വിമൻ ജസ്റ്റിസ് മൂവ്​മെൻറ്​ പ്രവർത്തകയെ മർദ്ദിച്ചതായി പരാതി

തിരുവനന്തപുരം: കടം കൊടുത്ത പണം തിരികെ ചോദിക്കാൻ ചെന്ന വിമൻ ജസ്റ്റിസ് മൂവ്​മെൻറ്​ പ്രവർത്തകയെ മർദിച്ചതായി പരാതി. മാനസികാസ്വാസ്ഥ്യമുള്ള ഇളയ മകളുടെ മുന്നിലായിരുന്നു മർദനം. ഇതുസംബന്ധിച്ച്​ പൂന്തുറ പൊലീസിൽ പരാതി നൽകി. മണക്കാട്​ സ്വദേശി നസിയത്തിനെ പൂന്തുറയിൽ താമസിക്കുന്ന അബ്ദുറഹ്മാൻ​ ക്രൂരമായി മർദിച്ചതായി പൊലീസിൽ നൽകിയ പരാതിയിൽ പറയുന്നു.

കവിളിൽ അടിക്കുകയും ചുവരിൽ ചേർത്തുവച്ച് മർദ്ദിച്ച് പരിക്കേൽപ്പിക്കുകയും ചെയ്യുകയായിരുന്നു​. പിടിച്ചു മാറ്റാൻ ചെന്ന മാനസികാരോഗ്യക്കുറവുള്ള മകളെയും അടിക്കുകയും പിടിച്ചു തള്ളുകയും ചെയ്​തതായും പരാതിയിൽ പറയുന്നുണ്ട്​. വീഴ്ചയിൽ ഇവരുടെ കയ്യിലുണ്ടായിരുന്ന മൊബൈൽ പൊട്ടിപ്പോവുകയും ചെയ്തു.

ശനിയാഴ്​ച രാവിലെ വന്നാൽ പണം കൊടുക്കാമെന്ന്​ പറഞ്ഞതനുസരിച്ചാണ് ഇവർ പ്രതിയുടെ വീട്ടിലേക്കു ചെന്നത്. നസിയത്ത്​ പിന്നീട്​ ആശുപത്രിയിൽ ചികിത്സ തേടി. സ്ത്രീകൾക്ക് സുരക്ഷിതത്വമില്ലാത്ത അവസ്ഥയാണ് കേരളത്തിൽ നിലനിൽക്കുന്നതെന്നും​ എത്രയും വേഗം കേസിൽ നടപടി സ്വീകരിക്കണമെന്നും വിമൻ ജസ്റ്റിസ് മൂവ്മെൻറ്​ ജില്ലാ സമിതി ആവശ്യപ്പെട്ടു.