കശ്​മീരിൽ ഏറ്റുമുട്ടൽ; നാല്​ തീവ്രവാദികൾ കൊല്ലപ്പെട്ടു

ശ്രീനഗർ:  അനന്ത്​നാഗ്​ ജില്ലയിൽ സുരക്ഷ സേനയുമായുണ്ടായ ഏറ്റുമുട്ടലിൽ ഇസ്​ലാമിക്​ സ്​റ്റേറ്റ്​ ജമ്മു ആൻറ്​ കശ്​മിർ (െഎ.എസ്​.ജെ.കെ) മേധാവിയടക്കം നാല്​ തീവ്രവാദികൾ കൊല്ലപ്പെട്ടു. ജമ്മു കശ്​മിരിൽ ഇസ്​ലാമിക്​ സ്​റ്റേറ്റിന്​ നേതൃത്വം നൽകുന്ന ദാവൂദ്​ ആണ്​ കൊല്ലപ്പെട്ടതെന്ന്​ പൊലിസ്​ അറിയിച്ചു. ശ്രിഗുഫ്​വാരയിൽ നടന്ന വെടിവെപ്പിൽ ഒരു പൊലിസുകാരനും സിവിലിയനും  കൊല്ലപ്പെട്ടു.  സംഭവത്തിൽ മൂന്ന്​ സിവിലിയന്മാർക്ക്​ ഗുരുതര പരിക്കേറ്റു. 

തെക്കൻ കശ്​മിർ ശ്രിഗുഫ്​വാരയിലെ ഖിറാമിൽ തീവ്രവാദികൾ എത്തിയതായി രഹസ്യവിവരത്തെ തുടർന്നാണ്​ സുരക്ഷ സേന തെരച്ചിൽ നടത്തിയതെന്ന്​ ഡി.ജി.പി എസ്​.പി. വെയ്​ദ്​ അറിയിച്ചു. തീവ്രവാദികൾ വെടിവെച്ചതിനെ തുടറന്നാണ്​ തിരിച്ചടിച്ചത്​. സുരക്ഷ സേനക്ക്​ നേരെ പ്രദേശത്തെ ഒരു സംഘം യുവാക്കൾ കല്ലേറു നടത്തി. ഇവരെ പിരിച്ചയക്കാൻ സുരക്ഷ സേന ബലം പ്രയോഗിച്ചതിനെ തുടർന്ന്​ നിരവധി ​േപർക്ക്​ പരിക്കേറ്റൂ. 

സംഘർഷം തുടരുന്ന സാഹചര്യത്തിൽ,  മുൻകരുതലെന്ന നിലയിൽ  ശ്രീനഗർ, അനന്ത്​നാഗ്​, പുൽവാമ ജില്ലകളിലെ ഇൻറനെറ്റ്​ സർവീസുകൾ റദ്ദാക്കിയതായി പൊലിസ്​ പറഞ്ഞു.  
ശ്രീനഗറിലെ കാക്​ സരായി പ്രദേശത്ത്​ തീവ്രവാദി ആക്രമണത്തിൽ പരിക്കേറ്റ പൊലിസ്​ ഹെഡ്​കോൺസ്​റ്റബിൾ ഹബീബുല്ല മരണപ്പെട്ടൂ. കഴിഞ്ഞയാഴ്​ച സാധാരണ വാഹന പരിശോധനക്കിടെ തീവ്രാവാദികൾ നടത്തിയ വെടിവെപ്പിലാണ്​ ഹബീബുല്ലക്ക്​  പരിക്കേറ്റത്​.