ഇവിടെയുണ്ട്​ 'പ്രവചനസിംഹം' അൽ അമീൻ

ദുബൈ: ചാനലുകളുടെയും പത്രങ്ങളുടെയും എക്​സിറ്റ്​ പോളും സർവേയുമെല്ലാം പൊട്ടിപ്പൊളിഞ്ഞ്​ നിൽക്കു​േമ്പാൾ ദുബൈയിലിരുന്ന്​ അക്ഷരം തെറ്റാതെ പ്രവചനം നടത്തിയിരിക്കുകയാണ്​ തൃശൂർ ചാവക്കാട്​ അണ്ടത്തോട്​ സ്വദേശി അൽ അമീൻ. തെരഞ്ഞെടുപ്പ്​ ഫലം വരുന്നതിന്​ തൊട്ടുമുമ്പത്തെ ദിവസം ഫേസ്​ബുക്കിലും വാട്​സാപ്​​​ ഗ്രൂപ്പുകളിലുമാണ്​ അമീൻ ത​െൻറ പ്രവചനം പോസ്​റ്റ്​ ചെയ്​തത്​. എൽ.ഡി.എഫിന്​ 99 സീറ്റും യു.ഡി.എഫിന്​ 41 സീറ്റും എൻ.ഡി.എക്ക്​ പൂജ്യവുമാണ്​ അമീൻ പ്രവചിച്ചത്​.

പഞ്ചായത്ത്​ തെരഞ്ഞെടുപ്പിൽ വാട്​സാപ്പ്​ ഗ്രൂപ്പുകളിൽ വിലയിരുത്തലുകൾ നടത്തിയിട്ടുണ്ട്​ എന്നല്ലാതെ ഇങ്ങനെയൊരു പ്രവചനം നടത്തിയത്​ ആദ്യമായാണെന്ന്​ 27കാരനായ അമീൻ പറയുന്നു.നാട്ടിൽ ട്രാവൽസിൽ ​ജോലി ചെയ്​തിരുന്ന അമീൻ ജോലി തേടിയാണ്​ ദുബൈയിൽ എത്തിയത്​. നിലവിൽ സഹോദരി സുമയ്യയുടെ കുടുംബത്തോടൊപ്പം ദിബ്ബ അൽഹിസനിലാണ്​ താമസം. ഒരു മാസമായി ​തെരഞ്ഞെടുപ്പ്​ പ്രവചനം ഫേസ്​ബുക്കിൽ പോസ്​റ്റ്​ ചെയ്യണമെന്ന്​ ആലോചിക്കുന്നു. 120 സീറ്റ്​ ​വരെ ലഭിക്കുമെന്നായിരുന്നു കണക്ക്​ കൂട്ടൽ. പക്ഷെ, തെരഞ്ഞെടുപ്പ്​ അടുത്തപ്പോൾ പ്രതിപക്ഷം ഉണർന്ന്​​് പ്രവർത്തിച്ചതും സ്വർണക്കടത്ത്​, പി.എസ്​.സി നിയമനം, ആഴക്കടൽ മത്സ്യ ബന്ധനം തുടങ്ങിയവയും ഇടതുപക്ഷത്തി​െൻറ സീറ്റ്​ കുറക്കുമെന്ന്​ കരുതി.

അങ്ങനെയാണ്​ 99- 41ൽ പ്രചവനം നടത്തിയത്​. ഇത്​ വെറും 'തള്ളാണ്​' എന്നായിരുന്നു ആദ്യം വന്ന കമൻറുകൾ. കുറച്ച്​ കുറക്കാൻ പറ്റുമോ എന്ന്​ പോലും പലരും ചോദിച്ചു. പ്രവചനം കിറുകൃത്യമായെങ്കിലും അമീന്​ പ്രത്യേക രാഷ്​ട്രീയ പാർട്ടിയോട്​ ചായ്​വില്ല. ഓരോ സമയത്തെ രാഷ്​ട്രീയ പാർട്ടികളുടെ നിലപാടും സ്​ഥാനാർഥിയുടെ ഗുണഗണങ്ങളും പരിഗണിച്ചായിരിക്കും വോട്ട്​. മലേഷ്യയിൽ കളരി അഭ്യാസി ആയിരുന്ന ഉസ്താദ് ഹംസ ഗുരുക്കളുടെ മകനായ അൽഅമീൻ അവിവാഹിതനാണ്​. ബി കോം ബിരുദധാരിയായ അമീൻ അയാട്ട പരിശീലനം പൂർത്തിയാക്കിയിട്ടുണ്ട്​. യു.എ.ഇയിൽ നല്ലൊരു ജോലിയാണ്​ ലക്ഷ്യം.

കൃത്യമായി പ്രവചിച്ച്​ മജീദും മാഹിനും

റാസല്‍ഖൈമ: തെരഞ്ഞെടുപ്പിനോടനുബന്ധിച്ച് റേഡിയോ ഏഷ്യ നടത്തിയ പ്രവചന മത്സരത്തിലും 99- 41- 00 പ്രവചിച്ച്​ രണ്ടു മലയാളികൾ. അബ്​ദുല്‍ മജീദ്, മാഹിന്‍ എന്നിവരാണ് മാന്ത്രിക പ്രവചനം നടത്തി 50,000 രൂപ സമ്മാനത്തുക നേടിയത്​. വിവിധ എമിറേറ്റുകളില്‍നിന്ന്​ പത്തോളം പേര്‍ കൃത്യമായി പ്രവചിച്ചതായി റേഡിയോ ഏഷ്യ നെറ്റ്​വര്‍ക്കിങ് സി.ഇ.ഒ ബ്രിജ്രാജ് ബല്ല അറിയിച്ചു.