24 ദിവസം പിന്നിട്ട്​ ഉപവാസം; യൂഹാനോൻ റമ്പാനുമായി എം.എൽ.എ ചർച്ച നടത്തി

മൂവാറ്റുപുഴ: യാക്കോബായ വിശ്വാസികളുടെ പള്ളികൾ നഷ്‍ടമാകുന്നത് തടയണമെന്നാവശ്യപ്പെട്ട് നിരാഹാര സമരം നടത്തുന്ന യൂഹാനോൻ റമ്പാനെ എൽദോ എബ്രഹാം എം.എൽ.എ സന്ദർശിച്ച്​ ചർച്ച നടത്തി. ജനറൽ ആശുപത്രിയിൽ 24ാം ദിവസവും ഉപവാസം തുടരുന്ന മക്കാബി ഡയറക്ടർ യൂഹാനോൻ റമ്പാ​െൻറ ആരോഗ്യനില മോശമായതിനെത്തുടർന്നാണ് ചർച്ച നടത്തിയത്. അദ്ദേഹത്തെ മെഡിക്കൽ കോളജ്​ ആശുപത്രിയിലേക്ക്​ മാറ്റണമെന്ന് നിർദേശമുണ്ട്​.

മുഖ്യമന്ത്രിയുമായി ചർച്ച നടത്താൻ അവസരമൊരുക്കണമെന്ന് ചർച്ചയിൽ യൂഹാനോൻ റമ്പാൻ എം.എൽ.എയോട് ആവശ്യപ്പെട്ടു. ഇക്കാര്യം മുഖ്യമന്ത്രിയുടെ ഓഫിസിൽ അറിയിച്ചിട്ടുണ്ടെന്നും യാക്കോബായ, ഓർത്തഡോക്സ് വിഭാഗങ്ങൾ തമ്മിലുള്ള സർക്കാർതല ചർച്ചകൾക്ക്​ ശേഷം മുഖ്യമന്ത്രിയുമായി മക്കാബി ഭാരവാഹികൾക്ക് ചർച്ച നടത്താൻ അവസരമൊരുക്കാൻ നടപടി സ്വീകരിക്കുമെന്നും എം.എൽ.എ വ്യക്തമാക്കി.