‘അന്ന് കിക്ക്ബോക്സിങ് പരിശീലനത്തിനു മകന് കൂട്ടുപോയ അമ്മ ഇന്ന് അതേ ഇനത്തിൽ അന്തർദേശീയ താരം’

എട്ടര വയസ്സിൽ മകൻ ക്രിസ്​ ജൂബിനെ കിക്ക് ബോക്സിങ്ങിന്​ ചേർക്കാൻ എറണാകുളം ചിറ്റൂർ റോഡിലെ വൈ.എം.സി.എ ജിമ്മിൽ എത്തിയതാണ്​ ഇടപ്പള്ളി സ്വദേശി ആൻ മേരി​ഫിലിപ്. മകന്‍റെ ഇടിയും തൊഴിയും കണ്ട്​ താൽപര്യം തോന്നിയപ്പോൾ അവിടെ തന്നെ അവനൊപ്പം ചേർന്ന്​ പരിശീലനം​ തുടങ്ങി​.

ഫിറ്റ്​നസ്​ നിലനിർത്തുക മാ​ത്രമായിരുന്നു ലക്ഷ്യം. എന്നാൽ അതിൽ ലയിച്ചപ്പോൾ നാലുവർഷത്തെ പരിശീലനം കൊണ്ട്​ 38കാരിയായ ആൻ വാകോ ഇന്ത്യൻ ഓപൺ കിക്ക്​ ബോക്സിങ്​ ചാമ്പ്യൻഷിപ്പിൽ ദേശീയ, അന്തർദേശീയ തലങ്ങളിൽ സ്വർണം നേടി. ഒപ്പം കേരള കിക്ക്​ ബോക്​സേഴ്​സ്​ അസോസിയേഷന്​ കീഴിൽ അസിസ്റ്റന്‍റ്​ കോച്ചായി കാക്കനാടും എറണാകുളത്തും ക്ലാസെടുക്കുന്നു.

ഇടിച്ചുനേടിയത്​ പുതുജീവിതം

‘ചെറുപ്പത്തിൽ തടിച്ച ശരീരപ്രകൃതമായിരുന്നു എനിക്ക്​. അതിന്‍റെ അപകർഷ ബോധം ഏറെ അലട്ടിയിരുന്നു. ഡെലിവറി കഴിഞ്ഞുള്ള പോസ്റ്റ്​പാർട്ടം ഡിപ്രഷൻ, ഐ.ടി മേഖലയിലെ ജോലിയിൽ നിന്ന്​ മാറി ബ്രേക്ക്​ വന്നപ്പോഴുള്ള മുഷിപ്പ്​ ഇവയിൽ നിന്നുള്ള ഒരു മോചനം തന്നെയായിരുന്നു​ കിക്ക് ബോക്സിങ്​ പരിശീലനം’ -ആൻ പറയുന്നു.

‘ഞാൻ സ്​പോർട്​സിന്​ പറ്റിയ ആളല്ലെന്നാണ്​ വിശ്വസിച്ചിരുന്നത്​. മകനൊപ്പം പരിശീലനം തുടങ്ങിയപ്പോൾ പെട്ടെന്ന്​ അതുമായി ഇഴുകിച്ചേരാൻ കഴിഞ്ഞു. സാധാരണ ജിമ്മിൽ പോകുന്നവർ കുറച്ചുനാൾ പോകും. പിന്നെ അതിൽ നിന്ന്​ മാറും. ബോഡി ബിൽഡിങ്ങുമായി മുന്നോട്ടുപോകുന്ന സ്ത്രീകൾ വളരെ കുറവാണ്​.

ആദ്യ ചാമ്പ്യൻഷിപ്പിൽ പ​ങ്കെടുത്തതോടെ ആത്മവിശ്വാസം കൈവന്നു. അത്​ ജീവിതത്തിൽ തന്നെ വലിയ മാറ്റങ്ങൾ വരുത്തി. നാലുകൊല്ലം കൊണ്ട് എന്‍റെ ശരീരം മാത്രമല്ല, സംസാരവും കാഴ്​ചപ്പാടും തന്നെ മാറി. നടക്കുന്ന രീതിപോലും മാറി. ജീവിതം തന്നെ മാറുകയാണ്​. അതൊരു വലിയ പ്രോഗ്രസാണ്’ - അവർ പറയുന്നു. ജൂബിൻ പീറ്ററാണ്​ ഭർത്താവ്​.

●