പ്രതീക്ഷ ജനിപ്പിച്ച്​ ഇറാൻ-യു.എസ്​ ചർച്ച

ഒമാൻ മാധ്യസ്ഥ്യത്തിൽ ഇറാനും അമേരിക്കയും തമ്മിൽ നടക്കുന്ന ആണവ നിരായുധീകരണ ചർച്ച നാലാം റൗണ്ട്​ പിന്നിട്ടപ്പോൾ ഇരുപക്ഷവും കൂടുതൽ പ്രതീക്ഷയും ആത്മവിശ്വാസവും പ്രകടിപ്പിച്ചത്​ ഇരുരാജ്യങ്ങൾക്കുമിടയിൽ നിലനിൽക്കുന്ന പിരിമുറുക്കം അയയുന്നതിന്‍റെ സൂചനയായി വിലയിരുത്തപ്പെടുന്നു. മസ്കത്തിൽ ഞായറാഴ്ച ഇറാൻ വിദേശകാര്യ മന്ത്രി അബ്ബാസ്​ അറാഗ്​ഷിയും അമേരിക്കൻ പ്രസിഡന്‍റ്​ ഡോണൾഡ്​ ട്രംപിന്‍റെ പശ്ചിമേഷ്യാ ദൂതൻ സ്റ്റീവ്​ വിറ്റ്​കോഫും തമ്മിൽ നടന്ന ചർച്ച വിഷമകരമെങ്കിലും പ്രയോജനപ്രദം എന്ന്​ ഇറാൻ വിശേഷിപ്പിച്ചപ്പോൾ മു​ന്നോട്ടുള്ള വഴി സംബന്ധിച്ച്​ കൃത്യമായ ധാരണകൾ ഉരുത്തിരിയുന്നതായി അമേരിക്കയും പ്രതികരിച്ചു. ഇരുവിഭാഗത്തിനും മറുപക്ഷത്തിന്‍റെ ധാരണകൾ പരസ്പരം മനസ്സിലാക്കാനും അഭിപ്രായഭേദങ്ങൾക്ക്​ യുക്തിസഹവും വസ്തുനിഷ്ഠവുമായ പരിഹാരവഴികൾ ആരായാനും സംഭാഷണം ഉപകരിച്ചു എന്ന്​ ഇറാൻ വിദേശ മന്ത്രാലയ വക്താവ്​ ‘എക്സി’ൽ കുറിച്ചു. അഞ്ചാംവട്ട ചർച്ച ഒമാൻ തീരുമാനമനുസരിച്ച്​ പിന്നീട്​ നടക്കും. ഇറാനുമായി ബറാക്​ ഒബാമ ഭരണകൂടം എത്തിയ ആണവകരാർ ഒന്നാം വട്ടം ഭരണത്തിലേറിയ ട്രംപ്​ അസാധുവാക്കി, ആ രാജ്യത്തിനെതിരെ ഉപരോധമേർപ്പെടുത്താനുള്ള നീക്കങ്ങളുമായി മുന്നോട്ടുപോകുന്നതിന്‍റെ ഭാഗമായാണ്​ മാസങ്ങൾക്കു മുമ്പേ നിരായുധീകരണ ചർച്ച തുടങ്ങിവെച്ചത്​. ഇറാൻ സമ്പൂർണമായി ആണവ നിരായുധീകരണത്തിനു വിധേയമാകണമെന്നും സമ്പുഷ്ടീകരണത്തിനുള്ള യു​റേനിയം ഇറക്കുമതി​ ചെയ്യുന്ന വിധത്തിലേക്ക്​ രാജ്യം മാറണമെന്നുമാണ്​ ട്രംപിന്‍റെ നിലപാട്​. ചർച്ചയിലെ യു.എസ് പങ്കാളിത്തം സംബന്ധിച്ച അനിശ്ചിതത്വം നീങ്ങാൻ സമയമെടുത്തതിനാൽ മേയ്​ ആദ്യവാരം നിശ്ചയിച്ച ചർച്ച ഞായറാഴ്ചയിലേക്ക്​ മാറ്റിവെക്കുകയായിരുന്നു. ചർച്ചക്കൊടുവിൽ ഇരുവിഭാഗവും പ്രതീക്ഷ പ്രകടിപ്പിച്ചത്​ മഞ്ഞുരുക്കത്തിന്‍റെ ലക്ഷണമാകു​മോ എന്നു നിരീക്ഷകർ ഉറ്റുനോക്കുന്നതും അതുകൊണ്ടാണ്​.

സിവിലിയൻ ആവശ്യങ്ങൾക്കായുള്ള യുറേനിയം സമ്പുഷ്ടീകരണത്തിന്​ ഇറാന്​ നിയമപരമായ അവകാശമുണ്ടെന്നും അത്​ അപഹരിക്കുന്ന ഒരു കരാറിനും വഴങ്ങില്ല എന്നുമാണ്​ തെഹ്​റാന്‍റെ നിലപാട്​. ഇക്കാര്യം ചർച്ചക്കുമുമ്പ്​ വിദേശമന്ത്രി മാധ്യമങ്ങളോട്​ വ്യക്തമാക്കുകയും ചെയ്തു. അക്കാര്യത്തിൽ ഏറെ നേട്ടമുണ്ടാക്കിയ രാജ്യമാണ്​ തങ്ങളുടേത്​. അതിന്​ ആണവ ശാസ്ത്രജ്ഞന്മാരിൽ കുറേ പേരുടെ ചോര വിലയായി നൽകിയാണ്​ ഈ നേട്ടം സ്വന്തമാക്കിയത്​. അതിനാൽ അത് കൈവിടാൻ ഇറാൻ തയാറല്ല. 2015 ലെ ആണവകരാർ അതിന്​ സാധുത നൽകുകയും ചെയ്​തതാണ്​. അ​തേസമയം അമേരിക്കയുടെ പ്രധാന ആവശ്യമായ അണുബോംബ്​ വികസന നിരോധത്തിൽനിന്ന്​ ഒരിക്കലും പിറകോട്ടു പോകില്ലെന്ന്​ ഇറാൻ ഉറപ്പുനൽകുന്നുമുണ്ട്​. എന്നാൽ, ഇറാൻ ആണവപദ്ധതി പൂർണമായും നിശ്ചലമാക്കുകയാണ്​ ലക്ഷ്യമെന്ന്​ അമേരിക്കൻ ദൂതൻ വിറ്റ്കോഫ്​ ആവർത്തിച്ചു. നതാൻസ്​,ഫോർദോ, ഇസ്ഫഹാൻ എന്നിവിടങ്ങളിലെ ആണവപദ്ധതികൾ ഉപേക്ഷിക്കണമെന്ന്​ അവർ നിഷ്കർഷിക്കുന്നു. ഇറാൻ സമ്പുഷ്ടീകരിക്കപ്പെട്ട യുറേനിയം പുറമേ നിന്നു ഇറക്കുമതി ചെയ്താൽ മതിയെന്നാണ്​ യു.എസ്​ സ്​റ്റേറ്റ്​ സെക്രട്ടറി മാർകോ റൂബിയോയുടെ പക്ഷം. ഇറാൻ ഇപ്പോൾ 60 ശതമാനം യുറേനിയം സമ്പുഷ്ടീകരണം നടത്തുന്നുണ്ട്​. അത്​ 90 ശതമാനത്തിൽ കവിയുമ്പോൾ അണുബോംബ്​ നിർമാണത്തിലേക്ക്​ നീങ്ങും. എന്നാൽ, ആയുധനിർമാണത്തിന്​ ഇറാനു പരിപാടിയില്ലെന്ന്​ അന്താരാഷ്ട്ര ആണവോർജ ഏജൻസി ഉറപ്പുപറയുന്നുണ്ട്​.

ഇറാന്‍റെയും അന്താരാഷ്ട്ര ആണവോർജ ഏജൻസിയുടെയും ഉറപ്പൊന്നും ട്രംപ്​ ഗൗനിക്കുന്നില്ല. അദ്ദേഹം രണ്ടാം ഊഴത്തിൽ ഭരണത്തിലിരുന്നു വൈകാതെ ഒപ്പിട്ട ഉത്തരവുകളിലൊന്ന്​ ഇറാന്‍റെ ആണവായുധ ഭീഷണി നേരിടാൻ ‘പരമാവധി സമ്മർദം’ പ്രയോഗിക്കാനാണ്​. ഏറെ വിഷമത്തോടെയാണ്​ ഇത്തരമൊരു തീരുമാനത്തിലെത്തുന്നത്​ എന്നുപറഞ്ഞ ട്രംപ്​, ആണവായുധം നിർമിക്കാത്ത മഹത്തായ രാജ്യമായാണ്​ ഇറാനെ കാണുന്നതെന്നുകൂടി പറഞ്ഞുവെച്ചു. എന്നാൽ, തെഹ്​റാനെതിരായ ട്രംപിന്‍റെ ഗീർവാണങ്ങൾ അപ്പടി കാര്യമായെടുത്ത ‘രാജഭക്തർ’ അദ്ദേഹത്തെയും കവിഞ്ഞു മുന്നോട്ടുപോയി. അങ്ങനെ അതിരുവിട്ടതിന്‍റെ ഫലം കൂടിയായിരുന്നു ദേശീയ സുരക്ഷ ഉപദേഷ്ടാവ്​ ആയിരുന്ന മൈക്​ വാട്ട്​സിന്‍റെ സ്ഥാനചലനം. ഇസ്രായേൽ പ്രധാനമ​ന്ത്രി നെതന്യാഹുവുമായി ചേർന്ന്​ ഇറാനെ അടിക്കാൻ ഏകപക്ഷീയമായി പ്ലാൻ ചെയ്തു എന്ന ആരോപണമാണ്​ മൈക്കിനെതിരെ ഉന്നയിക്കപ്പെട്ടത്​. പെട്ടെന്നൊരു സൈനികനീക്കത്തിന്​ ഒരുക്കമല്ലാത്തതുകൊണ്ടു കൂടിയാണ്​ ഒമാൻ മധ്യസ്ഥതയിലെ ചർച്ചക്ക്​ ​ട്രംപ്​ ഉത്സാഹം കാണിച്ചത്​. അപ്പോഴും ഇറാനെ വിരട്ടിനിർത്താൻ എല്ലാ വഴിയും ആലോചിക്കുന്നുണ്ട്​ ലോകപൊലീസ്​. ഇറാന്‍റെ എണ്ണ കയറ്റുമതി സംപൂജ്യമാക്കി വറ്റിച്ചുകളയുമെന്നാണ്​ അതിൽ പ്രധാനം. ഉപരോധ ഭീഷണിക്കിടയിലും ചൈനയടക്കം ചില രാജ്യങ്ങൾക്ക്​ ഇറാൻ എണ്ണ നൽകുന്നുണ്ട്​. അതും നിർത്താനുള്ള വഴി തേടുകയാണ്​ ഒരു ചൈനീസ്​ കെമിക്കൽ ഗ്രൂപ്പിനെയും മൂന്ന്​ തുറമുഖ ടെർമിനൽ ഓപറേറ്റർമാ​രെയും കരിമ്പട്ടികയിൽപെടുത്തി തീട്ടൂരമിറക്കിയതിലൂടെ. ഇങ്ങനെ പല രീതിയിൽ ഇറാനെ മെരുക്കാനും വഴക്കാനും നോക്കുന്നതിനിടെ, നടന്നുവരുന്ന ഉഭയകക്ഷി ചർച്ചകളിൽ ഇരുവിഭാഗവും പ്രതീക്ഷ പ്രകടിപ്പിക്കുമ്പോൾ അത്​ ശുഭലക്ഷണം തന്നെയായി കരുതുക.