കനത്ത മഴ: സംസ്ഥാന പാത അടച്ചു, നിരവധി വീടുകൾ തകര്‍ന്നു

കിളിമാനൂർ (തിരുവനന്തപുരം): കനത്ത മഴയെ തുടർന്ന് സംസ്ഥാന പാതയിൽ കിളിമാനൂർ തട്ടത്തുമല മുതൽ കൊല്ലം ജില്ലയിലെ നിലമേൽ വരെയുള്ള ഭാഗം വെള്ളത്തിലായി. റോഡ് തിരിച്ചറിയാൻ കഴിയാതെ വെള്ളം നിറഞ്ഞതോടെ സംസ്ഥാന പാത താൽക്കാലികമായി അടച്ചു.

രണ്ട് ​ദിവസമായി പെയ്യുന്ന മഴയിൽ കിളിമാനൂർ മേഖലയിൽ വൻ നാശമാണ്​ സംഭവിച്ചത്​​. ന​ഗരൂർ പഞ്ചായത്തിലെ രണ്ട്​ വീടുകൾ തകർന്നു. പഴയകുന്നുമ്മേൽ പഞ്ചായത്തിൽ പല വീടുകളും മണ്ണിടിച്ചിൽ ഭീഷണിയിലാണ്. ന​ഗരൂർ പഞ്ചായത്തിൽ വാർഡ് അഞ്ച് കുറിയിടത്തുകോണത്ത് നിർധന കുടുംബത്തിന്‍റെ വീട് പൂർണമായും തകർന്നു.

ചെമ്മരത്തുമുക്ക് കുറിയിടത്തുകോണം ശ്യാംകുമാറിന്‍റെ വീടാണ് ഇടിഞ്ഞ് വീണത്. തിങ്കളാഴ്ച പുലർച്ചെ രണ്ടര മണിയോടെയായിരുന്നു വീടിന്‍റെ ഭിത്തി ഇടിഞ്ഞത്. അടുക്കള ഭാഗത്തെ ഭിത്തിയാണ് ആദ്യം വൻ ശബ്​ദത്തോടെ ഇടിഞ്ഞ് വീണത്.

ഈ സമയം ശ്യാംകുമാറും ഭാര്യയും രണ്ട് മക്കളും വീട്ടിലുണ്ടായിരുന്നു. കുടുംബം മറ്റൊരു വീട്ടിലേക്ക് താൽകാലികമായി താമസം മാറിയ സമയം വീട് പൂർണമായും നിലംപൊത്തി. പഞ്ചായത്തം​ഗം ‍വിജയലക്ഷ്മി സ്ഥലത്തെത്തി.

ന​ഗരൂർ പഞ്ചായത്തിലെ വെള്ളല്ലൂർ ഈഞ്ചമൂല കോട്ടിച്ചിറ ശാന്തയുടെ ചാമവിള വീട്ടിലേക്ക് പാറയും മണ്ണും ഇടിഞ്ഞിറങ്ങി വീടിന്‍റെ ഭിത്തി തകർന്നു. ഈ വീടും അപകടാവസ്ഥയിലായി. പഴയകുന്നുമ്മേൽ പഞ്ചായത്തിൽ കാനാറാ വൈദ്യുത ശ്മശാനത്തിന് മുന്നിലുള്ള പടുകൂറ്റൻ പാറ റോഡിലേക്ക് ഇടിഞ്ഞുവീണു. ഈ സമയം റോഡിൽ വാഹനങ്ങളോ ആളുകളോ ഇല്ലാത്തതിനാൽ വൻദുരന്തം ഒഴിവായി.

പഴയ കുന്നുമ്മേൽ പഞ്ചായത്തിലെ ആറ്റൂർ സലീമിന്‍റെ വീടിനോട്​ ചേർന്ന് സമീപത്തെ കുന്ന്​ ഇടിഞ്ഞുവീണു. വീട്ടിനുള്ളിൽ ആളുകൾ ഉണ്ടായിരുന്നെങ്കിലും കിടപ്പുമുറിയുടെ ഒരു ഭാ​ഗത്തേക്ക് ചേർന്ന് മണ്ണ് ഇടിഞ്ഞിറങ്ങിയതിനാൽ ദുരന്തം തെന്നിമാറി. വീടിന്‍റെ സൺഷെയിഡ് തകർന്നിട്ടുണ്ട്. അ​ഗ്നിരക്ഷാ പ്രവർത്തകരും റവന്യു ഉദ്യോ​ഗസ്ഥരും സ്ഥലത്തെത്തി ഇവരെ ഇവിടെനിന്നും മാറ്റി.

പഴയ കുന്നുമ്മേൽ പഞ്ചായത്തിലെ വണ്ടന്നൂർ ഇടക്കുന്ന് റോഡിലേക്ക് സമീപത്തെ മൺതിട്ട ഇടിഞ്ഞുവീണു ഗതാ​ഗതം തടസ്സപ്പെട്ടു. മണ്ണ് പൂർണമായി മാറ്റിയാലെ ഈ റോഡ് വഴി ഇനി ​ഗതാ​ഗതം സാധ്യമാകൂ. കിളിമാനൂർ പൊലീസ് സ്റ്റേഷൻ തൊളിക്കിഴി റോഡിൽ ചാവേറ്റിക്കാട് ജം​ഗ്ഷനിൽ റോഡിന് സമീപത്ത കുന്നിടിഞ്ഞ് റോഡിലേക്ക് വീണു. നൂറോളം റബർമരങ്ങളും മറ്റ് വ‍ൃ‍ക്ഷങ്ങളും കടപുഴകി. രാത്രിയും മഴ തുടരുന്നതിനാൽ എം.സി റോഡിൽ നിലമേൽ കിളിമാനൂർ വരെയുള്ള ഭാ​ഗത്തുകൂടെയുള്ള ​ഗതാ​ഗതം താൽകാലിമായി വഴിതിരിച്ചുവിട്ടു. ഈ ഭാ​ഗത്തെ റോഡ് വെള്ളത്തിനടിയിലായിട്ടുണ്ട്.

ചിറ്റാറിലെ ജലനിരപ്പ് അപകടകരമായ രീതിയിൽ ഉയർന്നിട്ടുണ്ട്. വാമാനാപുരം നദിയിലും ജലനിരപ്പ് ഉയരുകയാണ്. നദീതീരങ്ങളിൽ താമസിക്കുന്നവരെല്ലാം കടുത്ത ആശങ്കയിലാണ്.