കർഷക പ്രക്ഷോഭത്തെ​ പിന്തുണച്ച ഡൽഹി സിഖ്​ വി​രുദ്ധ വികാരത്തിലേക്ക്​ ചുവടുമാറുന്നോ?

ന്യൂഡൽഹി: കാർഷിക നിയമങ്ങൾക്കെതി​രെ നീണ്ട ആഴ്​ചകൾ മരംകോച്ചും തണുപ്പിലും കർഷകർ നയിച്ച പ്രക്ഷോഭങ്ങളെ ഹൃദയം നൽകി പിന്തുണച്ച ഡൽഹിയിൽ റിപ്പബ്ലിക്​ ദിനത്തിലെ അപ്രതീക്ഷിത സംഭവങ്ങളോടെ ​കാര്യങ്ങൾ സിഖ്​വിരുദ്ധ വികാരത്തിലേക്ക്​ വഴിമാറ്റാനുള്ള ശ്രമം വിജയം കാണുന്നതായി സൂചന.

സർക്കാർ പിന്തുണയോടെ കുത്തക മുതലാളിമാർക്ക്​ ഭൂമി കൈയേറാനും വിളകൾ തുഛവിലക്ക്​ ഏറ്റെടുക്കാനും അവസരമൊരുക്കുന്ന നിയമങ്ങളെന്ന്​ പ്രഖ്യാപിച്ച്​​ സമരത്തിനെത്തിയ ചിലർ പതിയെ മനസ്സു മാറുന്നതായാണ്​ റിപ്പോർട്ട്​. ട്രാക്​ടർ റാലിക്കിടെ പൊലീസുകാർക്ക്​ പരിക്കേറ്റതും അനുബന്ധ സംഭവങ്ങളും ഇവരെ പ്രകോപിച്ചതായി റിപ്പോർട്ടുകൾ പറയുന്നു. കാര്യങ്ങൾ കൈവിട്ടാൽ 1984ലെ സിഖ്​ വിരുദ്ധ കലാപത്തിന്​ സമാനമായ സാഹചര്യം ഡൽഹിയിൽ സംഭവിക്കുമോയെന്ന ആശങ്കയും ചിലർ പങ്കുവെക്കുന്നുണ്ട്​.

കർഷക നിയമങ്ങൾ പാർലമെൻറ്​ കടന്ന്​ ദിവസങ്ങൾ കഴിഞ്ഞ്​ കഴിഞ്ഞ നവംബറിൽ പഞ്ചാബിൽനിന്നുൾപെടെ കർഷകർ ഡൽഹിയിലെത്തിയ ഉടൻ ചില ബി.ജെ.പി നേതാക്കൾ ഇവരെ ഭീകരരെന്നും ഖലിസ്​താനികളെന്നും മുദ്രകുത്തി പരസ്യമായി രംഗത്തെത്തിയിരുന്നു. പക്ഷേ, ഡൽഹിയിൽനിന്ന്​ ഹരിയാന, ഉത്തർ പ്രദേശ്​, രാജസ്​ഥാൻ തുടങ്ങി വിവിധ സംസ്​ഥാനങ്ങളിലേക്ക്​ സമരം നീണ്ടതോടെ കേന്ദ്രം അടിച്ചമർത്തലിനു പകരം ചർച്ചയുടെ വഴി തെരഞ്ഞെടുത്തു. കേന്ദ്രം വഴങ്ങുന്നുവെന്ന്​ വന്നതോടെ പ്രതീക്ഷയിലായ കർഷകർ സമാധാനപരമായി റിപ്പബ്ലിക്​ ദിനത്തിൽ ട്രാക്​ടർ റാലി നടത്താൻ തീരുമാനമെടുക്കുകയായിരുന്നു. ഇതുപക്ഷേ, അപ്രതീക്ഷിത സാഹചര്യങ്ങളിൽ പൊലീസിനെതിരായ അതിക്രമത്തിലും മറ്റുമാണ്​ എത്തിയത്​.

അന്നത്തെ പ്രക്ഷോഭവും ഏറെയും സമാധാനപൂർണമായിരുന്നുവെങ്കിലും മാധ്യമ ശ്രദ്ധ ആക്രമണങ്ങളിൽ ഊന്നിയതാണ്​ വില്ലനായതെന്ന്​ കർഷക നേതാക്കൾ പറയുന്നു. അതിക്രമങ്ങൾക്ക്​ ചിലർ ബോധപൂർവം നുഴഞ്ഞുകയറുകയായിരുന്നുവെന്നും അവർ ആരോപിക്കുന്നു.