കർഷക പ്രതിഷേധം നേരിടുന്ന പൊലീസുകാർക്ക്​ ഭക്ഷണം വിളമ്പി കർണാലിലെ ഗുരുദ്വാര

കർണാൽ: കാർഷിക നിയമങ്ങൾക്കെതിരെ ഡൽഹിയിൽ നടക്കുന്ന പ്രതിഷേധ മാർച്ചിൽ കർഷകരും പൊലീസും ഏറ്റുമുട്ടുന്നതിനിടയിൽ, ഹരിയാനയിലെ കർണാലിൽ നിന്ന് പുറത്ത​ുവിട്ട ഹൃദയസ്പർശിയായ വിഡിയോ സാമൂഹിക മാധ്യമങ്ങളിൽ പ്രചരിക്കുകയാണ്​. കർണാലി​ലെ കർഷക പ്രതിഷേധം തടയാൻ നിൽക്കുന്ന ​െപാലീസുകാർക്ക്​ സിഖ്​ ഗുരുദ്വാരയുടെ ലങ്കാറിൽ നിന്നും (സമൂഹ അടുക്കള) ഭക്ഷണം നൽകുന്ന വിഡിയോയാണ്​ പുറത്തുവന്നിരിക്കുന്നത്​.

കർണാലിൽ നിന്നും കിലോമീറ്ററുകൾ അകലെ നിന്ന്​ കർഷകർ ലാത്തി ചാർജും ജലപീരങ്കിയും ഏറ്റുവാങ്ങു​ന്ന ദൃശ്യങ്ങൾ വന്നുകൊണ്ടിരിക്കെയാണ്​, മനുഷ്യത്വവും സഹാനുഭൂതിയും അടിവരയിടുന്ന മറ്റൊരു വിഡിയോ പ്രചരിക്കുന്നത്​.

ദേശീയപാത ഒന്നിൽ സ്ഥിതിചെയ്യുന്ന ഗുരുദ്വാരയാണ്​ പൊലീസുകാർക്ക്​ ഭക്ഷണം നൽകിയത്​. ദൃശ്യത്തിൽ

യൂണിഫോം ധരിച്ച ഡസൻ കണക്കിന് പൊലീസുകാർ രണ്ട് വരികളായി പരസ്പരം അഭിമുഖമായി ഇരിക്കുന്നതും ലങ്കറിലെ സന്നദ്ധപ്രവർത്തകർ ഭക്ഷണം വിളമ്പുന്നതും കാണാം. പൊലീസുകാർ ഭക്ഷണം കഴിക്കാൻ ഇരിക്കുന്നതിനരികെ ലാത്തിയും ഷീൽഡും വെച്ചിരിക്കുന്നത്​ കാണാം.

കനാലിന്​ മുകളിലുള്ള മേൽപ്പാലത്തി​​ലാണ്​ പൊലീസുകാർ ഭക്ഷണം കഴിക്കാൻ ഇരിക്കുന്നത്​. 70 സെക്കൻഡ് ദൈർഘ്യമുള്ള വീഡിയോയിൽ കൂടുതൽ പൊലീസുകാർ വാഹനങ്ങളിൽ നിന്നിറങ്ങി ഭക്ഷണം കഴിക്കാൻ എത്തുന്നത്​ കാണാം. ചില പൊലീസുകാർ സുരക്ഷാ ജാക്കറ്റ്​ ഊരി അതിലാണ്​ ഇരിക്കുന്നത്​​. ഭക്ഷണത്തിന്​ ചിലർ ഉറക്കെ നന്ദി പറയുന്നുണ്ട്​. പാലത്തിന്​ താഴെ പാർക്ക് ചെയ്തിരിക്കുന്ന പൊലീസ് വാനുകളും ദൃശ്യത്തിൽ വ്യക്തമാണ്​.

ഒരുതരത്തിലുള്ള വിവേചനവുമില്ലാതെ സൗജന്യ ഭക്ഷണം വിളമ്പുന്നതിലും ആതിഥ്യമര്യാദയിലും പ്രശസ്​തമാണ്​ സിഖ്​ ഗുരുദ്വാരകൾ.

ഉത്തർപ്രദേശ്, ഹരിയാന, പഞ്ചാബ് എന്നിവയുൾപ്പെടെ നിരവധി സംസ്ഥാനങ്ങളിൽ നിന്നുള്ള കർഷകർ ഡൽഹിയിലേക്ക്​ മാർച്ച്​ നടത്തികൊണ്ടിരിക്കെയാണ്​. കർഷകരെ തടയാൻ ലാത്തി ചാർജ്​, കണ്ണീർ വാതകം, ജലപീരങ്കികൾ എന്നിവ പ്രയോഗിക്കാൻ ഹരിയാന പൊലീസിന്​ നിർദ്ദേശം നൽകിയിട്ടുണ്ട്​. കടുത്ത ശൈത്യത്തെ അവഗണിച്ചാണ്​ കർഷകർ പ്രതിഷേധ മാർച്ച്​ നടത്തുന്നത്​.