കേന്ദ്രമന്ത്രിമാരുടെ ബംഗ്ലാവ് അറ്റകുറ്റപ്പണി ചെലവ് 92.35 കോടി; പത്ത് വർഷത്തിനിടെ മൂന്നിരട്ടിയായി, ഒരു മന്ത്രിക്ക് 1.2 കോടി

ന്യൂഡൽഹി: രാജ്യതലസ്ഥാനമായ ഡൽഹിയിലെ ലുട്ടിയൻസ് സോണിൽ കേന്ദ്രമന്ത്രിമാർക്കായി അനുവദിച്ചിരിക്കുന്ന ഔദ്യോഗിക ബംഗ്ലാവുകളുടെ നവീകരണത്തിനും അറ്റകുറ്റപ്പണികൾക്കുമായി വരുന്ന വാർഷിക ചെലവ് സർവകാല റെക്കോർഡിൽ എത്തിനിൽക്കുന്നു. വിവരാവകാശ നിയമപ്രകാരമുള്ള പുതിയ കണക്കുകൾ പുറത്തുവരുമ്പോൾ, 2025-26 സാമ്പത്തിക വർഷത്തിൽ മാത്രം ഈ ബംഗ്ലാവുകളുടെ സംരക്ഷണത്തിനായി സർക്കാർ ഖജനാവിൽ നിന്നും ചെലവഴിച്ചിരിക്കുന്നത് ഞെട്ടിക്കുന്ന തുകയായ 92.35 കോടി രൂപയാണ്. ബ്രിട്ടീഷ് കാലഘട്ടത്തിന്റെ ശേഷിപ്പുകളായ ചരിത്രപ്രധാനമായ കെട്ടിടങ്ങളുടെ പരിപാലനച്ചെലവ് വർഷം തോറും കുത്തനെ ഉയരുന്നതിനെതിരെ ഇതിനകം തന്നെ വിവിധ കോണുകളിൽ നിന്ന് ചർച്ചകളും വിമർശനങ്ങളും ഉയർന്നുതുടങ്ങിയിട്ടുണ്ട്.

ലഭ്യമായ ഔദ്യോഗിക വിവരങ്ങൾ അനുസരിച്ച്, 2014-15 കാലയളവിൽ ലുട്ടിയൻസ് ബംഗ്ലാവുകളുടെ അറ്റകുറ്റപ്പണിക്കായി 27.47 കോടി രൂപ മാത്രമായിരുന്നു ചെലവ് വന്നിരുന്നത്. എന്നാൽ കഴിഞ്ഞ പത്തുകൊല്ലത്തിനിടയിലുള്ള കണക്കുകൾ പരിശോധിക്കുമ്പോൾ ഈ തുക മൂന്നിരട്ടിയിലധികമായി വർധിച്ചതായി കാണാം. സെൻട്രൽ പബ്ലിക് വർക്ക്സ് ഡിപ്പാർട്ട്മെന്റിന്റെ (സി.പി.ഡബ്ല്യു.ഡി) നേരിട്ടുള്ള മേൽനോട്ടത്തിലാണ് ഭീമമായ തുക ഉപയോഗിച്ച് നിർമ്മാണ പ്രവർത്തനങ്ങളും പരിപാലനവും നടക്കുന്നത്. 2014-15 മുതൽ 2025-26 വരെയുള്ള വർഷങ്ങളിൽ മാത്രം ലുട്ടിയൻസ് ബംഗ്ലാവുകളുടെ സംരക്ഷണത്തിനായി സർക്കാർ ആകെ ചെലവഴിച്ച തുക 547.68 കോടി രൂപ കവിയും.

ഈ ഭീമമായ ചെലവിന് പിന്നിലെ കാരണങ്ങളായി അധികൃതർ ചൂണ്ടിക്കാണിക്കുന്നത് കെട്ടിടങ്ങളുടെ പഴക്കമാണ്. ഏകദേശം 80 മുതൽ 100 വർഷം വരെ പഴക്കമുള്ള ആഡംബര ബംഗ്ലാവുകളിൽ മേൽക്കൂര ചോർച്ച, ചിതൽ ശല്യം, കാലഹരണപ്പെട്ട ഇലക്ട്രിക്കൽ വയറിങ്, പ്ലംബിങ് തകരാറുകൾ തുടങ്ങിയ നിരവധി പ്രശ്നങ്ങളാണ് പതിവായി ഉണ്ടാകാറുള്ളത്. നിർമ്മാണ സാമഗ്രികളുടെ വിലക്കയറ്റവും തൊഴിലാളികളുടെ കൂലി വർദ്ധനവും അറ്റകുറ്റപ്പണി ചെലവ് ഇത്രയധികം ഉയരാൻ കാരണമായിട്ടുണ്ട്. നിലവിൽ രാജ്യത്ത് 70 മുതൽ 72 വരെ കാബിനറ്റ് മന്ത്രിമാരും സഹമന്ത്രിമാരുമാണ് ഔദ്യോഗിക വസതികളിൽ കഴിയുന്നത്. ഇതനുസരിച്ച് കഴിഞ്ഞ വർഷത്തെ കണക്കുകൾ നോക്കിയാൽ ഒരു മന്ത്രിയുടെ ബംഗ്ലാവിലെ അറ്റകുറ്റപ്പണിക്കായി മാത്രം ശരാശരി 1.2 കോടി രൂപയോളം വരുന്നുണ്ടെന്നാണ് വിലയിരുത്തപ്പെടുന്നത്. ഓരോ വീടിന്റെയും പഴക്കവും അടിയന്തര ആവശ്യങ്ങളും പരിഗണിച്ചാണ് ഈ തുക വിനിയോഗിക്കുന്നത്. പൊതുജനങ്ങളുടെ നികുതിപ്പണം ഇത്തരത്തിൽ ആഡംബര ബംഗ്ലാവുകളുടെ അറ്റകുറ്റപ്പണികൾക്കായി വർഷം തോറും കോടിക്കണക്കിന് രൂപ ഒഴുക്കുന്നത് സാധാരണക്കാരായ ജനങ്ങൾക്കിടയിലും കടുത്ത അതൃപ്തിക്ക് ഇടയാക്കിയിട്ടുണ്ട്.