സീരിയലുകൾ സ്​ത്രീകളെയും കുട്ടികളെയും മോശമായി ചിത്രീകരിക്കുന്നതിൽ ജൂറിക്ക്​​ ആശങ്ക

തിരുവനന്തപുരം: ടെലിവിഷൻ പരമ്പരകളിൽ സ്​ത്രീകളെയും കുട്ടികളെയും മോശമായി ചിത്രീകരിക്കുന്നതിൽ സംസ്ഥാന ടെലിവിഷൻ അവാർഡ്​ നിർണയ ജൂറിക്ക്​ കടുത്ത ആശങ്ക. കുടുംബാംഗങ്ങൾ ഒരുമിച്ചിരുന്ന്​ കാണുന്ന മാധ്യമമെന്ന നിലയിൽ ടെലിവിഷൻ പരമ്പരകളിലും കോമഡി പരിപാടികളിലും ചാനലുകൾ കൂടുതൽ ഉത്തരവാദിത്തബോധം പുലർത്തണം.

നിലവാരമില്ലാത്ത എൻട്രി നിരവധി വരുന്നതിനാൽ പ്രാഥമിക സ്​ക്രീനിങ്​ കമ്മിറ്റി അത്യാവശ്യമാണെന്ന്​ സമിതി ശിപാർശ ചെയ്​തു. കൂടുതൽ വൈവിധ്യവും നിലവാരവുമുള്ള കലാസൃഷ്​ടികൾ ആകർഷിക്കുന്നതിന്​ സിനിമയൊഴികെയുള്ള മുഴുവൻ ദൃശ്യാവിഷ്കാരങ്ങളെയും ഒരു കുടക്കീഴിൽ അണിനിരത്തി സിനിമേതരവിഭാഗം എന്ന രീതിയിൽ സംസ്ഥാന ടെലിവിഷൻ അവാർഡ് കാലോചിതമായി പരിഷ്കരിക്കണം.

Also Read:സീരിയൽ നിലവാരം: തിരക്കഥകളിൽ മസാല പുരട്ടുന്ന രീതിയിൽനിന്ന് ചാനലുകൾ പിന്മാറണം -മന്ത്രി

നവമാധ്യമ സൃഷ്​ടികൾ, വെബ് സിരീസുകൾ, കാമ്പസ്​ ചിത്രങ്ങൾ, പരസ്യ ചിത്രങ്ങൾ തുടങ്ങിയവകൂടി നിശ്ചിത മാനദണ്ഡത്തിന്​ വിധേയമായി ഉൾപ്പെടുത്തി അവാർഡ് പ്ലാറ്റ്ഫോം വിപുലപ്പെടുത്തണം. എല്ലാ കാറ്റഗറികളിലെയും അവാർഡ് തുക വർധിപ്പിക്കുന്നത് മികച്ച സൃഷ്​ടികൾ ലഭിക്കാനിടയാക്കുമെന്നതിനാൽ പുരസ്​കാരതുക കാലോചിതമായി വർധിപ്പിക്കണം.

കഥാവിഭാഗത്തിൽ ആകെ 39 എൻട്രിയാണ് ലഭിച്ചത്​. ടെലിസീരിയൽ വിഭാഗത്തിൽ ആറും ടെലിഫിലിം വിഭാഗത്തിൽ 14 ഉം ടി.വി ഷോ എൻറർടെയ്ൻമെൻറ് വിഭാഗത്തിൽ 11 ഉം കോമഡി വിഭാഗത്തിൽ എട്ടും എൻട്രി​ ലഭിച്ചു​. ആർ. ശരത്​ ചെയർമാനും എസ്​. ഹരീഷ്​, ലെനകുമാർ, സുരേഷ്​ പൊതുവാൾ, ജിത്തു കോളയാട്​, ചലച്ചിത്ര അക്കാദമി മെംബർ സെക്രട്ടറി സി. അജോയ്​ എന്നിവർ അംഗങ്ങളുമായ ജൂറിയാണ്​ അവാർഡ്​ നിർണയിച്ചത്​.

Also Read:മീഡിയ വണിന് സംസ്ഥാന സർക്കാറിന്‍റെ ടെലിവിഷൻ പുരസ്കാരം

അടച്ചിടൽ കാലത്ത് ദൃശ്യമാധ്യമ പ്രവർത്തകർക്ക് വലിയതോതിൽ പുറത്തിറങ്ങാൻ കഴിയാതിരുന്നതി​െൻറ സകല പരിമിതികളും എൻട്രികളിൽ ഉണ്ടായിരുന്നെന്ന്​ കഥേതര വിഭാഗം ജൂറി വിലയിരുത്തി. സമൂഹമാധ്യമങ്ങളിലും വെബ്സൈറ്റുകളിലും മറ്റും അവതരിപ്പിക്കപ്പെടുന്നവയെക്കൂടി ഉൾപ്പെടുത്തി അവാർഡ് പരിഷ്കരിക്കപ്പെടേണ്ടതാണെന്ന്​ സഞ്​ജു സുരേന്ദ്രൻ ​െചയർമാനായ സമിതി വിലയിരുത്തി. ടെലിവിഷൻ പ്രമേയമാകുന്ന രചനകളുടെ കുറവ് ഗൗരവത്തോടെ കാണണമെന്ന്​ ഡോ. കെ. ഗോപിനാഥൻ ചെയർമാനായ രചനാവിഭാഗം ജൂറി പറഞ്ഞു.