സഹോദരനെ കൊലപ്പെടുത്തി മൃതദേഹം വെട്ടിനുറുക്കി പലയിടത്തായി ഉ​േപക്ഷിച്ച സംഭവത്തിൽ നടി അറസ്റ്റിൽ

ബംഗളൂരു: സഹോദരനെ കൊലപ്പെടുത്തിയശേഷം മൃതദേഹം വെട്ടിനുറുക്കി പലയിടത്തായി ഉപേക്ഷിച്ച സംഭവത്തിൽ നടി അറസ്റ്റിൽ. കന്നട നടിയായ ഷനായ കട്​വെയാണ്​ അറസ്റ്റിലായത്​.

നാലംഘ സംഘത്തിനൊപ്പം ചേർന്ന്​ സഹോദരൻ രാകേഷ്​ കട്​വെയെ കൊലപ്പെടുത്തിയ ശേഷം മൃതദേഹ അവശിഷ്​ടങ്ങൾ പലയിടത്തായി ഉപേക്ഷിക്കുകയായിരുന്നു. നടിയുടെ പ്രണയബന്ധത്തിലെ എതിർപ്പാണ്​ കൊലപാതകത്തിന്​ കാരണമെന്നാണ്​ പ്രാഥമിക വിവരം.

രാകേഷിന്‍റെ ഉടലില്ലാത്ത തല ദേവരഗുഡിഹാൽ വനപ്രദേശത്തുനിന്നാണ്​ കണ്ടെത്തിയത്​. മറ്റു മൃതദേഹാവശിഷ്​ടങ്ങൾ ഗഡാഗ്​ റോഡിൽനിന്നും ഹുബ്ബള്ളിയിലെ വിവിധ ഭാഗങ്ങളിൽനിന്നും ലഭിച്ചു.

ഹുബ്ബള്ളി ​പ്രദേശിക പൊലീസാണ്​ ഷനായയെ അറസ്റ്റ്​ ചെയ്​തത്​. കേസന്വേഷണത്തിന്​ നാലംഗ പൊലീസ്​ സംഘത്തെ നിയോഗിച്ചിരുന്നു.

നടിയെ കൂടാതെ സഹായികളായ നിയാസ് അഹ്​മദ്​ കാടിഗർ, തൗസിഫ്​ ചന്നപുർ, അൽത്താഫ്​ മുല്ല, അമാൻ ഗിരാനിവാലെ എന്നിവരും അറസ്റ്റിലായിട്ടുണ്ട്​. ഏപ്രിൽ 22ന്​​ ഷനായയുടെ അറസ്​റ്റ്​ രേഖപ്പെടുത്തിയതിന്​ ശേഷം ജുഡീഷ്യൽ കസ്റ്റഡിയിൽ വിട്ടു.

ഷനായയും പ്രതികളിലൊരാള നിയാസ്​ അഹ്മ​ദ്​ കാടിഗറുമായുള്ള പ്രണയബന്ധം രാകേഷ്​ എതിർത്തതാണ്​ കൊലപാതകത്തിന്​ കാരണമെന്ന്​ പൊലീസ്​ അറിയിച്ചു. ചിത്രത്തിന്‍റെ പ്രമോഷൻ പരിപാടികൾക്കായി ഏപ്രിൽ ഒമ്പതിന്​ ഷനായ വീട്ടിലെത്തിയിരുന്നു. അതേവീട്ടിൽവെച്ച്​ അതേ ദിവസമാണ്​ രാകേഷ്​ കൊല്ലപ്പെട്ടതെന്ന്​ പൊലീസ്​ കണ്ടെത്തി. കൊലപാതകത്തിന്​ ശേഷം നിയാസ്​ അഹ്മ​ദും കൂട്ടാളികളും മൃതദേഹഭാഗങ്ങൾ വിവിധ ഇടങ്ങളിൽ ഉപേക്ഷിക്കുകയായിരുന്നു.

കന്നഡയിലെ പ്രമുഖ മോഡലും നടിയുമാണ്​ ഷനായ. 2018ൽ പുറത്തിറങ്ങിയ ഇടം പ്രേമം ജീവനം എന്ന ചിത്രത്തിൽ ശ്രദ്ധേയ വേഷം കൈകാര്യം ചെയ്​തിരുന്നു.