ആൾക്കൂട്ടാക്രമണം: പരിക്കേറ്റയാൾക്ക്​​ പൊലീസ്​ സംരക്ഷണം നൽകണം-​ സുപ്രീംകോടതി

ന്യൂഡൽഹി: ഉത്തർപ്രദേശിലെ ഹാപുരിൽ പശുക്കടത്തി​​​െൻറ പേരിൽ ആൾക്കൂട്ട ആ​ക്രമണത്തിന്​ ഇരയായ വ്യക്തിക്ക്​ പൊലീസ്​ സംരക്ഷണം നൽകണമെന്ന്​ സുപ്രീംകോടതി ഉത്തരവിട്ടു. ആൾക്കൂട്ട ആക്രമണത്തിൽ പരിക്കേറ്റ സമിയുദ്ദീന്​ (65) സംരക്ഷണം ഉറപ്പുവരുത്താൻ മീററ്റ്​ പൊലീസിന്​ കോടതി നിർദേശം നൽകി. ​സമിയുദ്ദീനെതിരായ അക്രമം സംബന്ധിച്ച്​ വിശദമായ റിപ്പോർട്ട്​ സമർപ്പിക്കാനും പൊലീസിനോട്​ ആവശ്യപ്പെട്ടു. 

 ജൂൺ 18നാണ്​ 45കാരനായ ഖാസിം ഖുറേഷിയെന്ന ഇറച്ചി വ്യാപാരിയെ ആൾക്കൂട്ടം മർദിച്ച് കൊലപ്പെടുത്തിയത്​. ആക്രമണത്തിൽ സമിയുദ്ദീന്​  ഗുരുതരമായി പരിക്കേൽക്കുകയും ചെയ്​തു. എന്നാൽ പശുവി​​​െൻറ പേരിലുള്ള ആക്രമണമല്ല നടന്നതെന്നായിരുന്നു പൊലീസ്​ വാദം. പിന്നീട്​ ഇതി​​​െൻറ ദൃ​ശ്യങ്ങൾ സോഷ്യൽ മീഡയയിൽ പ്രചരിച്ചതോടെ പൊലീസ്​ വെട്ടിലായി. സമിയുദ്ദീനെ ആള്‍ക്കൂട്ടം ചീത്ത വിളിക്കുന്നതിന്‍റെയും താടിപിടിച്ചു വലിച്ചു മർദിക്കുന്നതിന്‍റെയും ദൃശ്യങ്ങളാണ്​  പ്രചരിച്ചത്​. 

പശുവിൻറെ പേരിൽ തന്നെയാണ് തങ്ങൾ കൊലപാതകം നടത്തിയതെന്ന് ജാമ്യത്തിലിറങ്ങിയ പ്രതികൾ എൻ.ഡി.ടി.വി നടത്തിയ ഒളികാമറ അഭിമുഖത്തിൽ വെളിപ്പെടുത്തുകയും ചെയ്​തു. വെളിപ്പെടുത്തലിനെ തുടർന്ന് സംഭവത്തിൽ അടിയന്തിര ഇടപെടൽ ഉണ്ടാകണമെന്നാവശ്യപ്പെട്ട് ഹാപൂർ ആൾകൂട്ടക്കൊലയിലെ ഇരയുടെ അഭിഭാഷകർ സുപ്രിംകോടതിയെ സമീപിക്കുകയായിരുന്നു.