സ്വന്തം മണ്ണിലെ തുടർച്ചയായ 13ാം പരമ്പര വിജയം; ചരിത്രം രചിച്ച്​ ടീം ഇന്ത്യ

ന്യൂഡൽഹി: ഇംഗ്ലണ്ടിനെതിരായ ടെസ്റ്റ്​ പരമ്പരയിൽ 3-1ന്​ വിജയിച്ച ഇന്ത്യൻ ക്രിക്കറ്റ്​ ടീം തങ്ങളുടെ ലോക റെക്കോഡ്​ ഒന്ന്​ കൂടി മെച്ചപ്പെടുത്തി.

സ്വന്തം മണ്ണിൽ ഇന്ത്യ നേടുന്ന തുടർച്ചയായ 13ാം ടെസ്​റ്റ്​ പരമ്പര വിജയമാണിത്​. മൊ​േട്ടര സ്​റ്റേഡിയത്തിൽ നടന്ന നാലാം ടെസ്റ്റിൽ ഇന്നിങ്​സിനും 25 റൺസിനും വിജയിച്ചാണ്​ ഇന്ത്യ പരമ്പരയും ലോക ടെസ്റ്റ്​ ചാമ്പ്യൻഷിപ്പിന്‍റെ ഫൈനൽ ബെർത്തും സ്വന്തമാക്കിയത്​.

2013ൽ ആസ്​ട്രേലിയയെ 4-0ത്തിന്​ തകർത്തായിരുന്നു സ്വന്തം മണ്ണിലെ ഇന്ത്യൻ പ്രയാണത്തിന്‍റെ തുടക്കം.

എട്ട്​ വർഷ കാലയളവിനിടെ പാകിസ്​താൻ ഒഴികെ എട്ട്​ ടെസ്റ്റ്​ രാജ്യങ്ങളെ ഇന്ത്യ പരാജയപ്പെടുത്തി. 2013ന്​ ശേഷം ആസ്​ട്രേലിയയെയും ഇംഗ്ലണ്ടിനെയും രണ്ടുതവണ ഇന്ത്യ പരാജയപ്പെടു​ത്തിയിട്ടുണ്ട്​. 2012-13 സീസണിൽ ഇംഗ്ലണ്ടിനെതിരെയായിരുന്നു ഇന്ത്യയുടെ അവസാന ഹോം പരാജയം.

1994-2001, 2004-2008 കാലയളവുകളിൽ തുടർച്ചയായ 10 ഹോം പരമ്പര വിജയങ്ങളുമായി ആസ്​ട്രേലിയയായിരുന്നു മുമ്പ്​ റെക്കോഡ്​ അലങ്കരിച്ചിരുന്നത്​.

ലോക ടെസ്റ്റ്​ ചാമ്പ്യൻഷിപ്പിലെ ഏറ്റവും മികച്ച ടീമായാണ്​ ഇന്ത്യ ഫൈനലിലെത്തിയത്​. 2019 ആഗസ്റ്റ്​ മുതൽ 17 ടെസ്റ്റുകൾ കളിച്ച ഇന്ത്യ 12 ജയം സ്വന്തമാക്കി. നാലെണ്ണം തോറ്റപ്പോൾ ഒരു മത്സരം സമനിലയിലാക്കി. ഒന്നാം സ്​ഥാനത്തുള്ള ഇന്ത്യക്ക്​ 520 പോയന്‍റും രണ്ടാം സ്​ഥാനത്തുള്ള ന്യൂസിലൻഡിന്​ 420 പോയന്‍റുമാണുള്ളത്​. ജൂണിൽ ലോഡ്​സിൽ വെച്ചാണ്​ ഫൈനൽ.

വെസ്റ്റിൻഡീസ്​, ദക്ഷിണാഫ്രിക്ക, ബംഗ്ലാദേശ്​, ഇംഗ്ലണ്ട്​ എന്നീ ടീമുകളെ ഹോം ഗ്രൗണ്ടിൽ പരാജയപ്പെടുത്തിയ ഇന്ത്യ ആസ്​ട്രേലിയയെ അവരുടെ മണ്ണിൽ പോയി തുരത്തി.

വിൻഡീസിനും ബംഗ്ലാദേശിനുമെതിരെ ഇന്ത്യ രണ്ട്​ ടെസ്റ്റുകൾ വീതം വിജയിച്ചു. ദക്ഷിണാഫ്രിക്കയെയും ഇംഗ്ലണ്ടിനെയും മൂന്ന്​ മത്സരങ്ങളിലാണ്​ കീഴടക്കിയത്​. ഈ വർഷം ജനുവരിയിൽ സിഡ്​നിയിൽ ഓസീസിനെതിരെയായിരുന്നു ഏക സമനില.

അഹമദാബാദിൽ കളിച്ച അവസാന രണ്ട്​ ടെസ്​റ്റ്​ മത്സരങ്ങളും ഇന്ത്യ വെറും അഞ്ച്​ ദിവസത്തിനുള്ളിൽ ജയിച്ചിരുന്നു. ഇരുജയങ്ങൾക്കുമായി ഒരു ടെസ്റ്റ്​ മത്സരത്തിന്‍റെ ദൈർഖ്യമായ അഞ്ച്​ ദിവസം മാത്രമാണ്​ എടുത്തതെന്ന കാര്യം​ ഇന്ത്യൻ ടീമിന്‍റെ ശക്​തി വിളിച്ചോതുന്നു.