മൊബൈൽ റേഡിയേഷനെ ചെറുക്കാൻ 'ഗോസത്വ കവച്​' ചിപ്പുമായി കേന്ദ്രസർക്കാർ

ന്യൂഡൽഹി: മൊബൈൽ ഹാൻഡ്​സെറ്റുകളിൽ നിന്നുള്ള റേഡിയേഷനെ പ്രതിരോധിക്കാൻ ചാണകം കൊണ്ടുള്ള പ്രത്യേക ചിപ്പ്​ അവതരിപ്പിച്ച്​ രാഷ്ട്രീയ കാമേധനു ആയോഗ് ചെയർമാൻ വല്ലഭായ് കഥിരിയ. ​ 'ഗോസത്വ കവച്'​ എന്ന പേരിലുള്ള ചിപ്പ്​ റേഡിയേഷനെ ചെറുക്കുമെന്ന്​ ​ശാസ്ത്രീയമായി തെളിയിക്കപ്പെട്ടതാണെന്നാണ്​ കാമധേനു ആയോഗ്​ ചെയർമാ​െൻറ അവകാശവവാദം.

ചാണക ഉത്​പന്നങ്ങൾ ​പ്രോത്സാഹിപ്പിക്കുന്നതി​െൻറ ഭാഗമായായി 'കാമധേനു ദീപാവലി അഭിയാൻ' പ്രചരണത്തി​െൻറ ഭാഗമായി ഡൽഹിയിൽ നടന്ന വാർത്ത സമ്മേളനത്തിലാണ്​ ഗോസത്വ കവച്​ വല്ലഭായ് കഥിരിയ പ്രദർശിപ്പിച്ചത്​. മൊബൈൽ ഫോണിൽ നിന്നുള്ള റേഡിയേഷനെ ചാണക ചിപ്പ് പ്രതിരോധിക്കും. റേഡിയേഷൻ മൂലമുണ്ടാകുന്ന രോഗങ്ങൾ അകറ്റാൻ ഈ ചാണക ചിപ്പ് ഫോണുകളിൽ ഉപയോഗിക്കണമെന്നും കഥിരിയ വ്യക്തമാക്കി. രാജ്കോട്ടിലെ ശ്രീജി ഗോശാലയാണ് 'ഗോസത്വ കവച്​' ചിപ്പ് വികസിപ്പിച്ചത്.

ചാണകം എല്ലാവരെയും സംരക്ഷിക്കും. റേഡിയേഷനെ പ്രതിരോധിക്കും. ഇക്കാര്യം ശാസ്ത്രീയമായി തെളിയിക്കപ്പെട്ടതാണ്. വീടുകളിൽ ചാണകം കൊണ്ടുള്ള ഉൽപന്നങ്ങൾ സൂക്ഷിച്ചാൽ ആളുകളെ അവ റേഡിയേഷൻ ഏൽക്കാതെ സംരക്ഷിക്കുമെന്നും കഥിരിയ കൂട്ടിച്ചേർത്തു.

ദീപാവലിക്ക്​ വീടുകളിൽ ചൈനയിൽ നിന്നുള്ള ദീപങ്ങൾ ഉപയോഗിക്കരുതെന്നും കഥിരിയ ആവശ്യ​െപ്പട്ടു. ചാണകം കൊണ്ടുള്ള ദീപങ്ങളും സ്വദേശി ഉൽപന്നങ്ങളും ഉപയോഗിക്കണമെന്നും അത്​ 'മെയ്​ക്ക്​ ഇൻ ഇന്ത്യ' ആശയത്തിന്​ കൂടുതൽ ശക്തിപടരുമെന്നും അദ്ദേഹം പറഞ്ഞു.

കേന്ദ്ര മൃഗസംരക്ഷണ ക്ഷീരകർഷക വകുപ്പിന് കീഴിലുള്ള സ്ഥാപനമാണ് രാഷ്ട്രീയ കാമധേനു ആയോഗ്. പശുക്കളുടെ സംരക്ഷണത്തിനും സുരക്ഷക്കും വികസനത്തിനുമായി 2019ലാണ്​ രാഷ്ട്രീയ കാമധേനു ആയോഗിന് രൂപം നൽകിയത്.