പി.പി.ഇ കിറ്റുകളുടെ ഗുണനിലവാരത്തിൽ സംശയം പ്രകടിപ്പിച്ച്​ കെ.ജി.എം.ഒ.എ

തിരുവനന്തപുരം: ആരോഗ്യ പ്രവർത്തകർക്കുള്ള പി.പി.ഇ കിറ്റുകളുടെ ഗുണനിലവാരത്തിൽ സംശയം പ്രകടിപ്പിച്ച്​​ സർക്കാർ ഡോക്​ടർമാരുടെ സംഘടനയായ കെ.ജി.എം.ഒ.എ രംഗത്ത്​. പി.പി.ഇ കിറ്റുകളുടെ ഗുണനിലവാരം പരിശോധിച്ചുറപ്പാക്കണമെന്നാവശ്യപ്പെട്ട്​ കെ.ജി.എം.ഒ.എ ആരോഗ്യമന്ത്രി കെ.കെ. ശൈലജക്ക്​ കത്ത്​ നൽകി.

കേരളത്തിൽ കോവിഡ്​ രോഗികളുടെ എണ്ണം വർധിക്കുന്ന പശ്ചാത്തലത്തിലാണ്​ കിറ്റുകളുടെ ഗുണനിലവാരം പരിശോധിക്കണമെന്ന് കെ.ജി.എം.ഒ.എ ആവശ്യമുന്നയിച്ചത്​. പലയിടങ്ങളിലും എൻ. 95 മാസ്​കുകൾക്ക്​ പകരം എൻ.95 ആണെന്ന്​ തോന്നുന്ന തരം മാസ്​കുകളാണ്​ നൽകുന്നതെന്ന്​ പരാതിയുണ്ട്​. പി.പി.ഇ കിറ്റുകളുടെ ഗുണനിലവാരത്തിലും ഡോക്​ടർമാർക്ക്​ സംശയമുണ്ട്​.

പലയിടങ്ങളിലും ആരോഗ്യ പ്രവർത്തകർക്ക്​ കോവിഡ്​ സ്ഥിരീകരിച്ച സാഹചര്യം പരിഗണിച്ച്​ പി.പി.ഇ കിറ്റുകളുടെ ഗുണനിലവാരം ഉറപ്പു വരുത്തണമെന്നും അതിനുള്ള സംവിധാനം സംസ്ഥാനത്ത്​ ഒരുക്കണമെന്നുമാണ്​​ ഡോക്​ടർമാരുടെ സംഘടന ആവശ്യപ്പെടുന്നത്​.