സിദ്ധീഖ് കാപ്പന്‍റെ ജീവൻ രക്ഷിക്കണമെന്നാവശ്യപ്പെട്ട്​ കാന്തപുരം പ്രധാന മന്ത്രിക്ക് കത്തയച്ചു

മാധ്യമ പ്രവർത്തകൻ സിദ്ധീഖ് കാപ്പന്‍റെ ജീവൻ രക്ഷിക്കണമെന്നാവശ്യപ്പെട്ട്​ കാന്തപുരം എ.പി അബൂബക്കർ മുസ്‌ലിയാർ പ്രധാന മന്ത്രി നരേന്ദ്ര മോദിക്ക് കത്തയച്ചു. സിദ്ധീഖ്​ കാപ്പന്​ ശരിയായ ചികിത്സ ലഭിക്കാൻ പ്രധാനമന്ത്രി ഇടപെടണമെന്ന്​ കത്തിൽ ആവശ്യപ്പെട്ടു.

മാധ്യമ വാർത്തകളിൽ നിന്ന് ലഭിച്ച വിവരമനുസരിച്ച്​, മഥുര മെഡിക്കൽ കോളജിൽ ദയനീയമായ അവസ്ഥയിലാണ് സിദ്ധീഖ് കപ്പാനുള്ളതെന്ന്​ കാന്തപുരം പ്രധാനമന്ത്രിക്ക്​ നൽകിയ കത്തിൽ ചൂണ്ടികാട്ടി.

'കോവിഡും മറ്റു രോഗങ്ങളും മൂലം ആരോഗ്യാവസ്‌ഥ ദയനീയമാണ്. പ്രാഥമിക മനുഷ്യാവകാശങ്ങൾ നിഷേധിക്കപ്പെട്ട്, കൈ ബന്ധിക്കപ്പെട്ട അവസ്ഥയിൽ, ബാത്റൂമിലേക്ക് പോലും പോകാൻ അനുവദിക്കപ്പെടാതെ വിധത്തിൽ ദിവസങ്ങളായി അദ്ദേഹം അവശമായ അവസ്ഥയിലാണ്​ എന്നാണ്​ ലഭിച്ച വിവരം. അതിനാൽ ന്യൂഡൽഹിയിലെ എയിംസിലേക്കോ കേരളത്തിലേക്കോ മാറ്റി, അദ്ദേഹത്തിന് മെച്ചപ്പെട്ട ചികിൽസ ഉറപ്പു വരുത്താൻ ഇടപെടണം' -കാന്തപുരം കത്തിൽ ആവശ്യപ്പെട്ടു.