വിൽപനക്ക് വെച്ച മത്സ്യം പൊലീസ് വലിച്ചെറിഞ്ഞിട്ടില്ല -മുഖ്യമന്ത്രി

തിരുവനന്തപുരം: പാരിപ്പള്ളിയിൽ വഴിയോര കച്ചവടം നടത്തിയ സ്​ത്രീയിൽനിന്ന്​ പൊലീസ്​ മത്സ്യം വലിച്ചെറിഞ്ഞതിനെക്കുറിച്ച വാർത്തകളുടെ നിജസ്ഥിതി അന്വേഷിക്കാൻ ഡി.ജി.പിയോട്​​ ആവശ്യപ്പെട്ടതായി മുഖ്യമന്ത്രി പിണറായി വിജയൻ. ഉയർന്ന ടി.പി.ആർ നിരക്കുള്ള പ്രദേശത്തുനിന്ന്​ മാറാനാണ്​​ പറഞ്ഞതെന്നും പാത്രങ്ങളോ മത്സ്യമോ വലി​െച്ചറിഞ്ഞിട്ടില്ലെന്നുമാണ്​ പൊലീസ്​ റിപ്പോർട്ട്.

കച്ചവടം നിരോധിച്ചതിനാൽ മത്സ്യവും മറ്റും വലിച്ചെറിഞ്ഞതായി കൃത്രിമമായി സൃഷ്​ടിച്ച്​ പ്രാദേശിക മാധ്യമങ്ങളിലൂടെ പ്രചരിപ്പിക്കുകയായിരുന്നെന്നും​ റിപ്പോർട്ടിലുണ്ട്​. വാർത്തകളുടെ നിജസ്ഥിതി അന്വേഷിക്കാനാണ്​ നിർദേശിച്ചതെന്നും സി.ആർ. മഹേഷി​െൻറ സബ്​മിഷന്​ മറുപടി നൽകി. ​

Also Read:കണ്ണില്ലാത്ത പൊലീസിന്‍റെ ക്രൂരത; റോഡരികിലിരുന്നു കച്ചവടം ചെയ്ത വൃദ്ധയുടെ മത്സ്യം​ വലിച്ചെറിഞ്ഞു

കല്ലുവാതുക്കൽ ഗ്രാമപഞ്ചായത്ത്​ ഉയർന്ന ടി.പി.ആർ ഉള്ള ഡി കാറ്റഗറിയിലായതിനാൽ പൊലീസും പഞ്ചായത്ത്​ അധികൃതരും ശക്തമായ നിയന്ത്രണ നടപടികൾ സ്വീകരിച്ചിരുന്നു. പൊതുസ്ഥലങ്ങളിലും മത്സ്യ വിപണന കേന്ദ്രങ്ങളിലും ചന്തകളിലും മത്സ്യവ്യാപാരത്തിന്​ നിയന്ത്രണവും ചില സ്ഥലങ്ങളിൽ നിരോധനവും ഏർപ്പെടുത്തി. പാരിപ്പള്ളിയിൽ മത്സ്യക്കച്ചവടം നടക്കുന്നിടത്ത്​ ജനം കൂട്ടംകൂടി നിൽക്കുന്നെന്ന വിവരം ലഭിച്ചിരുന്നു. പൊലീസ്​ പല തവണ ഇത്​ വിലക്കി. മാറ്റി കച്ചവടം നടത്തിയ സ്ഥലവും ഉയർന്ന ടി.പി.ആർ ഉള്ളതായിരുന്നെന്നും മുഖ്യമന്ത്രി പറഞ്ഞു.

മത്സ്യം നശിപ്പിച്ച പൊലീസ്​ ഉദ്യോഗസ്ഥർക്കെതിരെ കേസെടുക്കണമെന്നും മത്സ്യം കച്ചവടം ചെയ്​ത വൃദ്ധമാതാവിന്​ സർക്കാർ നഷ്​ടപരിഹാരം നൽകണമെന്നും സി.ആർ. മ​േഹഷ്​ ആവശ്യപ്പെട്ടു.