‘ഡിമെൻഷ്യ’ ബാധിതരെ അറിയാം, പരിചരിക്കാം

ആഗോളതലത്തിൽ വൃദ്ധജനസംഖ്യയിൽ വലിയ വർധന​ ഉണ്ടാവുന്ന പശ്ചാത്തലത്തിലാണ്​ പ്രായം ചെന്നവരെ ബാധിക്കുന്ന ‘ഡിമെൻഷ്യ’ എന്ന മറവിരോഗത്തിന്‍റെ തോത്​ വർധിച്ചുവരുന്നത്​. തലച്ചോറിനെ ബാധിക്കുന്ന ഒരു രോഗാവസ്ഥയെ തുടർന്നുണ്ടാവുന്ന നിരവധി രോഗലക്ഷണങ്ങളുടെ സമന്വയമാണ്​ ഈ അവസ്ഥ. സാധാരണ പ്രായമുള്ളവരെ ബാധിക്കുന്ന ഈ രോഗം അപൂർവമായി മധ്യവയസ്കരിലും കണ്ടുവരുന്നു. ഓർമക്കുറവിനുപുറമെ ഒരു വ്യക്​തിയുടെ ചിന്തകൾ, കണക്കുകൂട്ടൽ, ഭാഷാപ്രയോഗം, തീരുമാനങ്ങളെടുക്കൽ, വൈകാരിക നിയന്ത്രണം, സാമൂഹിക പെരുമാറ്റം എന്നിവയെ ഈ രോഗം പ്രതികൂലമായി ബാധിക്കും.

മറവിരോഗത്തിന്​ ഒന്നിലധികം വകഭേദങ്ങളുണ്ടെങ്കിലും ​ഇതു ബാധിച്ചവരിൽ പൊതുവായി കണ്ടുവരുന്ന ലക്ഷണങ്ങൾ ഏകദേശം സമാനമാണ്. വ്യക്​തികളുടെ സ്വഭാവം, ജീവിത സാഹചര്യം എന്നിവയനുസരിച്ച്​ ലക്ഷണങ്ങളിൽ മാറ്റങ്ങളുണ്ടാകും. രോഗം ബാധിച്ചുകഴിഞ്ഞാൽ വ്യക്​തി ക്രമേണ കിടപ്പിലാവുകയും ഭക്ഷണം കഴിക്കാൻ ബുദ്ധിമുട്ട്​ നേരിടുകയും മലമൂത്ര വിസർജനത്തിന്​ നിയന്ത്രണമില്ലാതാവുകയും ചെയ്യും.

‘ഡിമെൻഷ്യ’യോട്​ സമാനമായ ലക്ഷണങ്ങൾ കാണിക്കുന്ന വിഷാദരോഗം, ഡെലീറിയം തുടങ്ങിയ ചില രോഗങ്ങളുള്ളതിനാൽ ഈ രംഗത്ത്​ വിദഗ്​ധനായ ഡോക്​ടർക്ക്​ മാത്രമേ രോഗനിർണയം സാധ്യമാകൂ. ഇതിനായി എം.ആർ.ഐ സ്കാനിങ്​ പോലുള്ള ആധുനിക പരിശോധന മാർഗങ്ങൾ നിലവിലുണ്ട്​. എന്നാൽ, രോഗത്തിന്‍റെ വേഗതയും തീവ്രതയും കുറക്കാനല്ലാതെ ഈ അവസ്ഥയെ പരിപൂർണമായി മാറ്റിയെടുക്കാനുള്ള മരുന്നുകൾ ഇനിയും കണ്ടുപിടിക്കേണ്ടിയിരിക്കുന്നു.

രോഗീപരിചരണത്തിലെ വെല്ലുവിളികൾ: ദൈനംദിന ജീവിതത്തിലെ ചില കാര്യങ്ങ​ളിലെ മറവിയിൽ തുടങ്ങി പരാശ്രയം കൂടാതെ ജീവിതം മുന്നോട്ടുകൊണ്ടുപോകാൻ കഴിയാത്തവിധം ഗുരുതരാവസ്ഥയിലെത്തിക്കുന്ന ഘട്ടംവരെ നീണ്ടേക്കാവുന്ന ഈ രോഗവുമായി ബന്ധപ്പെട്ട്​ നിരവധി വെല്ലുവിളികളാണ്​ രോഗിയെ പരിചരിക്കുന്ന ബന്ധുക്കളടക്കമുള്ളവർ നേരി​ടേണ്ടിവരുക. അതുകൊണ്ട് ഇവർക്ക്​ ശാസ്​ത്രീയമായ പരിശീലനം ആവശ്യമാണ്​. ഇതിനായി ഡോക്ടർ, മനോരോഗ വിദഗ്​ധൻ, മനഃശാസ്​ത്രജ്ഞൻ, സൈക്യാട്രിക്​ സോഷ്യൽ വർക്കർ എന്നിവരുടെ സഹായം വേണ്ടിവരും. ‘ഡിമെൻഷ്യ’ രോഗികൾ പ്രകടിപ്പിക്കുന്ന സ്വഭാവ-മാനസിക വൈകല്യങ്ങളാണ്​ പരിചരിക്കുന്നവരെ ബുദ്ധിമുട്ടിലാക്കുക. രോഗികൾ പ്രകടിപ്പിക്കുന്ന സംശയരോഗം, കാര്യങ്ങൾ ചെയ്യുന്നതിലെ വേഗതക്കുറവ്​, വീടുവിട്ടിറങ്ങിപ്പോകൽ, ആക്രമണ സ്വഭാവം തുടങ്ങിയവയാണിവ​.

പൂർണമായ ബോധാവസ്ഥയിലും രോഗിക്ക്​ പരിസരബോധം നഷ്ടപ്പെടുക സാധാരണമായതിനാൽ രോഗിയെ പരിചരിക്കുന്നവർ ചില കാര്യങ്ങൾ മനസ്സിലാക്കണം. രോഗിയുടെ പെരുമാറ്റങ്ങൾ മനപ്പൂർവമല്ലെന്ന്​ തിരിച്ചറിയുക. വാസ്തവങ്ങളും യാഥാർഥ്യങ്ങളും രോഗികൾക്ക്​ മനസ്സിലാക്കാൻ കഴിയില്ല. എല്ലായ്പോഴും രോഗികൾ ഒരേപോലെ പെരുമാറാൻ സാധ്യതയില്ല. അതുകൊണ്ട് രോഗിയുമായി പരസ്പര ധാരണയോടെ ഒത്തുപോകാൻ കഴിയില്ല. രോഗിയുടെ പെരുമാറ്റവും ​പ്രവർത്തനങ്ങളും നിരീക്ഷിച്ചുകൊണ്ടിരിക്കണം. രോഗികൾക്ക്​ അവരുടെ ആവശ്യങ്ങൾ പറയാനും അറിയിക്കാനും കഴിയാത്തതിനാൽ കണ്ടറിഞ്ഞ്​ ചെയ്യണം. പുതിയ ചുറ്റുപാടിലേക്ക് ​പോകേണ്ടിവരുമ്പോൾ രോഗിയുടെ കൂടെത്തന്നെനിന്ന്​ പിന്തുണ നൽകണം. പുതിയ അന്തരീക്ഷത്തിൽ പ്രതികരിക്കാനും പ്രവർത്തിക്കാനും രോഗിക്ക്​ കൂടുതൽ സമയം നൽകണം. ഭക്ഷണം കഴിക്കൽ, കുളിക്കൽ, ടോയ്​ലറ്റിൽ പോകൽ തുടങ്ങിയവക്ക് നിർബന്ധിക്കരുത്​.

പ്രാഥമിക ലക്ഷണങ്ങൾ

• വസ്തുക്കൾ വെച്ച സ്ഥലം, തീയതി, സമയം, വ്യക്​തികളുടെ പേര്​ തുടങ്ങിയ കാര്യങ്ങൾ സ്ഥിരമായി മറന്നുപോവുക.
• ഒരേ ചോദ്യം വീണ്ടും ചോദിക്കുകയും ഒരേ അഭിപ്രായം ആവർത്തിച്ച്​ പറഞ്ഞുകൊണ്ടിരിക്കുകയും ചെയ്യുക.
• സമീപകാലത്തെ കാര്യങ്ങൾ ഓർത്തെടുക്കാൻ കഴിയാതെയാവുക.
• കാര്യങ്ങൾ പറഞ്ഞുതുടങ്ങിയശേഷം വിഷയവും സംസാരിച്ച കാര്യവും ഇടക്കുവെച്ച്​ മറന്നുപോവുക.
• പുറത്തിറങ്ങിയാൽ തിരിച്ചെത്താനുള്ള സ്ഥലവും സ്വന്തം വിവരങ്ങളും മറന്നുപോവുക.
• ഭക്ഷണത്തിനുശേഷം കഴിച്ചില്ലെന്ന മട്ടിൽ ആവശ്യപ്പെടുക.
• ബന്ധുക്കളെയും സ്ഥിരമായി കാണുന്നവരെയും തിരിച്ചറിയാതിരിക്കുക.
• പ്രാഥമിക കർമങ്ങളിലും ശരീര ശുചിത്വത്തിലും മറവിയും അശ്രദ്ധയും.
• അനുയോജ്യമല്ലാത്ത സമയത്തും സ്ഥലത്തും ലൈംഗിക പെരുമാറ്റം. സ്​പഷ്ടമല്ലാ​ത്ത, അർഥമില്ലാത്ത സംസാരം.

രോഗികൾക്കും പരിചരിക്കുന്നവർക്കും ലഭ്യമായ സേവനങ്ങൾ

രോഗികൾക്ക്​ ലഭ്യമാകുന്ന പകൽ സമയത്തെ ക്ലിനിക്കുകളിലെ പരിചരണം, വീടുകളിൽ എത്തിയുള്ള പരിചരണം, മെമ്മറി ക്ലിനിക്​, പരിചരിക്കുന്നവർക്കുള്ള പരിശീലനം, ബോധവത്​കരണം, ചികിത്സ സംബന്ധിച്ച വിവരങ്ങൾ എന്നിവ നൽകുന്നതിനായി നിരവധി സംവിധാനങ്ങൾ ഇന്ത്യയിലുണ്ട്​. ഇതിൽ പ്രധാനപ്പെട്ട ഒരു കേന്ദ്രമാണ്​ കൊച്ചി ആസ്ഥാനമായി പ്രവർത്തിക്കുന്ന ‘അൽഷിമേഴ്​സ്​ ആൻഡ്​ റിലേറ്റഡ്​ ഡിസോഡേഴ്​സ്​​ സൊസൈറ്റി ഓഫ്​ ഇന്ത്യ’ (ARDSI). ഇതിന്​ കേരളത്തിൽ കൊച്ചിക്ക്​ പുറമെ കോഴിക്കോട്​, കോട്ടയം, തൃശൂർ, തിരുവനന്തപുരം എന്നിവിടങ്ങളിൽ പ്രവർത്തന കേന്ദ്രങ്ങളുണ്ട്​. www.ardsi.org എന്ന വെബ്​സൈറ്റിൽ വിവരങ്ങൾ ലഭ്യമാണ്.