ജ്യൂസെന്ന് കരുതി പ്ലാസ്റ്റിക് ബോട്ടിലിൽ വെച്ചിരുന്ന മണ്ണെണ്ണ കുടിച്ചു; രണ്ടു വയസുകാരന് ദാരുണാന്ത്യം

തിരുവനന്തപുരം/കന്യാകുമാരി: ജ്യൂസെന്ന് കരുതി പ്ലാസ്റ്റിക് ബോട്ടിലിൽ വെച്ചിരുന്ന മണ്ണെണ്ണ എടുത്ത് ആരും കാണാതെ കുടിച്ച രണ്ട് വയസ്സുകാരന് ദാരുണാന്ത്യം. തമിഴ്നാട് അതിർത്തി പ്രദേശമായ അരുമന പളുകൻ ദേവികോട് പനച്ചങ്കാലയിൽ അനിൽ-അരുണ ദമ്പതികളുടെ ഇളയ മകൻ ആരോൺ (2) ആണ് മരിച്ചത്.

മരത്തിൽനിന്ന് വീണ് അനങ്ങാൻ പറ്റാത്ത നിലയിലു​ള്ള അനിലിനെ ഭാര്യ അരുണ ശുശ്രൂഷിക്കുന്നതിനിടയിലാണ് കളിച്ചുകൊണ്ട് നിന്ന കുഞ്ഞ് അടുക്കളയിൽ പോയി മണ്ണെണ്ണ കുടിച്ചത്. ഉടനെ അടുത്തുള്ള സ്വകാര്യ മെഡിക്കൽ കോളജ് ആശുപത്രിയിൽ പ്രാഥമിക ചികിത്സക്കുശേഷം തിരുവനന്തപുരം മെഡിക്കൽ കോളജ് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. അനിരുദ്ധ് (നാല്​) സഹോദരനാണ്.