പനി വന്നാൽ 48 മണിക്കൂർ ശ്രദ്ധിക്കൂ; മലേറിയയെ നിസ്സാരമായി കാണരുത്

പനി വരുമ്പോൾ നമ്മളിൽ പലരും ചെയ്യുന്ന ആദ്യ കാര്യം ഒരു പാരസിറ്റമോൾ കഴിച്ച് വിശ്രമിക്കുക എന്നതാണ്. എന്നാൽ, ഈ പനി മലേറിയ ആണെങ്കിൽ ആ വിശ്രമം അപകടത്തിലേക്ക് നയിച്ചേക്കാം. ഏപ്രിൽ 25 ലോക മലേറിയ ദിനമായി ആചരിക്കുമ്പോൾ, ഓരോ രോഗിയും അറിഞ്ഞിരിക്കേണ്ട ഏറ്റവും പ്രധാനപ്പെട്ട കാര്യം '48 മണിക്കൂർ നിയമം' ആണ്.

എന്താണ് ഈ 48 മണിക്കൂർ നിയമം?

മലേറിയയുടെ ലക്ഷണങ്ങൾ പ്രകടമായിത്തുടങ്ങി ആദ്യത്തെ 48 മണിക്കൂറിനുള്ളിൽ കൃത്യമായ പരിശോധനയും ചികിത്സയും ആരംഭിച്ചാൽ രോഗം പൂർണ്ണമായും ഭേദമാക്കാം. എന്നാൽ ഈ സമയം അതിക്രമിച്ചാൽ, രക്തത്തിലെ മലേറിയ പാരസൈറ്റുകൾ അതിവേഗം വർധിക്കുകയും ശരീരത്തിലെ പ്രധാന അവയവങ്ങളെ ബാധിച്ചു തുടങ്ങുകയും ചെയ്യും. ലക്ഷണങ്ങൾ കണ്ട് ആദ്യ രണ്ടു ദിവസം ചികിത്സ വൈകിക്കുന്നത് രോഗം ഗുരുതരമാകാനുള്ള സാധ്യത ഇരട്ടിയാക്കുന്നു.

മലേറിയയെ എങ്ങനെ തിരിച്ചറിയാം?

സാധാരണ പനിയിൽ നിന്ന് മലേറിയയെ വേർതിരിച്ചറിയാൻ ഈ ലക്ഷണങ്ങൾ ശ്രദ്ധിക്കുക.

വിറയലോടു കൂടിയ പനി: പെട്ടെന്ന് വിറയൽ വരികയും പിന്നാലെ ശക്തമായ പനി അനുഭവപ്പെടുകയും ചെയ്യുക.

അമിതമായ വിയർപ്പ്: പനി കുറയുമ്പോൾ ശരീരം വല്ലാതെ വിയർക്കുക.

തളർച്ചയും തലവേദനയും: കഠിനമായ തലവേദന, പേശീവേദന, ഒപ്പം അമിതമായ ക്ഷീണം.

ഛർദ്ദിയും ഓക്കാനവും: ഭക്ഷണത്തോടുള്ള വിരക്തിയും ഇടക്കിടെയുള്ള ഛർദ്ദിയും.

വൈകിയാൽ എന്ത് സംഭവിക്കും?

ചികിത്സ വൈകുന്തോറും മലേറിയ ശരീരത്തെ കീഴടക്കാൻ തുടങ്ങും.

രക്തക്കുറവ് (Anemia): മലേറിയ പാരസൈറ്റുകൾ ചുവന്ന രക്താണുക്കളെ നശിപ്പിക്കുന്നതിനാൽ രക്തം വേഗത്തിൽ കുറയുന്നു.

ശ്വസനതടസ്സം: ശ്വാസകോശത്തിൽ വെള്ളം നിറയുന്ന അവസ്ഥയുണ്ടാകാം.

അവയവങ്ങളുടെ പരാജയം: വൃക്കകൾക്കോ കരളിനോ തകരാർ സംഭവിക്കാം.

തലച്ചോറിനെ ബാധിക്കൽ (Cerebral Malaria): ഇത് രോഗിയെ അബോധാവസ്ഥയിലേക്ക് (Coma) വരെ എത്തിക്കാം.

രോഗികൾ ശ്രദ്ധിക്കേണ്ട കാര്യങ്ങൾ

സ്വയം ചികിത്സ ഒഴിവാക്കുക: മെഡിക്കൽ ഷോപ്പിൽ നിന്ന് നേരിട്ട് മരുന്ന് വാങ്ങി കഴിക്കുന്നത് രോഗം തിരിച്ചറിയാൻ വൈകിപ്പിക്കും.

രക്തപരിശോധന: പനി വന്നാൽ ഉടൻ തന്നെ ഒരു ഡോക്ടറെ കണ്ട് മലേറിയ പരിശോധന (Malarial Parasite Test) നടത്തുക.

മരുന്നുകൾ പൂർത്തിയാക്കുക: ഡോക്ടർ നിർദേശിക്കുന്ന മരുന്നുകൾ പനി മാറിയാലും നിശ്ചിത ദിവസം വരെ പൂർണ്ണമായും കഴിക്കണം. പകുതിക്ക് വെച്ച് നിർത്തുന്നത് രോഗം വീണ്ടും വരാൻ കാരണമാകും.

മലേറിയയെ ഭയപ്പെടേണ്ടതില്ല, പക്ഷേ ജാഗ്രത അനിവാര്യമാണ്. പനി വന്നാൽ 48 മണിക്കൂർ തികയുന്നതിന് മുമ്പ് തന്നെ ഡോക്ടറുടെ സഹായം തേടുക. നേരത്തെയുള്ള ചികിത്സ ജീവൻ രക്ഷിക്കും.

(തയാറാക്കിയത്-ഡോ. ഗോപകുമാർ,സീനിയർ കൺസൾട്ടന്റ് & HOD, ഇന്റേണൽ മെഡിസിൻ, APOLLO ADLUX HOSPITAL, ANGAMALY)