ദുരിതങ്ങളുടെ എരിതീയിൽ എണ്ണയൊഴിക്കരുത്​

അഞ്ചു സംസ്ഥാനങ്ങളിലെ നിയമസഭ ​തെരഞ്ഞെടുപ്പുകൾ കഴിഞ്ഞ ദിവസം പൂർത്തിയായപ്പോൾ ഇന്ത്യക്കാരുടെ ഉദ്വേഗം പത്താം തീയതി വരാനിരിക്കുന്ന വോട്ടെടുപ്പു ഫലത്തിലല്ല. അവരെ അസ്വസ്ഥപ്പെടുത്തുന്നതത്രയും​ ഇത്രനാൾ പിടിച്ചുവെച്ച ഇന്ധനവില നിയ​ന്ത്രണം സർക്കാർ എടുത്തുകളയുന്നതോടെ വാണം കണക്കെ കുതിക്കാനിടയുള്ള വിലവർധനയുടെ ആശങ്കയാണ്​. ഇന്ത്യയിൽ ഇന്ധനവില നിയന്ത്രണം സ്വകാര്യകമ്പനികൾക്കു തീറെഴുതിയതിൽ പിന്നെ അതിനെ പിടിച്ചുകെട്ടാനുള്ള ആയുധമൊന്നും ഗവൺമെന്‍റിന്‍റെ കൈയിലില്ല.

എന്നുതന്നെയല്ല, അതിനെ കയറഴിച്ചുവിടുന്നതാണ്​ പുതിയ സർക്കാർ നയം. ആകപ്പാടെ അവരുടെ മൂക്കുകയറിൽ ഗവൺ​മെന്‍റ്​ പിടികൂടുന്നത്​ ​തെരഞ്ഞെടുപ്പുകൾ പടിവാതിൽക്കലെത്തുമ്പോഴാണ്​. വിലക്കയറ്റം മൂലമു​ള്ള ജനരോഷം വോട്ടെടുപ്പിൽ പ്രതിഫലിക്കാതെ​ നോക്കാൻ അവർ കമ്പനികളുമായി ധാരണയി​ലെത്തുന്നു. കമ്പനികൾക്കാകട്ടെ, കച്ചവടം വിഘ്നം കൂടാതെ നടന്നുകിട്ടാൻ ഭരണകൂടത്തിന്‍റെ താൽപര്യങ്ങൾ പരിഗണിക്കേണ്ടിയും വരും. ഇങ്ങനെയുള്ള ഗവൺമെന്‍റ്​-കോർപറേറ്റ്​ പരസ്പര സഹായസഹകരണമാണ്​ ഇന്ധനവില നിർണയത്തിൽ ഏതാനും വർഷങ്ങളായി നടന്നുവരുന്നത്​. അതുകൊണ്ട്​, ​തെരഞ്ഞെടുപ്പു കഴിയാൻ അക്ഷമയോടെ കാത്തിരിക്കുകയാണ്​ കമ്പനികൾ; പെട്രോൾ, ഡീസൽ വില ഒന്നു വർധിപ്പിക്കാൻ.

കഴിഞ്ഞ നാലു മാസമായി വർധനയില്ലാത്തതിനാൽ വന്നുചേർന്ന നഷ്ടം മുഴുവൻ എത്രയും വേഗം ജനത്തിൽനിന്ന്​ ഈടാക്കാനുള്ള തിടുക്കത്തിലാണ്​ എണ്ണക്കമ്പനികൾ. പെട്രോളിനും ഡീസലിനും ലിറ്ററിന്​ 15 രൂപ വർധിപ്പിച്ചു കിട്ടണമെന്നാണ്​ അവരുടെ ആവശ്യം. അത്​ ഒറ്റയടിക്കു കൂട്ടുന്നതിനുപകരം പ്രതിദിനം അമ്പതു പൈസ ലിറ്ററിന്​ എന്ന തോതിൽ വില വർധിപ്പിക്കാനാണ്​ കമ്പനികൾ ആലോചിക്കുന്നത്​. ​തിടുക്കത്തിൽ കഴുത്തു ഞെരിക്കേണ്ട, പയ്യപ്പയ്യേ ശ്വാസംമുട്ടിച്ചാൽ മതി എന്ന മട്ട്​.

മോങ്ങാനിരുന്നവ​ന്‍റെ തലയിൽ തേങ്ങ വീണതുപോലെയായി വില വർധിപ്പിക്കാൻ തക്കം പാർത്തിരിക്കുന്ന കമ്പനികൾക്ക്​ റഷ്യയുടെ യു​ക്രെയ്​ൻ അധിനിവേശം. അധിനിവേശത്തെ തുടർന്ന്​ അന്താരാഷ്ട്രവിപണിയിൽ എണ്ണയുടെ വില ബാരലിനു 140 യു.എസ്​ ഡോളർ എന്ന കഴിഞ്ഞ 13 വർഷത്തെ ഏറ്റവും ഉയർന്ന നിരക്കി​ലെത്തിയിരിക്കുന്നു. ഇന്ത്യ വാങ്ങുന്ന ക്രൂഡ്​ ഓയിലിനു വില മാർച്ച്​ ഒന്നിനു ബാരലിനു 111 യു.എസ്​ ഡോളർ എന്ന നിരക്കിലെത്തി. നാലു മാസം മുമ്പ്​ വിലവർധന മരവിപ്പിക്കുന്ന സമയത്ത്​ ഇത്​ 81.5 ഡോളർ ആയിരുന്നു. റഷ്യൻ അധിനിവേശത്തെ തുടർന്ന്​ അമേരിക്കയും യൂറോപ്യൻരാഷ്ട്രങ്ങളും പ്രഖ്യാപിച്ച ഉപരോധം അന്താരാഷ്ട്രതലത്തിൽ നിരക്കുവർധനക്ക്​ ആക്കം കൂട്ടി. ആഗോള എണ്ണ വിപണിയിലേക്കുള്ള പത്തു ശതമാനം സംഭാവനയും റഷ്യയുടേതാണ്​. എന്നാൽ, റഷ്യയിൽ നിന്ന്​ എണ്ണയും വാതകവും വളരെക്കുറച്ചു മാത്രമേ ഇന്ത്യ വാങ്ങുന്നുള്ളൂ.

അതിനാൽ, റഷ്യയിൽനിന്നുള്ള ഇറക്കുമതിയിലെ മാറ്റം ഇന്ത്യയെ വലുതായൊന്നും ബാധിക്കാനിടയില്ല. അതേസമയം, എണ്ണവിലയിലെ വർധന ഇന്ത്യയെ പ്രതിസന്ധിയിലാഴ്ത്തും. നമുക്കു വേണ്ട എണ്ണയുടെ 85 ശതമാനം വിദേശത്തുനിന്നു വാങ്ങുന്നതാണ്​. അതുകൊണ്ട്​, അവിടെയുണ്ടാകുന്ന മാറ്റങ്ങളു​ടെ അലയൊലി ഇന്ത്യൻ വിപണിയെ അസ്ഥിരപ്പെടുത്തും. കേന്ദ്ര എണ്ണ മന്ത്രാലയത്തിനു കീഴിലുള്ള ​പെട്രോളിയം പ്ലാനിങ്​ ആൻഡ്​ അനാലിസിസ്​ ​സെൽ (പി.പി.എ.സി) നൽകുന്ന വിവരമനുസരിച്ച്​ മാർച്ച്​ ഒന്നിന്​ ഇന്ത്യ വാങ്ങുന്ന ​ക്രൂഡ്​ ഓയി​ൽ വില ബാരലിന്​ 111 ഡോളർ എത്തി. ഇതുകൂടി ചേർത്തുവെക്കുമ്പോൾ എണ്ണവിലയിൽ ക്രമാതീതമായ വർധന തന്നെ ആശങ്കിക്കേണ്ട നിലയാണ്​.

രാജ്യത്തിന്‍റെ സാമ്പത്തികസ്ഥിതി കൂടുതൽ വഷളാവുകയാണ്​ എന്ന സന്ദേശമാണ്​ രൂപയുടെ കൂടി വരുന്ന മൂല്യത്തകർച്ച. തിങ്കളാഴ്ച രൂപയുടെ മൂല്യം​ ഡോളറിന്​ 76.98 രൂപ എന്ന അതിദയനീയ നിലയിലെത്തിയിരിക്കുകയാണ്​. ഇന്ധന വിലയിലെ വർധന പണപ്പെരുപ്പം കൂട്ടാനും രൂപയുടെ മൂല്യത്തിൽ കൂടുതൽ ഇടിവിനും ഇടയാക്കും. ഊർജമേഖലയുടെ സ്പന്ദനങ്ങളെ ആശ്രയിച്ചുനിൽക്കുന്ന സാധന​, സേവനങ്ങളുടെയൊക്കെ വിലവർധന അതിന്‍റെ സ്വാഭാവികഫലമായിരിക്കും. ഇന്ത്യയുടെ റീ​ട്ടെയിൽ പണപ്പെരുപ്പം റിസർവ്​ ബാങ്ക്​ വരച്ച അതിരടയാളവും കടന്നുകഴിഞ്ഞ ഏഴുമാസത്തെ ഉയർന്ന നിലയിലാണ്​. ഈ ഒരു ഗുരുതരാവസ്ഥ കേന്ദ്രസർക്കാർ എങ്ങനെ പിടിച്ചുകെട്ടും എന്നതിനു ഒരു നിശ്ചയവുമില്ലൊന്നിനും എന്നതാണ്​ നില​.

എല്ലാം കൂടി ഭാരം മുഴുവൻ ജനത്തിന്‍റെ തലയിൽ കെട്ടിവെക്കപ്പെടുകയാണ്. കോവിഡ്​ സൃഷ്ടിച്ച പ്രതിസന്ധിയിൽ തൊഴിലില്ലായ്മ, ഉള്ള തൊഴിലിൽ തന്നെ സുരക്ഷിതത്വവും മതിയായ വേതനവുമില്ലായ്മ, നാൾക്കുനാൾ ഏറിവരുന്ന വിലക്കയറ്റം, കാർഷിക ഉൽപാദനത്തിലും വിപണനത്തിലും കുത്തനെയുണ്ടായ തകർച്ച- ഇതെല്ലം കൂടി തകർത്തുകളഞ്ഞ ശരാശരി ഇന്ത്യക്കാരന്‍റെ മേലാണ്​ എണ്ണവിലക്കയറ്റത്തിന്‍റെ ഇടിത്തീകൂടി വന്നുപതിക്കുന്നത്​. ഒരു ദുരന്തമൊഴിവാക്കാൻ ഭരണകൂടംതന്നെ മനസ്സുവെക്കണം. നിക്ഷിപ്​ത രാഷ്ട്രീയതാൽപര്യം മുൻനിർത്തി നാലുമാസത്തേക്കു നടപ്പിൽവരുത്താവുന്ന നിയന്ത്രണങ്ങളെ, ജനക്ഷേമം മുൻനിർത്തി, ജനങ്ങളുടെ മുതുകൊടിക്കാതെയുള്ള നീക്കുപോക്കുകൾക്കു ഭരണകൂടം തയാറാവണം. എണ്ണവില വർധനയിൽ നികുതിയിളവു വരുത്തുന്നതടക്കമുള്ള ഉപായങ്ങൾ കേന്ദ്ര, സംസ്ഥാന ഭരണകൂടങ്ങൾ പരീക്ഷിക്കാറുണ്ട്​.

തെരഞ്ഞെടുപ്പ്​ പരീക്ഷണത്തിൽ പരാജയമൊഴിവാക്കാൻ കാണിക്കുന്ന ഔത്സുക്യം ജനത്തെ​ അഗ്​നിപരീക്ഷക്കിരയാക്കി തോൽപിക്കാതിരിക്കാൻ രാഷ്ട്രീയ, ഭരണനേതൃത്വം കാണിക്കുമെങ്കിൽ അൽപം ആശ്വാസമായേനെ.