന്‍റെ ബ്രാഡ്​മാൻ എന്നറിയപ്പെട്ട ജോർജ്​ ലോമാൻ പന്തെറിഞ്ഞവയായിരുന്നു ആ രണ്ടു ടെസ്​റ്റുകൾ.

ലോകത്ത്​ ഏറ്റവുമധികം കാണികൾക്ക്​ ഇരിക്കാൻ കഴിയുന്നതെന്ന വിശേഷണത്തോടെ നവീകരിച്ച്​, പ​േട്ടലി​േന്‍റതുമാറ്റി മോദിയുടെ പേരു നൽകിയ മൊ​ടേര സ്​റ്റേഡിയത്തിലെ കന്നി മാച്ചിൽ സ്​പിന്നർമാർക്ക്​ ചാകരയായിരുന്നു. അത്രവലിയ പ്രതിഭാസമ്പത്തും മാന്ത്രികതയുമൊന്നും കൈവിരലുകളിലാവാഹിച്ചിട്ടില്ലെങ്കിലും അക്ഷർ പ​േട്ടലിന്​ ​വരെ കൈനിറയെ വിക്കറ്റ്​ കിട്ടി. പിച്ചിലെ​ അസാധാരണ ടേണും ​തെന്നുന്ന വേഗവുമൊക്കെച്ചേർന്നപ്പോൾ പന്തെടുത്ത സ്​പിന്നർമാരൊക്കെ വെളിച്ചപ്പാടുകളായി. സ്​പെഷലിസ്റ്റ്​ സ്​പിന്നർമാരുടെ അഭാവത്താൽ ഗത്യന്തരമില്ലാതെ പന്തെടുക്കേണ്ടിവന്ന ജോ റൂട്ട്​ ഇന്ത്യയുടെ ഒന്നാമിന്നിങ്​സിൽ എട്ടു റൺസ്​ മാത്രം വിട്ടുകൊടുത്ത്​ പിഴുതത്​ അഞ്ചുവിക്കറ്റ്​. ഇത്തരം പിച്ചുകളിലായിരുന്നു അനിൽ കും​െബ്ലയും ഹർഭജൻ സിങ്ങും പന്തെറിഞ്ഞിരുന്നതെങ്കിൽ അവർക്ക്​ കരിയറിൽ ആയിരം ടെസ്റ്റ്​ വിക്കറ്റുകളുണ്ടാകുമായിരുന്നുവെന്ന്​ മുൻ ഇന്ത്യൻ താരം യുവരാജ്​ സിങ്​ കളിയാക്കിപ്പറയുന്നു.

ഒ​േട്ടറെ മുൻ താരങ്ങൾ ടെസ്റ്റ്​ മത്സരങ്ങൾക്ക്​ യോജിച്ചതല്ല ഈ വിക്കറ്റെന്ന്​ കുറ്റപ്പെടുത്തി രംഗത്തുവന്നിട്ടുണ്ട്​. 'ഇത്​ മാതൃകാപരമായ പിച്ചല്ല. ഒന്നാമിന്നിങ്​സിൽ ഇംഗ്ലണ്ട്​ 200 റൺസെടുത്തിരുന്നെങ്കിൽ ഇന്ത്യയും കുഴങ്ങിയേനേ'-ഹർഭജൻ സിങ്​ ട്വീറ്റ്​ ചെയ്​തു. മൊ​ടേരയിലേത്​ ടെസ്റ്റ്​ മത്സരത്തിനു പറ്റിയ പിച്ചല്ലെന്നും ഒന്നാമിന്നിങ്​സിൽ ഇന്ത്യ വരെ തകർന്നുപോയെന്നും വി.വി.എസ്​ ലക്ഷ്​മൺ ചൂണ്ടിക്കാട്ടി.

ഇത്തരം പിച്ചുകളിലാണ്​ കളിക്കുന്നതെങ്കിൽ ഓരോ ടീമിനും മൂന്ന്​ ഇന്നിങ്​സുകൾ നൽകേണ്ടിവരുമെന്ന്​ മുൻ ഇംഗ്ലണ്ട്​ ക്യാപ്​റ്റൻ മൈക്കൽ ​വോൻ ട്വീറ്റ്​ ചെയ്​തു. ഹിന്ദിയിലെഴുതിയ കുറിപ്പിൽ, മുൻ ഇംഗ്ലണ്ട്​ നായകൻ കെവിൻ പീറ്റേഴ്​സണും പിച്ചിനെ നിശിതമായി വിമർശിച്ചു. ടെസ്റ്റ്​ മത്സരം രണ്ടു ദിവസം കൊണ്ട്​ അവസാനിക്കുന്ന തരത്തിലുള്ള പിച്ചല്ല ക്രിക്കറ്റ്​ ആരാധകർ ആഗ്രഹിക്കുന്നതെന്ന്​ മുൻ ഇന്ത്യൻ ഓൾറൗണ്ടർ ഇർഫാൻ പത്താൻ അഭിപ്രായപ്പെട്ടു.

എന്നാൽ, ഇത്രയും ഗംഭീര വിജയം സമ്മാനിച്ച 'മൊടേരപ്പിച്ചി'നെ തള്ളിപ്പറയാൻ ഇന്ത്യൻ ക്യാപ്​റ്റൻ വിരാട്​ കോഹ്​ലി തയാറല്ല. ബാറ്റ്​ ചെയ്യാൻ വളരെ നല്ല പിച്ചെന്നാണ്​ നായകൻ നൽകുന്ന സർട്ടിഫിക്കറ്റ്​. ക്യാപ്​റ്റനെ പിന്തുണച്ച്​ രോഹിത്​ ശർമയും അതുതന്നെ പറയുന്നു. ഇത്തരം പിച്ചുകൾ തയാറാക്കുന്നത്​ നിയമങ്ങൾക്ക്​ എതിരല്ല എന്നതിനാൽ, ഐ.സി.സിയാണ്​ ഇക്കാര്യത്തിൽ തീരുമാനമെടുക്കേണ്ടതെന്നാണ്​ ജോ റൂട്ടിന്‍റെ പക്ഷം.