Top
Begin typing your search above and press return to search.
exit_to_app
exit_to_app
Homechevron_rightGrihamchevron_rightചാണകത്തിൽ നിന്ന്...

ചാണകത്തിൽ നിന്ന് ഇഷ്ടികയും സിമന്‍റും പെയിന്‍റും നിർമിച്ച്​ ഹരിയാന പ്രഫസർ

text_fields
bookmark_border
ചാണകത്തിൽ നിന്ന് ഇഷ്ടികയും സിമന്‍റും പെയിന്‍റും നിർമിച്ച്​ ഹരിയാന പ്രഫസർ
cancel

റോഹ്തക്: ചാണകത്തിൽനിന്ന്​ 'കൊറോണ മരുന്ന്​' കണ്ടെത്തിയ വാർത്തയായിരുന്നു കഴിഞ്ഞ ഏതാനും നാളുകളായി സോഷ്യൽമീഡിയയിലെ വൈറൽ. കോറോണ വരാതിരിക്കാൻ നിരന്നുനിന്ന്​ ചാണകത്തിലും പശുമൂത്രത്തിലും കുളിക്കുന്നവരുടെ ചിത്രങ്ങളും ചൂടപ്പംപോലെ പ്രചരിച്ചു. എന്നാൽ, വ്യത്യസ്​തമായ ചില ചാണക ഉൽപന്നങ്ങളുമായി രംഗത്തെത്തിയിരിക്കുകയാണ്​ ഹരിയാന റോഹ്തക് ജില്ലയിലെ മേദിന സ്വദേശിയായ പ്രഫസർ ശിവദർശൻ മാലിക്. ഇഷ്ടികയും സിമന്‍റും പെയിന്‍റുമാണ്​ ഇദ്ദേഹം ചാണകത്തിൽനിന്ന്​ നിർമിച്ചത്​.

കൊറോണ വരാതിരിക്കാൻ ചാണകത്തിൽ കുളിച്ച്​ ഒടുവിൽ മറ്റു പല രോഗങ്ങളും വന്നതുപോലെ ആകുമോ ഇതും എന്ന ചോദ്യവുമായാണ്​ നെറ്റിസൺസ്​ ഈ പുതിയ കണ്ടുപിടുത്തത്തെ നേരിടുന്നത്​. എന്നാൽ, ആറ്​ വർഷമായി താൻ ചാണകത്തിൽ നിന്ന് സിമൻറ്, ഇഷ്ടിക, പെയിന്‍റ്​ എന്നിവ ഉത്പാദിപ്പിക്കുന്നതായി രസതന്ത്രത്തിൽ പിഎച്ച്ഡി നേടിയ ശിവദർശൻ പറയുന്നു. നിരവധി പേർക്ക് ഇതിൽ പരിശീലനവും നൽകിയിട്ടുണ്ട്. ചാണകത്തിൽനിന്ന്​ ബയോഗ്യാസ്​ ഉണ്ടാക്കുന്ന കർഷകർ ബാക്കിവരുന്ന ചാണകം വേണ്ട രീതിയിൽ ഉപയോഗിക്കുന്നില്ല എന്ന കാര്യം ശ്രദ്ധയിൽപെട്ടപ്പോഴാണ്​ ഇദ്ദേഹം പുതിയ പരിക്ഷണത്തിന്​ മുതിർന്നത്​.

ബയോഗ്യാസ്​ പ്ലാന്‍റ്​ സ്ഥാപിച്ചശേഷം വലിയ അളവിൽ ചാണകം പാഴാക്കുകയോ ചാണക വറളി ഉണ്ടാക്കാൻ മാത്രം ഉപയോഗിക്കുകയോ ചെയ്യുന്നുവെന്നാണ്​ ശിവദർശൻ പറയുന്നത്​. ഇന്ത്യയിൽ പ്രതിദിനം 33 മുതൽ 40 ദശലക്ഷം ടൺ വരെ ചാണകമാണ്​ ഉത്പാദിപ്പിക്കുന്നത്​. ചാണകത്തെക്കുറിച്ച് ഗവേഷണം നടത്തിയ ഇദ്ദേഹം അതിന്‍റെ താപനിയന്ത്രണ കഴിവിലാണ്​ ശ്രദ്ധയൂന്നിയത്​. ശൈത്യകാലത്ത് വീടുകളെ ചൂടാക്കാനും വേനൽക്കാലത്ത് തണുപ്പിക്കാനും ഈ കഴിവ്​ ഉപയോഗിക്കാമെന്ന്​ ഇദ്ദേഹം പറയുന്നു.

പ്രഫസർ ശിവദർശൻ മാലിക്


റോഹ്തകിലെ ഒരു കോളജിൽ ഏതാനും മാസം പ്രഫസറായി ജോലി ചെയ്ത ഡോ. ശിവദർശൻ മാലിക് 2004 ൽ ഡൽഹി ഐഐടിയും ലോക ബാങ്കും സ്പോൺസർ ചെയ്ത റിന്യൂവബിൾ എനർജി പ്രോജക്ടിൽ ചേർന്നു. 2005 ൽ യുഎൻ‌ഡി‌പി പദ്ധതിയിൽ പ്രവർത്തിച്ചു. ഇതിനിടയിൽ, അമേരിക്കയിലേക്കും ഇംഗ്ലണ്ടിലേക്കും പോകാനുള്ള അവസരം ലഭിച്ചു, അവിടെ പരിസ്ഥിതി സൗഹൃദ വീടുകൾ നിർമ്മിക്കുന്ന രീതികൾ പഠിച്ചു.

ഇന്ത്യയിൽ തിരിച്ചെത്തിയ ശേഷമാണ്​ ചാണകത്തെക്കുറിച്ച് ആഴത്തിലുള്ള പഠനം ആരംഭിച്ചത്​. 2015-16ലാണ്​ ചാണകം, ജിപ്സം, കളിമണ്ണ്, ലൈം എന്നിവ ചേർത്ത്​ സിമന്‍റ്​ ഉണ്ടാക്കിയത്​. വേദ പ്ലാസ്റ്റർ എന്ന പേരിലായിരുന്നു ഇത്​. തുടർന്ന് രാജസ്ഥാനിലെ ബിക്കാനീറിൽ ചാണക ഇഷ്ടിക നിർമാണ യൂണിറ്റ് സ്ഥാപിച്ചു. ചൂളയിൽ ചുട്ടെടുക്കുകയോ വെള്ളം ഉപയോഗിക്കുകയോ ചെയ്യാതെയാണ്​ നിർമാണം. ഇവിടെ 15 പേർ ജോലി ചെയ്യുന്നുണ്ട്​. കൂടാതെ, ചാണകത്തിൽ നിന്ന് വിവിധ വസ്​തുക്കൾ നിർമ്മിക്കുന്നതിനുള്ള മൂന്ന് ദിന പരിശീലനവും ഇവിടെ നൽകുന്നുണ്ട്​. 2019ൽ ചാണകത്തിൽ നിന്ന് പെയിൽ നിർമ്മിക്കാൻ തുടങ്ങി​.

ഇതുവരെ ഉത്തർപ്രദേശ്, ഛത്തീസ്ഗഡ്​, രാജസ്ഥാൻ, മഹാരാഷ്ട്ര, ഝാർഖണ്ഡ് തുടങ്ങിയ സംസ്ഥാനങ്ങളിൽ നിന്ന് നൂറിലധികം പേർക്ക് പരിശീലനം നൽകി. ഇവർ രാജ്യത്തിന്‍റെ പല ഭാഗങ്ങളിലും ഈ ഉൽപന്നങ്ങൾ ഉണ്ടാക്കി ഉപജീവനം നടത്തുന്നതായി ഇദ്ദേഹം പറഞ്ഞു. ഡോ. എ.പി.ജെ. അബ്ദുൽ കലാം തന്‍റെ കണ്ടുപിടിത്തത്തെ പ്രശംസിക്കുകയും പ്രോത്സാഹിപ്പിക്കുകയും ചെയ്തിരുന്നതായും ഡോ. ശിവദർശൻ അവകാശപ്പെടുന്നു.


Show Full Article
TAGS:Haryana cow dung vedic plaster 
News Summary - Haryana scientist makes cement, bricks and paint from cow dung
Next Story