സപ്ലൈകോ സംഭരിക്കുന്നതിൽ തമിഴ്നാട് നെല്ലും

പാലക്കാട്: അതിർത്തി കടന്നെത്തുന്ന തമിഴ്നാട് നെല്ല് സപ്ലൈകോ സംഭരിക്കുന്നതായി ആരോപണം. ചിറ്റൂർ താലൂക്കിൽനിന്ന് സംഭരിക്കുന്ന നെല്ലിനെ സംബന്ധിച്ചാണ് കർഷകർക്കിടയിൽ പരാതി ഉയർന്നത്. അതിർത്തി പഞ്ചായത്തുകളിലെ ചില കർഷകരുടെ പെർമിറ്റ് ദുരുപയോഗം ചെയ്താണ് കൃത്രിമം നടക്കുന്നത്.

സപ്ലൈകോ-കൃഷിവകുപ്പിലെ ചില ജീവനക്കാരുടെ ഒത്താശയോടെയാണ് ഇത് നടക്കുന്നത്. തമിഴ്നാട്ടിൽനിന്ന് കിലോക്ക് 15 രൂപ മുതൽ 18 ​രൂപക്ക് വരെ കിട്ടുന്ന നെല്ലാണ് സപ്ലൈകോവിന് മറിച്ച് വിറ്റ് അമിത ലാഭം കൊയ്യുന്നത്. ഈ സീസണിൽ ജില്ലയിൽ കൂടുതൽ സംഭരണം നടന്നത് ചിറ്റൂർ താലൂക്കിലാണ്. 27,245 മെട്രിക് ടൺ നെല്ലാണ് സപ്ലൈകോ ചിറ്റൂരിൽനിന്ന് സംഭരിച്ചത്. 24, 930 മെട്രിക് ടൺ ആലത്തൂർ താലൂക്കിൽ നിന്നും സംഭരിച്ചു. സംഭവത്തിൽ വിജിലൻസ് അന്വേഷണം വേണമെന്നാണ് കർഷകരുടെ ആവശ്യം.