ന​ഗരൂര്‍ പ‍ഞ്ചായത്തില്‍ രണ്ടുവീടുകള്‍ തകര്‍ന്നു

കിളിമാനൂർ: ശക്തമായി തുടരുന്ന മഴയിൽ ന​ഗരൂർ പഞ്ചായത്തിലെ രണ്ടുവീടുകൾ തകർന്നു. 17ാം വാർഡിൽ കരിംപാലോട് സ്വദേശിനി ​ഗോമതിയുടെ ചരുവിള വീടാണ് മഴയിൽ പൂർണമായും തകർന്നുവീണത്. വെള്ളിയാഴ്ച രാത്രിയിൽ പെയ്ത കനത്ത മഴയി ലാണ് വീട് തകർന്നത്.

വീട് തകരുന്ന സമയത്ത് ​ഗോമതിയും ഭർത്താവും സമീപത്തെ ബന്ധുവീട്ടിൽ അഭയം തേടിയിരുന്നതിനാൽ ആളപായം ഉണ്ടായിരുന്നില്ല. ന​ഗരൂർ പഞ്ചായത്തിലെ ദർശനാവട്ടത്ത് കോയിക്കമൂല സ്വദേശിനി രമണിയുടെ സുഭദ്രാലയം വീടിന്‍റെ ചുമര് മഴയിൽ തകർന്ന് വീണു. ഈ സമയം വീട്ടിനുള്ളിൽ രമണിയും മക്കളുമുണ്ടായിരുന്നെങ്കിലും പരിക്കേൽക്കാതെ രക്ഷപ്പെട്ടു.

പഞ്ചായത്തിലും മേഖലയിലെ താഴ്ന്ന പ്രദേശങ്ങളിലും വെള്ളം കയറി. പാടശേഖരങ്ങളടക്കം കൃഷിയിടങ്ങൾ വെള്ളത്തിലായി.