കണ്ണൂരിൽ കോവിഡ് രോഗികളെ പരിചരിക്കാൻ ഇനി റോബോട്ട്
text_fields
തിരുവനന്തപുരം: കണ്ണൂരിലെ അഞ്ചരക്കണ്ടി ജില്ല കോവിഡ് സെൻററിൽ ആരോഗ്യ പ്രവര്‍ത്തകരെ സഹായിക്കാനായി റോബോട്ടും.
ചൈനയിലെ വുഹാനില്‍ കോവിഡ് 19 റിപ്പോര്‍ട്ട് ചെയ്ത സമയത്ത് കോവിഡ് രോഗികൾക്ക് ഭക്ഷണവും മറ്റും എത്തിച്ച ശുശ്രൂ ഷിച്ച റോബോട്ടിൻെറ മാതൃകയിലുള്ളതാണ് കേരളത്തിലും ഉപയോഗിച്ചതെന്ന് ആരോഗ്യ മന്ത്രി കെ.െക.ശൈലജ അറിയിച്ചു.
ആറു പേര്‍ക്കുള്ള ഭക്ഷണവും വെള്ളവും അല്ലെങ്കില്‍ 25 കിലോഗ്രാം ഭാരം വരെ കൊണ്ടുപോകാനുള്ള ശേഷി ഈ റോബോട്ടിനുണ്ട്. റിമോട്ട് കണ്‍ട്രോളിലൂടെ ഒരു കിലോമീറ്ററോളം റോബോട്ടിനെ നിയന്ത്രിക്കാനാകും. രോഗികള്‍ക്ക് ആവശ്യമായ ഭക്ഷണവും മരുന്നും റോബോട്ടിന് നല്‍കിയാല്‍ അത് കൃത്യമായി ഓരോ മുറിയിലുമെത്തിക്കും. റോബോട്ടിലെ വീഡിയോ സിസ്റ്റം വഴി ജീവനക്കാരുമായി സംസാരിക്കാനും കഴിയും.
കണ്ണൂരിലാണ് കൂടുതല്‍ പോസിറ്റീവ് കേസുകളുള്ളത്. ആരോഗ്യ വകുപ്പിൻെറ നേതൃത്വത്തില്‍ ചെമ്പേരി വിമല്‍ജ്യോതി എൻജിനീയറിങ് കോളജിലെ വിദ്യാർഥികളാണ് ‘നൈറ്റിംഗല്‍-19’ രൂപകല്‍പന ചെയ്തത്. ചൈനയെ വെല്ലുന്ന സാങ്കേതികവിദ്യയാണ് ഇതില്‍ ഉപയോഗിച്ചിരിക്കുന്നത്. ചൈനയില്‍ ഭക്ഷണവും മരുന്നും മാത്രം നല്‍കാനാണ് റോബോട്ടിനെ ഉപയോഗിച്ചത്. എന്നാല്‍ ഇതില്‍ ഘടിപ്പിച്ച പ്രത്യേക ഡിസ്‌പ്ലേയിലൂടെ ജീവനക്കാരുമായോ ബന്ധുക്കളുമായോ കണ്ട് സംസാരിക്കാമെന്നും മന്ത്രി അറിയിച്ചു.