പാർട്ടി അംഗീകാരം റദ്ദാക്കാൻ അധികാരം വേണമെന്ന്​ കമീഷൻ

ന്യൂഡൽഹി: രാഷ്​ട്രീയ പാർട്ടികളുടെ അംഗീകാരം റദ്ദാക്കാനും ഉൾപ്പാർട്ടി ജനാധിപത്യം ഉറപ്പാക്കാനും അധികാരം നൽകണമെന്ന്​ തെരഞ്ഞെടുപ്പു കമീഷൻ സുപ്രീംകോടതിയിൽ ആവശ്യപ്പെട്ടു. പാർട്ടി രജിസ്​റ്റർ ചെയ്യുന്നതിനു മാത്രമാണ്​ ഇപ്പോൾ കമീഷന്​ അധികാരം; റദ്ദാക്കുന്നതിന്​ ഇല്ല. ജനപ്രാതിനിധ്യ നിയമത്തിലും അംഗീകാരം റദ്ദാക്കുന്ന കാര്യത്തിൽ വ്യക്തമായ വ്യവസ്​ഥയില്ല. നിയമത്തിൽ ആവശ്യമായ ഭേദഗതി വരുത്തിയാൽ ഉൾപ്പാർട്ടി ജനാധിപത്യം ഉറപ്പുവരുത്താനാവും.

ക്രിമിനൽ കേസുകളിൽ ശിക്ഷി​ക്കപ്പെട്ടവർ രാഷ്​ട്രീയ പാർട്ടി രൂപവത്​കരിക്കുന്നത്​ വിലക്കണമെന്ന ഹരജിയെ അനുകൂലിച്ച്​ സമർപ്പിച്ച സത്യവാങ്​മൂലത്തിലാണ്​ കമീഷൻ ഇൗ ആവശ്യം മുന്നോട്ടുവെച്ചത്​. രജിസ്​ട്രേഷൻ നടത്തുന്ന സമയത്തെ ഉറപ്പുകൾ ലംഘി​െച്ചന്നോ ഭരണഘടനാ വ്യവസ്​ഥ മറികടക്കുന്നുവെന്നോ കണ്ടാൽ രാഷ്​​ട്രീയ പാർട്ടികളുടെ അംഗീകാരം എടുത്തുകളയാൻ കമീഷന്​ അധികാരമില്ലെന്ന്​ ചൂണ്ടിക്കാട്ടുന്ന 2002ലെ സുപ്രീംകോടതി വിധി സത്യവാങ്​മൂലത്തിൽ എടുത്തുപറഞ്ഞിട്ടുണ്ട്​. തെറ്റായവഴിക്കാണ്​ രജിസ്​ട്രേഷൻ നേടിയതെങ്കിൽ അംഗീകാരം പോകുമെന്നാണ്​ അന്ന്​ സുപ്രീംകോടതി വ്യക്തമാക്കിയത്​. 

രജിസ്​റ്റർ ചെയ്​തു എന്നല്ലാതെ, തെരഞ്ഞെടുപ്പിൽ ഒരിക്കലും മത്സരിക്കാത്ത പാർട്ടികളുണ്ട്​. കടലാസ്​ സംഘടനകൾ മാത്രമാണ്​ അത്​. ആദായ നികുതി ഒഴിവിൽ കണ്ണുവെച്ച്​ രാഷ്​ട്രീയ പാർട്ടി ഉണ്ടാക്കാനുള്ള സാധ്യതയും നിലനിൽക്കുന്നു. 2016 ഫെബ്രുവരിക്കും ഡിസംബറിനുമിടയിൽ 255 രാഷ്​ട്രീയ പാർട്ടികളുടെ പേര്​ സക്രിയ പാർട്ടികളുടെ പട്ടികയിൽനിന്ന്​ മാറ്റിയ കാര്യവും കമീഷൻ ചൂണ്ടിക്കാട്ടി. പൊതുതാൽപര്യ ഹരജി തിങ്കളാഴ്​ച കോടതി പരിഗണിച്ചേക്കും. കേന്ദ്ര സർക്കാർ നിലപാട്​ ഇനിയും അറിയിച്ചിട്ടില്ല.