ഓൺലൈനിൽ തെരഞ്ഞെടു​പ്പി​െൻറ​ കേളികൊട്ടുണർന്നു; ലൈക്കും ഷെയറും ഉറപ്പാക്കി പാർട്ടികൾ

ഇടുക്കി: തദ്ദേശ തെരഞ്ഞെടുപ്പിലേക്ക്​ നീങ്ങവെ കോവിഡ് കാലത്ത് പ്രചാരണവും വോട്ടുപിടിത്തവും ബദൽ വഴികളിലൂടെ കെ‍ാഴുപ്പിക്കാൻ അണിയറ പ്രവർത്തനങ്ങളിലാണ്​ രാഷ്​ട്രീയപാർട്ടികൾ.

കോവിഡ് നിയന്ത്രണങ്ങളോടെയാകും തദ്ദേശ തെരഞ്ഞെടുപ്പ്​ നടക്കുകയെന്നത്​ മുൻകൂട്ടിക്കണ്ടാണ്​ പ്രവർത്തനം. ജില്ലയിൽ പ്രധാന രാഷ്​ട്രീയ പാർട്ടികളുടെയെല്ലാം സമൂഹമാധ്യമ പ്രചാരണവിഭാഗം അവസാനഘട്ട പ്രവർത്തനങ്ങൾ ആസൂത്രണത്തിലാണ്​. വീടുകൾ കയറിയുള്ള പ്രചാരണത്തിന് പ്രവർത്തകരുടെ എണ്ണം പരമാവധി കുറച്ച് (പരമാവധി മൂന്നുപേർ) സ്ക്വാഡ് ടീമുകൾ എല്ലാ രാഷ്​​ട്രീയ പാർട്ടികളുടെയും അണിയറയിൽ ഒരുങ്ങുന്നുണ്ട്.

തെരഞ്ഞെടുപ്പ് കമീഷ​െൻറ നിർദേശം വരുന്നതിനനുസരിച്ചാകും സ്ക്വാഡിലെ ആളുകളുടെ എണ്ണം നിശ്ചയിക്കുക. കോവിഡ് വരുത്തിയ മാറ്റങ്ങളുമായി പുതിയ രീതികളിലെ പ്രചാരണങ്ങളുടെ ഏറ്റുമുട്ടൽ കൂടിയാകും ഇൗ ​െതരഞ്ഞെടുപ്പ്.

പോരിനൊരുങ്ങി കേരള കോൺഗ്രസുകൾ

രണ്ടില രണ്ടായി നിൽക്കു​േമ്പാൾ തദ്ദേശ തെരഞ്ഞെടുപ്പിൽ ആധിപത്യം നേടിയെടുക്കാൻ തന്ത്രം മെനയുകയാണ്​ പിളർന്നുനിൽക്കുന്ന കേരള ​േകാൺഗ്രസ്. പരസ്പരം സൈബർ പോരിന് പുറമേ മേൽക്കൈ ലക്ഷ്യമാക്കി ശക്തമായ പ്രാചാരണമാണ് ജോസഫ്​-ജോസ്​ പക്ഷങ്ങൾ നടത്തുന്നത്. കഴിഞ്ഞതവണ കേരള കോൺഗ്രസിന്​ ലഭിച്ച മുഴുവൻ സീറ്റിലും കണ്ണുവെച്ച് ജോസഫ്​ പക്ഷം മുന്നോട്ടുനീങ്ങു​േമ്പാൾ മുന്നണിക്ക് പുറത്തുപോകാൻ കാത്തുനിൽക്കുന്ന ജോസ്​ പക്ഷത്തിന്​ ഇടതു പരിഗണനയുടെ തോത്​ എത്ര​െയന്നതിൽ ആശങ്കയുണ്ട്​. എന്നിരുന്നാലും ശക്തിക്കൊത്ത്​ സീറ്റ്​ കിട്ടു​െമന്ന പ്രതീക്ഷയാണ്​ ഇവർക്കുള്ളത്​. ധാരണ പൂർണമായില്ലെങ്കിൽ എൽ.ഡി.എഫിന്​ ഗുണകരമായി ഒറ്റക്ക്​ ഗോദയിലിറങ്ങുന്നതും ആലോചനയിലുണ്ട്​്​​. എൽ.ഡി.എഫ്​ പ്രവേശം കീറാമുട്ടിയായാൽ ഒറ്റക്ക്​ ​മത്സരിക്കുന്നതും പരിഗണിക്കുന്നു.

കച്ചമുറുക്കി കോൺഗ്രസ്

സ്​ക്വാഡ് പ്രവർത്തനത്തിന് ശക്തി വർധിപ്പിച്ചും സമൂഹ മാധ്യമങ്ങളിൽ പ്രചാരണം കൂടുതൽ കാര്യക്ഷമമാക്കിയും​ തെരഞ്ഞെടുപ്പിനൊരുങ്ങുകയാണ് കോൺഗ്രസ്​​. ജില്ലയിലെ എല്ലാ വാർഡുകളിലും വാട്ട്സ്ആപ് ഗ്രൂപ്പുകൾ തുടങ്ങി. '

ജനശക്തി' പേരിലാണ്​ ടെലഗ്രാം, വാട്​സ്​ആപ്​ ഗ്രൂപ്പുകളുടെ രംഗപ്രവേശം. മണ്ഡലംതലം വരെ നാലുപേരുടെ റിസോഴ്​സ്​ സമിതികളും രൂപവത്​കരിച്ചു. വാർഡ്തല സമിതികൾ പകുതിയോളമായി. ഡി.സി.സി ഭാരവാഹികൾക്ക് ബ്ലോക്കുകളുടെ ചുമതലകൾ നൽകിയിട്ടുണ്ട്​.

നേട്ടം കൊയ്യാൻ ബി.ജെ.പി

കേന്ദ്രസർക്കാർ നടത്തുന്ന വികസനം ചർച്ചയാക്കി നേട്ടം കൊയ്യാൻ ബി.ജെ.പി ഐ.ടി മേഖലകളിലെ വിദഗ്​ധരെ ഉപയോഗിച്ചാണ് സമൂഹമാധ്യമ പ്രചാരണത്തിന് ജില്ലയിൽ ഒരുങ്ങുന്നത്.

സമൂഹമാധ്യമങ്ങളുടെ പ്രചാരണം കൂടുതൽ കാര്യക്ഷമമാക്കി നില കൂടുതൽ മെച്ചപ്പെടുത്താമെന്നാണ്​ കണക്കുകൂട്ടൽ. ജില്ല തലത്തിലെ വിദഗ്ധരുടെ നിർദേശത്തിൽ മണ്ഡലാടിസ്ഥാനത്തിൽ പ്രവർത്തനം തുടങ്ങിയ പാർട്ടി വാർഡുതല സമിതികളെയും ഉടൻ നിയോഗിക്കും.

തയാറെടുത്ത് സി.പി.​​െഎ

മീ‍ഡിയ സെല്ലി​െൻറ പ്രവർത്തനം കൂടുതൽ ശക്തമാക്കാനുള്ള തീരുമാനത്തിലാണ് സി.പി.ഐ. ജില്ലയിലെ വളൻറിയർമാരുടെ ആദ്യഘട്ട പരിശീലനം പൂർത്തിയായി.

പഞ്ചായത്ത്, ബ്ലോക്ക്, ജില്ലതല മേഖലകളിൽ പ്രത്യേകം ഗ്രൂപ്പുകളുടെ പ്രവർത്തനമുണ്ടാകും. പെ‍ാതുജനങ്ങളെ അടക്കം ഉൾപ്പെടുത്തി പഞ്ചായത്ത് തലങ്ങളിൽ പ്രത്യേകം വാട്സ്​ആപ് കൂട്ടായ്മകൾ രൂപവത്​കരിച്ചാണ്​ പ്രചാരണം. പെ‍ാതുജനങ്ങളുടെ വിവിധ വിഷയങ്ങളിലെ അഭിപ്രായങ്ങളും വിലയിരുത്തിയാകും ഗ്രൂപ്പുകൾ പ്രവർത്തിക്കുക.

സർവസജ്ജമായി സി.പി.എം

സമൂഹമാധ്യമങ്ങളെ തദ്ദേശ തെരഞ്ഞെടുപ്പിൽ പരമാവധി ഉപയോഗപ്പെടുത്താനാണ്​ സി.പി.എം തീരുമാനം. ബ്രാഞ്ച് തലങ്ങളിലെ വാട്സ്​ആപ് കൂട്ടായ്മകളിലൂടെയാണ്​ യോഗംചേരുക. ഫേസ്​ബുക്ക്​ ലൈവിലൂടെ നേതാക്കൾ സമൂഹത്തോട്​ സംവദിക്കും. പോഷകസംഘടനകൾ സമൂഹമാധ്യമരംഗത്തെ പ്രചാരണങ്ങളിൽ ഏറെ മുന്നോട്ടുപോയി. ഈ മാതൃക പിന്തുടർന്നാകും സി.പി.എമ്മി​െൻറ തെര‍ഞ്ഞെടുപ്പുകാല പ്രവർത്തനം. വിവിധ തലങ്ങളിൽ സമൂഹമാധ്യമങ്ങളിലും വാട്സ്​ആപ്പിലുമുള്ള കൂട്ടായ്മകൾ നിലവിലുണ്ട്.

ലീഗും സജീവം

സൈബർ വിങ് കൂടുതൽ ശക്തമാക്കാനുള്ള തീരുമാനം നടപ്പാക്കുകയാണ്​ ജില്ലയിലെ മുസ്‍ലിംലീഗ് നേതൃത്വം. അതിനുള്ള ഒരുക്കം സജീവമാക്കി. സ്വാധീന മേഖലയിൽ വീടുകളിലെത്തിയുള്ള കാമ്പയിനാണ്​ അടുത്തത്​. സ്​ക്വാഡ്​ രൂപവത്​കരിച്ചുള്ള പ്രവർത്തനവും ആസൂത്രണം ചെയ്യുന്നു. നിലവിൽ താഴേത്തട്ട്​ മുതൽ ജില്ല നേതൃത്വം വരെ പ്രവർത്തനം ഏകോപിപ്പിക്കുന്നതിന് വാട്സ്​ആപ് ഗ്രൂപ്പുകൾ പ്രവർത്തിക്കുന്നുണ്ട്.