റമദാൻ പൊലിവിന്‍റെ പൊന്നാനി രാവുകൾ

പലരുംവരെ തുറന്നിടും റമദാൻ നാളുകളിൽ കടക​േമ്പാളങ്ങൾ. ആളാരവംകൊണ്ട്​ രാവിനെ പകലാക്കുന്ന തെരുവീഥികൾ. ബഹുവർണ പാനൂസ വിളക്കുകൾ അലങ്കാരം തൂകുന്ന തറവാട്ടുമുറ്റങ്ങൾ. നിറഞ്ഞുകവിയും പള്ളിയകങ്ങൾ. അടുക്കളകളിൽ നിന്നും പലഹാരപ്പഴമയുടെ കൊതിയൂറും ഗന്ധം... ചെറിയമക്ക എന്ന പൊന്നാനിയിലെ നോമ്പു​രാവുകൾക്കിന്നും പൊലിവേറെയാണ്.

നോമ്പുകാലത്തെ ഇത്രമേൽ ആഘോഷമാക്കുന്ന മറ്റൊരു പ്രദേശം കേരളത്തിലുണ്ടോ എന്ന്​ സംശയമാണ്​. പൗരാണിക തുറമുഖനഗരിയുടെ തനിമയും പെരുമയും പാരമ്പര്യവും സംരക്ഷിക്കുന്നതിൽ ഇന്നാട്ടുകാർ അത്രയേറെ ശ്രദ്ധാലുക്കളാണ്​.
കോവിഡും മറ്റു പ്രയാസങ്ങളും സകലതും ചവിട്ടിമറിച്ചപ്പോൾ പ്രാദേശിക ഭരണകൂടത്തി​െൻറ തന്നെ മുൻകൈയിൽ നോമ്പ്​^പെരുന്നാൾ കാലത്തെ പൊന്നാനിപ്പെരുമ വീണ്ടെടുക്കാൻ ‘പാനൂസ’ എന്ന പേരിൽ പോയവർഷം ഒരാഴ്​ച നീണ്ട ആഘോഷംതന്നെ സംഘടിപ്പിച്ചു.

പെരുമയുടെ പഴമ

വീട്​ വൃത്തിയാക്കലും മറ്റും പൂർത്തിയാക്കി ആവേശത്തോടെയാണ്​ പൊന്നാനിക്കാർ നോമ്പുമാസത്തെ വ​രവേൽക്കുക. നഗരത്തിലെ തറവാട്ടുകാർക്കാണ്​ നോമ്പി​െൻറ ചിട്ടവട്ടങ്ങളിൽ മാമൂലുകൾ കൂടുതൽ. മരുമക്കത്തായം നിലനിൽക്കുന്ന പ്രദേശമായതിനാൽ നോ​െമ്പത്തുംമുന്നേ പുതിയാപ്ലയുടെ വക ഭാര്യവീട്ടിലേക്ക്​ അരിയും മറ്റു സകല പലവ്യഞ്ജനങ്ങളും എത്തിക്കുന്ന പതിവ്​ ഇന്നുമുണ്ട്​.

കേമമാകും നോമ്പുതുറ

നോമ്പിലെ ചടങ്ങുകളിൽ കേമം നോമ്പുതുറ തന്നെ. ചെറിയ ​നോമ്പുതുറ, വലിയ നോമ്പുതുറ, മുത്താഴം, അത്താഴം എന്നിങ്ങനെ രാത്രി നാലുതരം ഭക്ഷണസമയങ്ങളുണ്ട്​. ഒാരോന്നും പൊന്നാനിത്തനിമയുള്ള വിഭവങ്ങളാൽ സമൃദ്ധം. പൊന്നാനിയിലെ അറിയപ്പെടുന്ന പാചകക്കാരിയും ‘അപ്പങ്ങളെമ്പാടും’ എന്ന പൊന്നാനി രുചി കൂട്ടായ്​മ ലീഡറുമായ പി.കെ. ജമീല അവ വിവരിച്ചുതന്നതിങ്ങനെ...

പുതിയാപ്ല സൂപ്പർ സ്റ്റാർ

നോമ്പിന്​ പുതിയാപ്ലയാണ്​ വീടുകളിലെ സൂപ്പർ സ്​റ്റാർ. പുതിയാപ്ല​െയ കരുതിയാണ്​ പലഹാരങ്ങൾ എല്ലാം ഉണ്ടാക്കുക. പുതിയാപ്ല വീട്ടിലില്ലേൽ ഇൗ വിഭവങ്ങളെല്ലാം തയാറാക്കി പുതിയാപ്ലയുടെ വീട്ടിലേക്ക്​ പെൺവീട്ടിൽനിന്ന്​ കൊടുത്തയക്കും.

മഗ്​രിബ്​ ബാങ്ക്​ കൊടുത്ത പാടെയുള്ളതാണ്​ ചെറിയ നോമ്പുതുറ. ഇൗത്തപ്പഴവും നാരങ്ങവെള്ളവും കഴിഞ്ഞാൽ പിന്നെ പലഹാരങ്ങളുടെ നിറവാണ്​. മുട്ടമാല, മുട്ടസുർക്ക, നിറച്ച പത്തിരി, വയക്കട (ഉന്നക്കായ), തരിപ്പോള, തരിക്കഞ്ഞി, ചിരട്ടിമാല, മുട്ടപ്പത്തിരി തുടങ്ങി ‘അല്ലാഹു അഅ്​ലം’ എന്ന അസ്സൽ പൊന്നാനി വിഭവം വേറെയും. അടുത്തകാലത്താണ്​ പഴവർഗങ്ങൾ പലഹാരങ്ങൾക്കൊപ്പം തീൻമേശയിൽ കൂട്ടിനു വന്നത്​.

വലിയതുറയും പ്രധാനം

രണ്ടാംഘട്ടമാണ്​ വലിയ നോമ്പുതുറ. നൈസ്​ പത്തിരി, കോഴിക്കറി, ബീഫ്​ കറി, ബീഫ്​ വരട്ടിയത്​ എന്നിവയാണ്​ ഇൗ ഘട്ടത്തിലെ മെയിൻ. ജീരകക്കഞ്ഞിയും വഴക്കരട്ടിയും മീൻ മുളകിട്ടതും ചേർന്ന കോ​േമ്പായാണ്​ രണ്ടാംഘട്ട പൊന്നാനി സ്​പെഷൽ. പച്ചക്കായ ഉപ്പിട്ട്​ വേവിച്ച്​ ഉടച്ചെടുത്ത്​ അതിലേക്ക്​ തേങ്ങയും ജീരകവും ചെറിയുള്ളിയും ചേർത്തരച്ചത​ു കൂട്ടിയാണ്​ വഴക്കരട്ടിയുണ്ടാക്കുക. പോളയും ബീഫ്​ കറിയുമാണ്​ ഇൗ സമയത്തെ മറ്റൊരു താരം.

മുത്താഴവും അത്താഴവും

റമദാനിലെ പ്രത്യേക രാത്രിനമസ്​കാരമായ തറാവീഹ്​ കഴിഞ്ഞുള്ള ഭക്ഷണമാണ്​ മുത്താഴം. വീടി​െൻറ പടാപ്പുറത്തും കോലായയിലും കാരണവന്മാർ ഒത്തുകൂടി സൊറപറയുന്ന സമയമാണിത്​. അന്നേരമാണ്​ കുട്ടികൾ മുത്താഴ വെടി പൊട്ടിക്കുക. ഒരുതരം മിനി പീരങ്കിയാണത്​. മുളകൊണ്ടുണ്ടാക്കി മണ്ണെണ്ണ ഉപയോഗിച്ച്​ തീകൊളുത്തിയാൽ അത്യാവശ്യം നല്ല ശബ്​ദത്തിൽ പീരങ്കി തീതുപ്പും. റമദാനിൽ കുട്ടികളുടെ പ്രധാന വിനോദ പരിപാടി ഇതാണ്​.

പിന്നെ അത്താഴം. അത്താഴത്തിന്​ ചോറ്​, മീൻകറി, മുരിങ്ങയില തോരൻ എന്നിവക്കു പുറമെ ഒരു പൊന്നാനി സ്​പെഷൽ വിഭവമുണ്ട്​. ചൂരമീൻ ചമ്മന്തിയാണത്​. ലക്ഷദ്വീപിൽനിന്ന്​ വരുന്ന ഉണക്ക്​ ചൂര​, വീണ്ടും ഉണക്കി തീക്കനലിൽ ചുട്ടു പൊടിച്ച്​ തേങ്ങയും മറ്റും ചേർത്തുണ്ടാക്കുന്ന ഇൗ ചമ്മന്തി വേറെ ലെവൽ ടേസ്​റ്റാണെന്ന്​ ജമീലത്ത പറയുന്നു.

പൊന്നാനിയിൽ റമദാനിൽ മാത്രമല്ല, വർഷം മുഴുവൻ പുലർച്ചെ രണ്ടു ബാങ്കുണ്ട്​. പുലർച്ച നാലു​ മണിക്ക്​ ഒരു ബാങ്കും സുബ്ഹി​െൻറ സമയത്ത്​ മ​റ്റൊരു ബാങ്കും. റമദാനിൽ ഇതിലെ ആദ്യ ബാങ്ക്​ അത്താഴം കഴിക്കാനുള്ള ഒാർമപ്പെടുത്തലും രണ്ടാം ബാങ്ക്​ ഭക്ഷണം കഴിക്കുന്നത്​ നിർത്താനുള്ള മുന്നറിയിപ്പുമാണ്​.

കേൾക്കാം പീലൂത്ത്​

ഇതിനു​ പുറമെ, പീലൂത്ത്​ എന്നൊരു മുന്നറിയിപ്പ്​ രീതികൂടി പൊന്നാനിയിലുണ്ട്​. നോമ്പുതുറക്കും അത്താഴത്തിനും ശബരിമല മണ്ഡല നാളുകളിൽ പുലർച്ചയും മുഴങ്ങുന്ന സൈറണാണ്​ പീലൂത്ത്​. പണ്ടുകാലത്ത്​ പുറംകടലിൽ ചരക്കുകപ്പലുകൾ നങ്കൂരമിട്ടാൽ കരയിലുള്ള ചെറു ചരക്കു വഞ്ചികൾക്ക്​​ അറിയിപ്പെന്നോണം തുടങ്ങിയതാണ്​ പീലൂത്ത്​ എന്ന്​ അബ്​ദുറഹ്​മാൻ കുട്ടി മാസ്​റ്റർ പറയുന്നു. ഇടക്കാലത്ത്​ നിന്നുപോയ ഇൗ പാരമ്പര്യം നഗരസഭയുടെ മുൻകൈയിൽ പുനരാരംഭിച്ചിട്ടുണ്ട്​.

ഇത്രയധികം ഭക്ഷണം ഒരു ദിവസം ഉണ്ടാക്കാൻ ഒരു ശരാശരി വീട്ടമ്മക്ക്​ കഴിയുമോ എന്ന ആശങ്കക്കും ജമീലത്തക്ക്​ മറുപടിയുണ്ട്​. ‘‘മരുമക്കത്തായ സ​മ്പ്രദായം ആയതുകൊണ്ട്​ വീട്ടിൽ എമ്പാടും പെണ്ണുങ്ങളുണ്ടാകും. എല്ലാവരും ഒാരോരോ പണിയിൽ സജീവമാകും. അതുകൊണ്ട്​ ഇതൊന്നും ഭാരമായി തോന്നാറില്ല.’’

പാനൂസയും പാനൂസ യാത്രയും

പൊന്നാനിയുടെ നോമ്പുകാലത്തി​െൻറ ​െഎക്കൺ ആണ്​ പാനൂസ വിളക്ക്​. റമദാൻ മാസം വീടുകൾക്കു മുന്നിൽ കെട്ടിത്തൂക്കുന്ന പ്രത്യേകതരം അലങ്കാര വിളക്കുകളാണ്​ പാനൂസ. ഇൗജിപ്​തിലും മറ്റുചില അറബ്​ ദേശങ്ങളിലും ഫാനൂസ്​ എന്ന പേരിൽ സമാന രീതിയുണ്ട്​. അറബ്​ നാടുകളുമായുള്ള പൊന്നാനിയുടെ പൗരാണിക സമ്പർക്കം വഴിയാകണം ഇത്​ വരുന്നത്​.

മുളകൊണ്ട്​ വ്യത്യസ്​ത ആകൃതികളിൽ പാനൂസ ഉണ്ടാക്കും. പെട്ടി, കപ്പൽ, പത്തേമാരി, വിമാനം, ബസ്​, കാർ അങ്ങനെ പല ആകൃതികളിലും പാനൂസ ഉണ്ടാകും. മുമ്പ്​ പാനൂസ ഉണ്ടാക്കുന്ന ധാരാളം പേർ പൊന്നാനിയിലുണ്ടായിരുന്നു. ഇന്ന്​ ​രണ്ടോ മൂന്നോ പേരേയുള്ളൂ.

ദീർഘകാലം ബോംബെയിലേക്കും ഗൾഫ്​ നാടുകളി​േലക്കും ചരക്കുമായി പായക്ക്​ ഒാടുന്ന പത്തേമാരികളിൽ തൊഴിലെടുത്ത അഴീക്കലിലെ ആലിയത്താനകത്ത്​ കുഞ്ഞൻബാവയാണ്​ ഒരു പാനൂസ വിദഗ്​ധൻ. പത്തേമാരിയുടെയും അറേബ്യൻ ഉരുവി​െൻറയും മാതൃകയിൽ ​അദ്ദേഹം ഉണ്ടാക്കുന്ന പാനൂസക്ക്​ ധാരാളം ആവശ്യക്കാരുണ്ട്​. കുട്ടിക്കാലത്ത്

നോമ്പ​ുരാവുകളിൽ​ രണ്ടോ മൂന്നോ മീറ്റർ നീളമുള്ള പത്തേമാരി പാനൂസ ഉണ്ടാക്കി, പെ​ട്രോമാക്​സ്​ വിളക്ക്​ ഉള്ളിൽ കത്തിച്ച്​, മുളയിൽ കെട്ടിത്തൂക്കി വീടുകളിലൂടെയും അങ്ങാടിയിലൂടെയും കുട്ടികൾ സഞ്ചരിക്കും. ‘‘ചോ​ക്കാ വറുത്തതുണ്ടോ, മഞ്ഞൾ കൊത്തമ്പാലി അത്താഴസമയമായ്​ എണീറ്റോളൂ’’ തുടങ്ങിയ പാട്ടുകൾ പാടിയാകും ഇൗ യാത്രയെന്ന്​ അദ്ദേഹം ഒാർമിക്കുന്നു.

കുട്ടികൾ മാത്രമല്ല, മുതിർന്നവരും പുലർച്ചെ അത്താഴ ബാങ്ക്​ കൊടുക്കുന്നതുവരെ ഒാരോരോ നേരമ്പോക്കുകളിൽ ഏർപ്പെട്ട്​ അങ്ങാടിയിൽ കാണും. രാത്രിയുടെ അന്ത്യയാമത്തിലെ പുണ്യനമസ്​കാരത്തിന്​ (ഖിയാമുല്ലൈൽ) സമയം നീക്കിവെക്കുന്നവരും ധാരാളം. ഇത്രയേറെ പള്ളികളുള്ള ഒരു നാടും മലയാളക്കരയിലില്ല. 90ലധികം പള്ളികളാണ്​ പൊന്നാനി നഗരസഭ പരിധിയിലുള്ളത്​.

ദൈന്യതയുടെ നോമ്പുകാലം

മുസ്​ലിംകൾക്കിടയിൽ തന്നെ വലിയ സാംസ്​കാരിക വൈവിധ്യങ്ങൾ നിലനിൽക്കുന്ന പ്രദേശമാണ്​ പൊന്നാനി. ആഘോഷസമാന നോമ്പുകാലം അനുഭവിക്കാത്ത മനുഷ്യരും ഇൗ തീരനഗരത്തിലുണ്ട്​. തണ്ടുവലിച്ച്​ വള്ളങ്ങളിൽ കടലിൽ പോയി, അന്നന്നത്തെ ഭക്ഷണത്തിനുള്ള വക കണ്ടെത്തിയിരുന്ന മത്സ്യ​ത്തൊഴിലാളി സമൂഹം, തുടർച്ചയായി വരുന്ന തൂഫാനുകളോട്​ (കടൽക്ഷോഭം) പൊരുതി പത്തേമാരികളിൽ ആയുസ്സുതീർത്ത അഴീക്കലിലെ മഞ്ചിത്തൊഴിലാളി സമൂഹം.

പട്ടിണിയും പരിവട്ടവും ദൈന്യതയും മാത്രമായിരുന്നു അടുത്ത കാലംവരെ ഇവരുടെ ഒാലക്കുടിലുകളിൽനിന്ന്​ ഉയർന്നുകേട്ടത്​. കഞ്ഞിയും കപ്പയും ചമ്മന്തിയുമൊക്കെയായിരുന്നു പല വീടുകളിലെയും​​​ നോമ്പുകാല പ്രത്യേക വിഭവങ്ങൾ. ദുരിതത്തിരമാലകൾക്കിടയിലും ആവുംവിധം നോമ്പും പെരുന്നാളും ആഘോഷമയമാക്കാൻ അവർ ശ്രദ്ധിച്ചിരുന്നു.

●