സ്​ഥാനാർഥിയുടെ അന്ത്യാഭിലാഷം സഫലമാക്കി; മരിച്ചയാളെ​ വോ​ട്ട്​ ചെയ്​ത് ജയിപ്പിച്ച്​​ ഗ്രാമവാസികൾ

പട്​ന: സഹതാപ തരംഗത്തിൽ തെരഞ്ഞെടുപ്പിൽ ജയിക്കുന്നത്​ ആദ്യമായല്ല. എന്നാൽ, മരിച്ചുപോയ സ്​ഥാനാർഥിയുടെ അവസാന ആഗ്രഹപൂർത്തീകരണത്തിനായി വോട്ട്​ ചെയ്​ത്​ ജയിപ്പിച്ചാലോ? ബിഹാറിലെ ഗ്രാമത്തിൽ പഞ്ചായത്ത്​ തെരഞ്ഞെടുപ്പിലാണ്​ സംഭവം.

സ്​ഥാനാർഥി മരിച്ചതിനെ തുടർന്ന്​ അദ്ദേഹത്തിന്‍റെ അവസാന ആഗ്രഹം പൂർത്തീകരിക്കുന്നതിനായി ഗ്രാമവാസികൾ എല്ലാവരും വോട്ട്​ ചെയ്​ത്​ വിജയിപ്പിക്കുകയായിരുന്നു.

പട്​നയിൽനിന്ന്​ 200 കിലോമീറ്റർ അ​കലെയുള്ള ജാമുയി ജില്ലയിലാണ്​ സംഭവം. തെ​രഞ്ഞെടുപ്പിൽ ജയിച്ച സ്​ഥാനാർഥികൾക്ക്​ നവംബർ 24ന്​ ഉദ്യോഗസ്​ഥർ സർട്ടിഫിക്കറ്റുകൾ വിതരണം ചെയ്​തു. ചടങ്ങിൽ, തെരഞ്ഞെടുപ്പിൽ വിജയിച്ച സോഹൻ മുർമു സർട്ടിഫിക്കറ്റ്​ വാങ്ങാൻ എത്തിയില്ല. തുടർന്ന്​ നടത്തിയ ​അന്വേഷണത്തിൽ നവംബർ ആറിന്​ മുർമു മരിച്ചതായി കണ്ടെത്തി. വോ​ട്ടെടുപ്പ്​ നടക്കുന്നതിന്​ ദിവസങ്ങൾക്ക്​ മുമ്പായിരുന്നു മുർമുവിന്‍റെ മരണം -​ബ്ലോക്ക്​ ഡെവലപ്​മെന്‍റ്​ ഓഫിസർ രാ​ഘവേന്ദ്ര ത്രിപാദി പറഞ്ഞു.

ഝാർഖണ്ഡിന്‍റെ അതിർത്തിയോട്​ ചേർന്ന്​ സ്​ഥിതി ചെയ്യുന്ന ഗ്രാമമാണ്​ മുർമു വിജയിച്ച ദീപകർഹർ. ആദിവാസി സ്വാധീന​ മേഖലയാണ്​ ഇവിടം.

എതിരാളിയെ 28 വോട്ടിനാണ്​ മുർമു പരാജയപ്പെടുത്തിയത്​. തെരഞ്ഞെടുപ്പിൽ വിജയിക്കുകയെന്നത്​ മുർമുവിന്‍റെ അവസാന ആഗ്രഹമായിരുന്നുവെന്ന്​ അദ്ദേഹത്തിന്‍റെ കുടുംബാംഗങ്ങൾ പറയുന്നു. അതുകൊണ്ട്​ മുർമുവിന്‍റെ മരണം അധികൃതരെ അറിയിച്ചില്ല. അദ്ദേഹത്തിന്‍റെ ആഗ്രഹം നിറവേറ്റാൻ ഗ്രാമവാസികളെല്ലാം മുർമുവിന്​ അനുകൂലമായി വോട്ട്​ ചെയ്​തതായി തോന്നുന്നു -ബി.ഡി.ഒ പറഞ്ഞു.

വിജയിയുടെ സർട്ടിഫിക്കറ്റ്​ ആർക്കും നൽകാൻ കഴിയില്ലെന്നും ബന്ധപ്പെട്ട വാർഡിലേക്ക്​ നടന്ന തെരഞ്ഞെടുപ്പ്​ റദ്ദാക്കുമെന്നും ബി.ഡി.ഒ കൂട്ടിച്ചേർത്തു.