50000 ബുക്കിങുമായി മാഗ്​നൈറ്റ്​ കുതിക്കുന്നു; നിസാനിത് പുതുജന്മം

നിസാൻ മാഗ്​നൈറ്റ് എസ്‌യുവി ഇന്ത്യയിൽ 50,000 ബുക്കിങുകൾ പിന്നിട്ടു. 2020 നവംബറിലാണ്​ മാഗ്​നൈറ്റിന്‍റെ ബുക്കിങ്​ കമ്പനി ആരംഭിച്ചത്​. 1.0 എൻ‌എ അല്ലെങ്കിൽ 1.0 ടർബോ-പെട്രോൾ എഞ്ചിനാണ്​ മാഗ്​നൈറ്റിൽ ഉപയോഗിക്കുന്നത്​. മൊത്തം ബുക്കിങിന്‍റെ 10 ശതമാനം ഓൺലൈനിലാണെന്ന് നിസ്സാൻ പറയുന്നു. ലോഞ്ച് ചെയ്തതിനുശേഷം മാഗ്നൈറ്റിന്‍റെ വില മൂന്ന് പ്രാവശ്യം വർധിച്ചിട്ടുണ്ട്​. മൊത്തം ബുക്കിംഗുകളിൽ 60 ശതമാനവും ടോപ്പ്-ഓഫ്-ലൈൻ എക്‌സ്‌വി, എക്‌സ്‌വി പ്രീമിയം വേരിയന്‍റുകൾക്കുള്ളതാണെന്ന് നിസാൻ ഇന്ത്യ അറിയിച്ചു.

വയർലെസ് ആപ്പിൾ കാർപ്ലേ, ആൻഡ്രോയിഡ് ഓട്ടോ കണക്റ്റിവിറ്റി എന്നിവയുള്ള 8.0 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, ഇൻസ്ട്രുമെന്റ് ക്ലസ്റ്ററിനായി 7.0 ഇഞ്ച് ടിഎഫ്ടി ഡിസ്‌പ്ലേ, വോയ്‌സ് റെക്കഗ്​നിഷൻ ടെക്‌നോളജി, 360 ഡിഗ്രി ക്യാമറ, ടയർ പ്രഷർ മോനിറ്റർ, പുഷ്-ബട്ടൺ സ്റ്റാർട്ട്​, ക്രൂസ് കൺട്രോൾ തുടങ്ങിയ പ്രത്യേകതകൾ ഈ വേരിയന്‍റിൽ ലഭ്യമാണ്​. മാഗ്​നൈറ്റിനായുള്ള മൊത്തം ബുക്കിങിന്‍റെ 15 ശതമാനം എക്സ്എൽ, എക്സ് വി, എക്സ് വി പ്രീമിയം വേരിയന്‍റുകളിൽ ലഭ്യമായ സിവിടി പതിപ്പിനുള്ളതാണെന്നും കമ്പനി സ്ഥിരീകരിച്ചു. 100 എച്ച്പി, 1.0 ലിറ്റർ ടർബോ പെട്രോൾ എഞ്ചിനാണ്​ ഈ വാഹനത്തിന്​. 72 എച്ച്പി, 1.0 ലിറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിൻ അഞ്ച് സ്പീഡ് മാനുവൽ ഗിയർബോക്​സ​ുമായിട്ടാണ്​ എത്തുന്നത്​.

എതിരാളികൾ

റെനോ കൈഗർ, കിയ സോനെറ്റ്, ഹ്യുണ്ടായ് വെന്യു, മഹീന്ദ്ര എക്സ് യു വി 300, ടാറ്റ നെക്സൺ, ഫോർഡ് ഇക്കോസ്പോർട്ട്, മാരുതി സുസുക്കി വിറ്റാര ബ്രെസ്സ, ടൊയോട്ട അർബൻ ക്രൂസർ എന്നിവ മത്സരിക്കുന്ന കോംപാക്റ്റ് എസ്‌യുവി വിഭാഗത്തിലാണ് നിസ്സാൻ മാഗ്​നൈറ്റ് സ്ഥാനം പിടിച്ചിരിക്കുന്നത്.