ഡൽഹിയിൽ റേഷൻ വീടുകളിൽ എത്തിക്കുന്നത്​​​ കേന്ദ്ര സർക്കാർ തടഞ്ഞു

ന്യൂഡൽഹി: റേഷൻ വിഹിതം വീടുകളിൽ എത്തിക്കുന്ന ഡൽഹി സർക്കാറിന്‍റെ പദ്ധതിക്ക്​ പാരയുമായി കേന്ദ്ര സർക്കാർ. 72 ലക്ഷം പാവപ്പെട്ട ഗുണഭോക്താക്കൾക്ക് അവരുടെ വീടുകളിൽ റേഷൻ വിതരണം ചെയ്യാനുള്ള കെജ്‌രിവാൾ സർക്കാറിന്‍റെ സ്വപ്​ന പദ്ധതി​ ഇതോടെ അനിശ്​ചിതത്വത്തിലായി.

പദ്ധതി അൽപദിവസത്തിനുള്ളിൽ ആരംഭിക്കാനുള്ള എല്ലാ തയ്യാറെടുപ്പും പൂർത്തിയായതായി സർക്കാർ വൃത്തങ്ങൾ അറിയിച്ചിരുന്നു. കോവിഡ് സാഹചര്യത്തിൽ ജനങ്ങൾക്ക്​ ഏറെ സൗകര്യപ്രദമാണ്​ ഈ സേവനം. കേന്ദ്രം ഉടക്കുവെച്ച പശ്​ചാത്തലത്തിൽ മുഖ്യമന്ത്രി അരവിന്ദ്​ കെജ്‌രിവാൾ നാളെ രാവിലെ 11 ന് വാർത്താസമ്മേളനം വിളിച്ചിട്ടുണ്ട്​.

പദ്ധതി നടപ്പാക്കുന്നതിന് മുമ്പ് അനുമതി തേടിയിട്ടില്ലെന്ന്​ ആരോപിച്ചാണ്​ പദ്ധതി നിർത്തിവെക്കാൻ കേ​ന്ദ്രസർക്കാർ ഉത്തരവിട്ടത്​. പദ്ധതി നടപ്പാക്കാനുള്ള ഫയൽ കോടതിയിൽ കേസ് നിലനിൽക്കുന്നത്​ ചൂണ്ടിക്കാട്ടി ലെഫ്റ്റനന്‍റ്​ ഗവർണർ മടക്കിയതായും മുഖ്യമന്ത്രിയുടെ ഓഫിസ്​ പ്രസ്താവനയിൽ പറഞ്ഞു.

പദ്ധതി ആരംഭിക്കുന്നതിന് നിലവിൽ അനുമതി ആവശ്യമില്ലെന്ന്​ ഡൽഹി ഭക്ഷ്യമന്ത്രി ഇമ്രാൻ ഹുസൈൻ പറഞ്ഞു. . 'കോടതി ഇത്​ സ്റ്റേ ചെയ്​തിട്ടില്ല. വിപ്ലവകരമായ സേവനം നടപ്പാക്കുന്നത് തടയാനുള്ള കേന്ദ്രത്തിന്‍റെ തീരുമാനം രാഷ്ട്രീയ പ്രേരിതമാണെന്ന് വ്യക്തമാണ്​' -അദ്ദേഹം പറഞ്ഞു.

ദേശീയ ഭക്ഷ്യസുരക്ഷാ നിയമപ്രകാരം (എൻ‌എഫ്‌എസ്‌എ) അനുവദിച്ച സബ്‌സിഡി ഭക്ഷ്യധാന്യം പദ്ധതിക്കായി ഉപയോഗിക്കരുതെന്ന്​ ചൂണ്ടിക്കാട്ടി ഡൽഹി സർക്കാരിനോട് പദ്ധതി നടപ്പാക്കരുതെന്ന് കേന്ദ്രം മാർച്ചിൽ തന്നെ ആവശ്യപ്പെട്ടിരുന്നു. എൻ‌എഫ്‌എസ്‌എ എന്ന പേരിലല്ലാതെ മറ്റ് പദ്ധതികളുടെ കീഴിൽ വിതരണം ചെയ്യാൻ ഒര​ുസംസ്ഥാനവും ഈ ധാന്യം ഉപയോഗിക്കരുതെന്ന്​ കേന്ദ്ര സർക്കാർ വ്യക്തമാക്കി. ഈ പശ്​ചാത്തലത്തിലാണ്​ കഴിഞ്ഞ മാർച്ച് 25 ന് ആരംഭിക്കാനിരുന്ന പദ്ധതി നീട്ടിവെച്ചത്​.

കേന്ദ്രത്തിന്‍റ എതിർപ്പിനെത്തുടർന്ന് കെജ്‌രിവാൾ സർക്കാർ പദ്ധതിയുടെ 'മുഖ്യമന്ത്രി ഘർ ഘർ റേഷൻ യോജന' എന്ന പേര് ഉപേക്ഷിച്ചു. പകരം, 2013ലെ എൻ‌എഫ്‌എസ് നിയമത്തിന്‍റെ കീഴിൽ റേഷൻ വാതിൽപ്പടി വിതരണം നടപ്പാക്കാൻ തീരുമാനിക്കുകയും ചെയ്തു. എന്നാൽ, ഇതിനുള്ള അംഗീകാരവും കേന്ദ്രം നിരസിക്കുകയായിരുന്നു.