പെ​രു​വ​ന്തോ​ട് കുടുംബാരോഗ്യ ഉപകേന്ദ്രത്തിന്​ സ്വന്തം സ്ഥലത്ത്​ പുതിയ കെട്ടിടം

ഓ​യൂ​ർ: വെ​ളി​ന​ല്ലൂ​ർ ഗ്രാ​മ​പ​ഞ്ചാ​യ​ത്തി​ലെ പെ​രു​വ​ന്തോ​ട് കു​ടും​ബാ​രോ​ഗ്യ ഉ​പ​കേ​ന്ദ്ര​ത്തി​ന് സ്വ​ന്തം സ്ഥ​ല​ത്ത് കെ​ട്ടി​ടം എ​ന്ന സ്വ​പ്നം യാ​ഥാ​ർ​ഥ്യ​മാ​വു​ന്നു. നി​ല​വി​ൽ വാ​ട​ക കെ​ട്ടി​ട​ത്തി​ലാ​യി​രു​ന്നു പ്ര​വ​ർ​ത്ത​നം. സ്വ​ന്ത​മാ​യി സ്ഥ​ലം ഇ​ല്ലാ​ത്ത​താ​യി​രു​ന്നു വി​ക​സ​ന​ത്തി​ന് ത​ട​സ്സ​മാ​യി​നി​ന്ന​ത്. 2500 ച​തു​ര​ശ്ര അ​ടി​യോ​ളം വി​ശാ​ല​വും നൂ​ത​ന​വു​മാ​യ ബ​ഹു​നി​ല മ​ന്ദി​ര​വും അ​നു​ബ​ന്ധ സൗ​ക​ര്യ​ങ്ങ​ളു​മാ​ണ് ഇ​വി​ടെ ത​യാ​റാ​വു​ന്ന​ത്.

കെ​ട്ടി​ട നി​ർ​മാ​ണ​ത്തി​ന് സ്ഥ​ലം വാ​ങ്ങാ​ൻ മോ​ട്ടോ​ർ​കു​ന്ന് വാ​ർ​ഡ് മെം​ബ​ർ എ​സ്.​എം. സ​മീ​ന​യു​ടെ നേ​തൃ​ത്വ​ത്തി​ൽ 4.5 ല​ക്ഷം രൂ​പ ജ​ന​ങ്ങ​ളി​ൽ​നി​ന്ന് ശേ​ഖ​രി​ച്ച് ഏ​ഴ്​ സെ​ന്‍റ്​ സ്ഥ​ലം പ​ഞ്ചാ​യ​ത്ത് സെ​ക്ര​ട്ട​റി​യു​ടെ പേ​രി​ൽ വാ​ങ്ങി​ന​ൽ​കി​യി​രു​ന്നു. തു​ട​ർ​ന്ന് 55.5 ല​ക്ഷം രൂ​പ കേ​ന്ദ്ര ധ​ന​കാ​ര്യ ക​മീ​ഷ​ന്‍റെ ഹെ​ൽ​ത്ത് ഗ്രാ​ൻ​ഡ് ബ​ഹു​വ​ർ​ഷ പ്രോ​ജ​ക്​​ടാ​യി ഗ്രാ​മ​പ​ഞ്ചാ​യ​ത്തു​ക​ളി​ലെ ഫാ​മി​ലി വെ​ൽ​െ​ഫ​യ​ർ സെ​ന്‍റ​റു​ക​ൾ​ക്ക് പു​തി​യ കെ​ട്ടി​ട നി​ർ​മാ​ണ​ത്തി​നാ​യി അ​നു​വ​ദി​ച്ചു.

ആ​ദ്യ​ഘ​ട്ടം 27.75 ല​ക്ഷം രൂ​പ​യും തു​ട​ർ​വ​ർ​ഷം ബാ​ക്കി തു​ക​യും എ​ന്ന രീ​തി​യി​ലാ​ണ് ഗ്രാ​ൻ​റ്​ അ​നു​വ​ദി​ക്കാ​ൻ തീ​രു​മാ​നി​ച്ചി​ട്ടു​ള്ള​ത്. ടെ​ൻ​ഡ​ർ ന​ട​പ​ടി പൂ​ർ​ത്തീ​ക​രി​ച്ച കെ​ട്ടി​ട​ത്തി​ന്‍റെ നി​ർ​മാ​ണോ​ദ്ഘാ​ട​നം ഏ​ഴി​ന് വൈ​കീ​ട്ട്​ നാ​ലി​ന്​ വെ​ളി​ന​ല്ലൂ​ർ ഗ്രാ​മ​പ​ഞ്ചാ​യ​ത്ത് പ്ര​സി​ഡ​ന്‍റ്​ എം. അ​ൻ​സ​ർ നി​ർ​വ​ഹി​ക്കും.

പ​ഞ്ചാ​യ​ത്ത് വൈ​സ്​ പ്ര​സി​ഡ​ന്‍റ്​ ജെ. ​റീ​ന അ​ധ്യ​ക്ഷ​ത വ​ഹി​ക്കും. മോ​ട്ടോ​ർ​കു​ന്ന്, ആ​ക്ക​ൽ, ചെ​റി​യ​വെ​ളി​ന​ല്ലൂ​ർ എ​ന്നീ വാ​ർ​ഡു​ക​ളി​ലാ​ണ് പെ​രു​വ​ന്തോ​ട് ഫാ​മി​ലി വെ​ൽ​െ​ഫ​യ​ർ സെ​ന്‍റ​റി​ന്‍റെ പ്ര​വ​ർ​ത്ത​ന​മേ​ഖ​ല. ആ​ദ്യ​ഘ​ട്ട നി​ർ​മാ​ണ​പ്ര​വ​ർ​ത്ത​ന​ങ്ങ​ൾ ഏ​ഴ്​ മാ​സ​ത്തി​നു​ള്ളി​ൽ പൂ​ർ​ത്തീ​ക​രി​ക്കു​മെ​ന്ന് പ​ഞ്ചാ​യ​ത്ത് പ്ര​സി​ഡ​ന്‍റ്​ അ​റി​യി​ച്ചു.