കഥ എഴുത്തിൽ എഡിറ്റിങ്ങി​ന്‍റെ പ്രാധാന്യം പഠിപ്പിച്ചുതന്നത് അച്ഛൻ -സിതാര എസ്.

വളർച്ചയുടെ ആദ്യഘട്ടങ്ങളിൽ ഏറ്റവും കൂടുതൽ സ്വാധീനിച്ചത് ആരാണെന്ന ചോദ്യത്തിന് ഒറ്റ ഉത്തരമേയുള്ളൂ, അച്ഛൻ എൻ. ശശിധരൻ. എഴുത്തി​ന്‍റെയും വായനയുടെയും ലോകത്തേക്ക് കൈപിടിച്ച് കൊണ്ടുവന്നത് അച്ഛനാണ്. ചെറുപ്പത്തിൽ ഒരുപാട് പുസ്തകങ്ങൾ കൊണ്ടുവന്നുതരും.

വേനലവധിക്കാലത്ത് ഒരു ദിവസം ഒരുപുസ്തകം എന്ന നിലയിൽ ആർത്തിയോടെ പുസ്തകങ്ങൾ വായിച്ചിരുന്ന പെൺകുട്ടിയായിരുന്നു ഞാൻ. അതനുസരിച്ച് അച്ഛൻ പുസ്തകങ്ങൾ കൊണ്ടുവരും. എഴുത്തി​ന്‍റെ ലോകത്തേക്കുള്ള ചൂണ്ടുപലകയായിരുന്നു അത്. അച്ഛന് വലിയൊരു പുസ്തക ശേഖരമുണ്ടായിരുന്നു.

എഴുതണമെന്ന് അച്ഛനൊരിക്കലും പറഞ്ഞിട്ടില്ല. എന്നാൽ, എഴുതിത്തുടങ്ങിയപ്പോൾ ഏറ്റവും കൂടുതൽ സന്തോഷിച്ചത് അദ്ദേഹമാണ്. ഏഴാം വയസ്സിലോ മറ്റോ ആണ് എഴുതിത്തുടങ്ങിയത്. കവിതകളായിരുന്നു ആദ്യം. ആ എഴുത്തുകളെ നന്നായി വായിച്ച് തിരുത്തലുകൾ പറഞ്ഞുതന്ന് അച്ഛൻ കൂടെ നിന്നു.

ഏഴാംക്ലാസിൽ പഠിക്കുമ്പോൾ ആദ്യ കഥയെഴുതി. സ്കൂൾ കലോത്സവത്തിൽ കഥാമത്സരത്തിൽ ഒന്നാംസമ്മാനം കിട്ടിയത് വീട്ടിൽ വന്ന് പറഞ്ഞപ്പോൾ അദ്ദേഹത്തി​ന്‍റെ സന്തോഷം ഇപ്പോഴും മനസ്സിലുണ്ട്. കഥകൾ എഴുത്തിത്തുടങ്ങിയപ്പോൾ തിരുത്തലുകൾ വരുത്തിത്തന്നു. ആദ്യകാലങ്ങളിൽ ഏറ്റവും പ്രശ്നം കഥകൾക്ക് തലക്കെട്ട് കണ്ടെത്തലായിരുന്നു. ആ ജോലി അച്ഛനെയാണ് ഏൽപിച്ചിരുന്നത്.

ഓരോ കഥക്കും സത്യസന്ധമായി അഭിപ്രായം പറയും. നന്നായില്ലെങ്കിൽ അത് തുറന്നുപറയും. കഥ എഴുത്തിൽ എഡിറ്റിങ്ങി​ന്‍റെ പ്രാധാന്യം പഠിപ്പിച്ചുതന്നു. എ​ന്‍റെ കഥകളുടെ ആദ്യവായനക്കാരനും അച്ഛൻതന്നെ. വിവാഹം കഴിഞ്ഞ് സൗദിയിൽ പോയശേഷം ഞാൻ ഏറ്റവുമധികം മിസ് ചെയ്തത് അച്ഛ​ന്‍റെ കഥാതിരുത്തലുകളാണ്. ഇ-മെയിലും വാട്സ്ആപ്പുമൊന്നുമില്ലാത്ത കാലമാണ്. അതുകൊണ്ടുതന്നെ കഥയെഴുതി അച്ഛന് വായിക്കാൻ കൊടുക്കാൻ കഴിയുമായിരുന്നില്ല.

എഴുത്തിൽ മാത്രമല്ല, പലകാര്യങ്ങളിലും അച്ഛൻ എ​ന്‍റെ ന​ല്ലൊരു കൂട്ടുകാരനായിരുന്നു. ജീവിതത്തി​ലെ എല്ലാ നല്ല കാര്യങ്ങളും ആദ്യം പോയി പറഞ്ഞിരുന്നത് അച്ഛനോടായിരുന്നു. ഇ​പ്പോഴും എ​ന്‍റെ കഥകൾ അച്ചടിച്ചുവന്നാൽ അദ്ദേഹം വായിക്കും. എഴുത്തിനെ കുറിച്ച് അച്ഛൻ പറയുന്ന നല്ല വാക്കുകളാണ് ജീവിതത്തിൽ എനിക്ക് കിട്ടിയ ഏറ്റവും വലിയ പുരസ്കാരം.