ശോഭന ജോർജ്ജ് കേരളാ ഖാദി ബോർഡ് വൈസ് ചെയർപേഴ്സൺ സ്ഥാനം രാജിവെച്ചു

ചെങ്ങന്നൂർ: മുൻ എം.എൽ.എ ശോഭന ജോർജ്ജ് കേരളാ ഖാദി ബോർഡ് വൈസ് ചെയർപേഴ്സൺ സ്ഥാനം രാജിവെച്ചു. രാജിക്കാര്യം ചെങ്ങന്നൂരിൽ വെച്ചാണ്​ അറിയിച്ചത്. മൂന്നരവർഷത്തെ സേവനത്തിന്​ ശേഷമാണ് സ്വയം വിരമിക്കൽ നടത്തുന്നത്.

ശമ്പളം വാങ്ങാതെയാണ് ഇ​ത്രയും കാലം പ്രവർത്തിച്ചതെന്ന് ശോഭനാ ജോർജ്ജ് അറിയിച്ചു. 1991 മുതൽ തുടർച്ചയായി ചെങ്ങന്നൂരിൽ നിന്ന്​ നിയമസഭയിലേക്കു കോൺഗ്രസ്​ ടിക്കറ്റിൽ വിജയിച്ചു. ഹാട്രിക് വിജയത്തിനുശേഷം 2006 ൽ തിരുവനന്തപുരത്തേക്ക് മാറി മത്സരിച്ചെങ്കിലും പരാജയപ്പെട്ടു.

2016 ൽ ചെങ്ങന്നൂരിൽ വിമത സ്ഥാനാർഥിയായി തെരഞ്ഞെടുപ്പിനെ നേരിട്ടപ്പോൾ ഇടതുമുന്നണിയിലെ അഡ്വ കെ.കെ. രാമചന്ദ്രൻ നായരുടെ വിജയത്തിന്​ വഴിയൊരുക്കിയതിലൂടെയാണ് സി.പി.എമ്മിലേക്കുള്ള പ്രവേശനത്തിനിടയാക്കിയത്.